To tuni be’em mɛ, namesa ge kiira se’ere n sɔi la, yia nɛra la a pɔɣa la n de Adam la Hawa la yuun zaɣesɛ la Naayinɛ nɔɔrɛ. a Ge to bɔŋa wa kan ana bala wuusa. Yehowa doose la a Dayɔa Yezu Krista poan yu’ɛ sore ti a faaɛ tɔ be’em la kum poan basɛ. Baabule la pa’alɛ tɔ ti Yezu doose la a kum la poan eŋɛ lua bunɔ la. Lua bunɔ wa dela sɛla ti ba dekɛ yɔ yese nɛra yele poan basɛ. Sɛla ti Yezu yuun dekɛ yɔ dela amea tuulum vom n ani kasi la. (Kaalɛ Matu 20:28.) Yezu n yuun tari sore ti a vɔna daarewoo tingɔŋɔ wa zuo ge sakɛ ti ba ku en la, bo to la yɔ’ɔ ti to nyɛ sɛla za’a ti Adam la Hawa yuun sa’am basɛ la. Yezu yuun le eŋɛ pa’alɛ eŋa la Yehowa n nɔŋɛ to se’em mɛ. Zaseŋɔ kuna wa wan soŋɛ ti hon tari pupeelum se’em bɔ’ɔra Yezu kum la malum pa’asɛ.

1. Zina wa, to wan ta’an nyɛ nyuurɔ la wani Yezu kum la poan?

To de be’emdoma la zuo to tuni la yɛla zo’e zo’e n daani Yehowa. Ge to san eŋɛ pa’alɛ ti to sirum tue mɛ ge zusɛ Yehowa doose Yezu Krista yu’urɛ poan, a wan di to be’em suɣurum bo to. To me san ita ania ka le tuna be’em, tomam la Naayinɛ zɔtɔ nyɔka la wan kpe’em. (1 Yon 2:1) Baabule la yeti: “Krista ki la buyina yelebe’ero zuo, tontɔɔdaana n ki bo sɛba n daɣɛ tontɔɔ, la wan eŋɛ se’em ti a ta’an tari ya paɛ Naayinɛ zɛ’an.”​—1 Peter 3:18.

2. To wan eŋɛ la wani ta’an nyɛ nyuurɔ Yezu kum la poan beere sa’am?

Yehowa yuun tum la Yezu ti a dekɛ a nɛresaala vom la n nani kasi la bo “ti se’em woo n tari sakerɛ bɔ’ɔra [Yezu] kan nyɛ sa’aŋɔ ge a wan nyɛ daarewoo nyɔvore.” (Yon 3:16) Yezu kum la zuo, la kan yue Yehowa wan yese be’em sebo woo ti Adam ta’asɛ la. Wana wa vuurɛ dela to san tara sakerɛ Yezu kum la poan, to wan nyɛ yɔ’ɔ ta tara vom somɔ daarewoo paradiisi la poan, tingɔŋɔ wa zuo!​—Isaiah 65:21-23.

 VIISƐ PA’ASƐ

3. Yezu kum la faaɛ to la be’em la kum poan

1. Adam yuun dela nɛra n ani kasi ge zaɣesɛ Naayinɛ nɔɔrɛ, nyaa basɛ ti nɛresaaleba bɔna be’em la kum poan

2. Yezu yuun dela nɛra n ani kasi, nana Naayinɛ nɔɔrɛ ge basɛ ti nɛreba bɔna sarɔɔ zuo n wan ta basɛ ti ba ana kasi ge tara vom somɔ daarewoo

4. Nɛra woo wan ta’an nyɛ nyuurɔ Yezu kum la poan

 5. Lua bunɔ la dela Yehowa bo’olum

Yehowa zɔdoma geele lua bunɔ la ti la dela bo’olum ti ba dekɛ bo ba. Makerɛ n wana, kaalɛ Galatia 2:20 ge nyaa sɔsɛ sokere wa:

• Sarɔkuni poan ti tuuntuna Paul yuun eŋɛ pa’alɛ ti eŋa geele lua bunɔ la ti la dɛna la bo’olum ti ba dekɛ bo en?

Se’em ma’a ti Adam yuun tum be’em la, eŋa la a yaasi la za’a yuun nyaa boi la kum poan. Ge Yehowa yuun tum la a Dayɔa ti a wa’ana ki bo to, la wan eŋɛ se’em ti to ta’an tara vom somɔ daarewoo.

Ho san kaala kaalegɔ zɛ’ɛsi wa, geele bisɛ la yuun ani Yehowa se’em la a Dayɔa la n yuun nameseri la. Kaalɛ Yon 19:1-7, 16-18 ge nyaa sɔsɛ sokere wa:

• La ani hon la wani la Yehowa la Yezu n eŋɛ sɛla bo ho la?

 YELEKPINE

Yezu kum la n basɛ ti Yehowa dita to be’em sugeri bɔ’ɔra tɔ ge bo to yɔ’ɔ ti to wan ta tara vom somɔ daarewoo.

Tiisegɔ Sokere

• Beni n sɔi ti Yezu yuun ki?

• Sore kani poan ti Yezu vom la n ani kasi la dɛna lua bunɔ n makɛ ma’a?

• Yezu kum la wan ta’an bo ho nyuurɔ la wani?