KUKWE JA TÖTIKARA 27
Jesukwe ja nire biani ye tä ni mike kwäre
Adán aune Eva ñaka ja töi mikani Ngöbö mike täte. Yebätä, nita ja mike ngite, ja tare nike aune krüte. a Akwa, ni niena bobre kukwe ye kisete nikwe ñan nütüdre. Ñobätä ñan aune Jesukristo yebiti Jehovakwe kukwe ruäre nuainbarera ni mikakäre kwäre, gata aune ja mika ngite ye kisedabate. Jesukwe ja nire biani yebiti ni dianintari kwe drieta Bibliakwe. Ni iti diantarita ye abokän ni ye ütiä nuäi ye ütiä bianta täte mikakäre kwäre meden gärätä. Jesukwe ja nire metre kwe ye biani ni ütiä biankäre (mäkwe ñäkä Mateo 20:28 yebätä). Jesús raba nüne kärekäre kä tibienbätä akwa, ja töi mikani kwe ñaka ye erere nuainne. Yebiti, kukwe nianinte Adán aune Eva kän ye kokwäre ji tikaninta kwe ni kä nebätä kräke ne kwe rabadreta nikwe. Jehová aune Jesús tä ni tarere ye bämikani kwetre kukwe yebiti. Kukwe ja tötikara nekwe mä dimikai ja töi mike debe bien krubäte Jesús ja nire biani yebätä.
1. ¿Jesús ja nire biani ye tä ni dimike ño nengwane?
Ni töi ngite yebätä kukwe keta kabre blo nita nuainne Jehová rüere. Kukwe blo yebätä nikwe ja töi kwitai töi bökänbiti aune nikwe ngite kita manain ta jabiti Jehovai Jesukristo käbiti ngwane, ni raba nemen ja kete kwin Ngöböbe. Aune nikwe ja di ngwandre ñaka kukwe blo ye nuainenta (1 Juan 2:1). Biblia tä niere: “Kristo murie ketani batibe aune kärekäre ni ngite ütiäre, ni kukwe metre nuainkä murie ketani nitre ñaka kukwe metre nuainkä ye täte, mun jie ngwankäre Ngöbö kokwäre” (1 Pedro 3:18, TNM).
2. ¿Jesukwe ja nire biani yekwe ni dimikai ño ja känenkäre?
Jehovakwe monso kwe, töi metre juani ja nire bien ne “kwe ni jökrä tä tödeke [Jesús] ie ye ñaka gadrete, ñakare aune ja nire kärekäre rabadre kwe” (Juan 3:16, TNM). Adán ñan ja mikani täte ye köböite kukwe keta kabre käme nemen bare ye Jehová köböra denkä täte, Jesukwe kukwe nuainbare ye köböire. Ye abokän Jesukwe ja nire biani yei nikwe tö ngwain ngwane, kä tibien ne kwitai bä nuäre yete ni rabai nüne kärekäre (Isaías 65:21-23).
JA TÖTIKE BÄRI NGUSETA
Ñobätä Jesukwe ja nire biani aune raba mä dimike ño ye mike gare bäri kwin jai.
3. Jesuta ni mike kwäre ja mika ngite aune gata yebätä
VIDEO mikadre ñärärä, biti kukwe ne kädriedre jabe:
-
¿Adán ñan Ngöbö mikani täte ye köböite dre nianinte kän?
Ñäkädre Romanos 5:12 yebätä aune kukwe ne kädriedre jabe:
-
¿Adán ja mikani ngite ye köböite dre nemen bare mäbätä?
Ñäkädre Juan 3:16 yebätä aune kukwe ne kädriedre jabe:
-
¿Ñobätä Jehovakwe monso kwe juani kä tibienbätä?
-
Adán ye töi nämäne metre, akwa ñaka Ngöbö mikani täte kwe ye köböite ngite aune gata kitani kwe ni jökräbiti.
-
Jesús töi nämäne metre aune Ngöbö mikani täte kwe ye köböire ni töi rabaita metre aune nünandi kärekäre.
4. Jesús ja nire biani ye köböire kukwe kwin raba nemen ni jökräkwe
VIDEO mike ñärärä, biti kukwe ne kädriedre jabe:
-
¿Ni itibe ja nire biani se ño abokän tä kukwe kwin mike nemen bare ni jökrä kräke?
Ñäkädre 1 Timoteo 2:5, 6 yebätä aune kukwe ne kädriedre jabe:
-
Adán töi nämäne metre akwa ja mikani ngite kwe ngwane, ngite aune gata ye mikani kwe nibiti. Jesús töi nämäne metre arato, aisete ni ütiä biandre ribe nämäne, ¿dre “nuainbare kwe ütiä biankäre”?
5. Ni ütiä biani ye Jehovakwe kukwe kwin nuainbare mä kräke
Ni ütiä biani ye tuin ni ja ketamuko Jehovakwe ie, kukwe kwin nuainbare kräketre ye kwrere. Mikakäre gare keteiti jai, ñäkädre Gálatas 2:20 yebätä aune kukwe ne kädriedre jabe:
-
¿Kukwe medenbiti apóstol Pablo mikani gare niara kökanintari ye kukwe kwin nuainbare kräke?
Adán ja mikani ngite ye köböite niara aune nitre jökrä ye jatani krüte. Akwa Jehovakwe monso kwe juani kä tibienbätä ja nire kwe bien ye köböire mä raba nüne kärekäre.
Jehovakwe monso kwe tuani ja tare nike ngwane ja namani ruin ño ie, ye bämike ja töite mä tä ñäke texto nebätä ngwane. Ñäkädre Juan 19:1-7 aune 16-18 yebätä aune kukwe ne kädriedre jabe:
-
¿Jehová aune Jesús kukwe nuainbare mä kräke yebätä ja ruin ño mäi?
NITRE RUÄRE TÄ KUKWE NE NGWENTARI: “¿Ni itibe ja nire biani se ño abokän tä ni jökrä mike kwäre?”.
-
¿Mäkwe dre niedre?
¿DRE NIBI GARE MÄI?
Jesukwe ja nire biani ye köböire, Jehovata ngite den ta nibiti aune ni raba nüne kärekäre.
Ngwankäreta törö
-
¿Ñobätä Jesús murie ketani?
-
¿Jesukwe ja nire metre biani “ni kökatarikäre” ye ñobätä namani debe?
-
¿Jesukwe ja nire biani ye tä kukwe kwin mike bare ño mä kräke?
KUKWE MIKE GARE BÄRI JAI
Ñobätä ja nire metre Jesukwe ni kökatarikä ye mike gare jai.
“¿Ñobätä ja nire metre Jesukwe ni diantarikä kwin?” (Artículo jw.org)
Dre nuaindre ne kwe ni rabadre kwäre ye mike gare jai.
¿Ja mikata ngite krubäte ye Jehovata juen ta?
“Kukwe ngwantarita Biblia yebätä” (Ni Mikaka Mokre, 1 mayo 2013)
Kristo ja nire biani ni ütiäre ye ñobätä kwin ni kräke nükani gare ni iti ie ngwane dimikani ja töi kwite. Ñäke kukwe kwe yebätä.
a Ja mika ngite ye ñan kukwe käme nuainta jerekäbe ñakare aune ni töi nierare kukwe blo nuainbätä, Adán aune Eva köböite ni töita kore.
Ne rabai tuen kwin mäi arato
KUKWE NGWANTARITA BÄRI
¿Ja tötika Bibliabätä drieta ni testiko Jehovakwe ye abokän ño?
Ni testiko Jehovakwe tä ni tötike ye ütiä kärä ñaka aune mä raba ja tötike Biblia jeñe mäkwe yebiti. Ne madakäre mä raba mä mräkä jökrä o ja ketamuko ye nübaire jabe ja tötike.
