Makasala kita, nagaantos, kag nagakapatay bangod wala gintuman ni Adan kag ni Eva ang Dios. a Pero may paglaum pa kita. Naghimo si Jehova sing paagi para mahilway kita sa sala kag kamatayon paagi sa iya Anak nga si Jesucristo. Ginatudlo sang Biblia nga gingawad kita paagi sa kamatayon ni Jesus. Ang gawad amo ang ginabayad para mahilway ang isa. Ang ginbayad ni Jesus amo ang iya perpekto nga kabuhi bilang tawo. (Basaha ang Mateo 20:28.) Puede kuntani mabuhi si Jesus sing wala katapusan sa duta, pero kinabubut-on niya nga ginsakripisyo ini para mabaton naton ang tanan nga nadula ni Adan kag ni Eva. Ginpakita man ni Jesus kon daw ano nila kita ka palangga ni Jehova. Ini nga leksion magabulig sa imo nga apresyahon pa gid ang kamatayon ni Jesus.

1. Paano kita makabenepisyo sa kamatayon ni Jesus subong?

Bangod makasasala kita, madamo kita sing ginahimo nga makapasubo kay Jehova. Pero, kon nagahinulsol gid kita kag nagapangayo sing patawad kay Jehova paagi kay Jesucristo, kag kon ginatinguhaan naton nga indi na pagliwaton ang aton mga sala, mangin abyan naton ang Dios. (1 Juan 2:1) Ang Biblia nagasiling: “Ang Cristo mismo napatay sing makaisa gid lang tungod sa mga sala, isa ka matarong nga tawo para sa mga indi matarong, agod madul-ong kamo sa Dios.”—1 Pedro 3:18.

2. Sa palaabuton, paano kita makabenepisyo sa kamatayon ni Jesus?

Ginpadala ni Jehova si Jesus para ihatag ang iya perpekto nga kabuhi bilang tawo ‘agod ang tanan nga nagatuo kay Jesus indi malaglag kundi makatigayon sang kabuhi nga wala sing katapusan.’ (Juan 3:16) Bangod sa ginhimo ni Jesus, dulaon ni Jehova sa indi madugay ang tanan nga malain nga resulta sang indi pagtuman ni Adan. Buot silingon, kon magtuo kita sa halad ni Jesus, may paglaum kita nga mabuhi sing wala katapusan sa paraiso nga duta!—Isaias 65:21-23.

 USISAA PA GID

3. Ang kamatayon ni Jesus naghilway sa aton sa sala kag kamatayon

1. Si Adan perpekto nga tawo nga wala nagtuman sa Dios. Gani, ang tanan nga tawo nangin makasasala kag nagakapatay

2. Si Jesus perpekto nga tawo nga nagtuman sa Dios. Gani, ang tanan nga tawo may paglaum nga mangin perpekto kag magkabuhi sing wala katapusan

4. Makabenepisyo ang tanan nga tawo sa kamatayon ni Jesus

 5. Ang gawad regalo ni Jehova para sa imo

Para sa mga abyan ni Jehova, ang gawad personal nga regalo sa ila. Halimbawa, basaha ang Galacia 2:20, dayon binagbinaga ini nga pamangkot:

• Ano ang ginsiling ni apostol Pablo nga nagapakita nga ginkabig niya ang gawad nga regalo para sa iya?

Sang nagpakasala si Adan, sia kag ang tanan niya nga kaliwat ginsentensiahan sang kamatayon. Pero ginpadala ni Jehova ang iya Anak para mapatay, agod may paglaum ka nga mabuhi sing wala katapusan.

Samtang ginabasa mo ang masunod nga mga bersikulo, imadyina kon ano ang ginbatyag ni Jehova sang nag-antos ang iya Anak. Basaha ang Juan 19:1-7, 16-18, dayon binagbinaga ini nga pamangkot:

• Ano ang ginabatyag mo sa ginhimo ni Jehova kag ni Jesus para sa imo?

 SUMARYO

Bangod sa kamatayon ni Jesus mapatawad ni Jehova ang aton mga sala kag may paglaum kita nga mabuhi sing wala katapusan.

Rebyu

• Ngaa napatay si Jesus?

• Paano nangin katumbas nga gawad ang perpekto nga kabuhi ni Jesus bilang tawo?

• Paano ka makabenepisyo sa kamatayon ni Jesus?