LESENI 27
Edena Dala ai Iesu Ena Mase ese Ita Ia Hamauria Diba?
Headava tau bona hahine ginigunana, Adamu bona Heva ese Dirava idia kamonai henia lasi dainai, ita kara dika, hisihisi bona ita mase. a To ita be mai iseda helaro. Iehova ese iena Natuna, Iesu Keriso amo dala ia kehoa kara dika bona mase amo ita ia ruhaia totona. Baibel ese ita ia hadibaia Iesu be ena mase amo mauri davana ia henia. Inai hereva, davana be tau ta hoia lou totona idia henia davana, unai amo ia idia ruhaia diba. Iesu ese ena mauri goevadaena amo mauri davana ia henia. (Mataio 20:28 duahia.) Iesu be tanobada ai ia mauri hanaihanai diba, to mai ura ida unai ia dadaraia bona dala ia kehoa unai amo Adamu bona Heva ese idia haboioa maurina ita abia lou diba. Danu, Iesu ia hahedinaraia ia bona Iehova be ita idia lalokau henia bada. Inai leseni ese oi do ia durua, Iesu ena mase oi laloa bada totona.
1. Edena dala ai Iesu ena mase ese hari ita ia durua diba?
Ita be kara dika taudia dainai, ita karaia gaudia momo be Iehova ese ia moalelaia lasi. To, bema ita helalo-kerehai momokani bona Iesu Keriso ena ladana ai Iehova ita noia iseda dika do ia gwauatao, bona bema ita gaukara goada unai kerere ita karaia lou lasi, Dirava ida hetura kara namona do ita moalelaia. (1 Ioane 2:1) Baibel ia gwau: “Keriso, kara maoromaoro tauna, be nega tamona sibona ia mase, kara maoromaoro lasi taudia be kara dika amo ia ruhaia totona. Unai bamona ia karaia, Dirava dekenai umui ia hakaua lao totona.”—1 Petero 3:18.
2. Edena dala ai vaira negana ai Iesu ena mase amo namo ita abia diba?
Iehova ese Iesu ia siaia ena mauri goevadaena ia henia totona, “unai amo [Iesu] idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Iesu ia karaia karana dainai ita moale, badina kahirakahira Iehova ese Adamu ena gwau-edeede karana dainai idia vara gau dikadia ibounai do ia haorea. Unai ena anina be, bema Iesu ena boubou gauna ita abidadama henia, ita ese tanobada paradaisona ai mauri do ita moalelaia hanaihanai!—Isaia 65:21-23.
DIBA MA HAIDA ABIA
Iesu ese ena mauri ia henia ena badina oi laloparara namonamo, bona oi ia durua dalana oi dibaia.
3. Iesu ena mase ese kara dika bona mase amo ita ia ruhaia
VIDIO itaia, bona henanadai herevalaia.
-
Adamu ese Dirava ia gwau-edeede henia neganai dahaka ia haboioa?
Roma 5:12 duahia, bena inai henanadai herevalaia:
-
Adamu ena kara dika dainai emu mauri ai dahaka ia vara?
Ioane 3:16 duahia, bena inai henanadai herevalaia:
-
Dahaka dainai Iehova ese tanobada ai ena Natuna ia siaia?
-
Adamu, goevadae tauna ese Dirava ia gwau-edeede henia dainai taunimanima dekenai kara dika bona mase ia havaraia
-
Iesu, tau goevadaena ese Dirava ia kamonai henia bona taunimanima totona dala ia kehoa mauri goevadaena bona mauri hanaihanai idia abia totona
4. Iesu ena mase ese taunimanima ibounai dekenai namo ia havaraia diba
VIDIO itaia, bona henanadai herevalaia.
-
Edena dala ai tau tamona ena mase ese taunimanima ibounai dekenai namo do ia havaraia?
Timoteo Ginigunana 2:5, 6 duahia, bena inai henanadai herevalaia:
-
Adamu be tau goevadaena, to ia kara dika dainai taunimanima ibounai idia kara dika bona idia mase. Iesu danu be goevadae tauna. Iesu be “mauri davana” ia henia totona dahaka ia karaia?
5. Mauri davana be Iehova ese oi dekenai ia henia harihari gauna
Iehova ena turadia ese mauri davana be harihari gauna ta bamona idia laloa. Hegeregere Galatia 2:20 duahia, bena inai henanadai herevalaia:
-
Edena dala ai aposetolo Paulo ia hahedinaraia mauri davana be harihari gauna bamona ia laloa?
Adamu ia kara dika neganai, ia bona ena bese ibounai dekenai mase ia henia hanai. To Iehova ese ena Natuna ia siaia bona ia mase, unai amo mauri hanaihanai oi moalelaia diba.
Inai siri oi duahidia lalonai, mani Iehova ena hemami ena Natuna ese ia abia hisihisi dekenai oi laloa. Ioane 19:1-7, 16-18 duahia, bena inai henanadai herevalaia:
-
Iehova bona Iesu ese oi totona idia karaia gaudia oi laloa neganai, emu hemami be edena bamona?
REANA TA DO IA HENANADAI: “Edena dala ai tau tamona be taunimanima ibounai totona do ia mase?”
-
Emu haere be dahaka?
POINT BADANA
Iesu ena mase amo, Iehova ese iseda kara dika ia gwauatao diba, bona dala ia kehoa mauri hanaihanai ita moalelaia totona.
Riviu
-
Dahaka dainai Iesu ia mase?
-
Edena dala ai Iesu ese ena mauri goevadaena amo mauri davana ia henia?
-
Edena dala ai Iesu ena mase ese oi dekenai namo ia havaraia?
REFERENS ITAIA
Dahaka dainai Iesu ena mauri goevadaena be idia gwauraia mauri davana oi dibaia.
“Edena Dala ai Iesu Ena Boubou ese ‘Taunimanima Momo Edia Dika Davana Ia Karaia?’” (Websait atikol)
Oi tahua dahaka ita karaia be namo mauri abia totona.
Iehova ese kara dika badadia ia gwauatao diba, a?
Tau ta be Keriso ena boubou gauna dibaia karana ese ia durua bona ena kara ia haidaua dalana oi itaia.
a Kara dika be ita karaia kara kererena ta sibona lasi. Danu kara dika ena anina be, Dirava amo ita daudau badina ita be Adamu ena natudia.
Reana Inai Danu Oi Ura
Momo Edia Henanadai
Iehova Ena Witnes Taudia be Dahaka Baibel Stadi Kosi Idia Karaia?
Iehova Ena Witnes Taudia ese idia karaia Baibel stadi be davana lasi, bona oi ura henia Baibel oi gaukaralaia diba. Emu ruma bese eiava turadia oi boiria diba stadi lalonai idia helai totona.
