A Adán ani a Eva in jekʼomnaʼ a Dios. Jaxtám wawáʼ u wálbidh, i yajchiknál ani u tsemel. a Pero waʼats jun i aychixtaláb. A Jehová in eyendhámal in tsakámil abal tu ku kʼaniy kʼal an walabtaláb ani an tsemláj. An Biblia in ulal abal a Jesús in bínaʼits jun i jalbixtaláb. Tam jun i atikláb u koʼoyáb wikʼat, u yejencháb jun i jalbixtaláb abal ka walkáj. Játs jawaʼ in tʼajaʼ a Jesús, in bínaʼ in ejatal jantʼiniʼ i jalbixtaláb (ka ajiy Mateo 20:​28). A Jesús in éjtowalakits ka kʼwajiy tejéʼ ti Tsabál abal etsʼey, pero jajáʼ in léʼnaʼ kin bínaʼ in ejatal. Antsanáʼ in tʼajaʼ abal ki koʼoy junílekʼij an aychixtaláb axi in kʼibaʼ a Adán ani a Eva. Jayej tu tejwamédhanchij an kʼanidhomtaláb axi tu koʼonchal jajáʼ ani a Jehová. Axéʼ xi ajumtaláb neʼets ti tólmiy ka kʼakʼnaʼ más, kom a Jesús in léʼnaʼ kin bínaʼ in ejatal.

1. ¿Jantʼoj tam alwataláb i bátsʼuwal kom a Jesús in bínaʼ in ejatal?

Kom u wálbidh, junchikíl i tʼajál jantʼoj axi a Jehová yab in kulbetnál ani u wálbinal. Pero i éjtowal ki bajuw ti jaʼúb a Jehová, max ki konchij tu ku pákwlanchij tin bij a Jesús ani ki tsápnanchij ki tʼajaʼ jawaʼ tekedh. Jayej, max yabáts ku wichiy ki tʼajaʼ nixéʼ xi kidháb tʼajbiláb (1 Juan 2:1). An Biblia in ulal: «A Cristo putat in yajchiknaʼ jun kalat, tam ti tsemdháj […] ti kalchixtaláb kʼal i wálab abal tu ku uldhaʼ kʼal a Dios» (1 Pedro 3:​18).

2. ¿Jantʼoj tam alwataláb neʼets ki batsʼuw axi taʼtal a kʼicháj kom a Jesús in bínaʼ in ejatal?

A Jehová in abaʼ a Jesús abal kin bínaʼ in ejatal abal kʼal wawáʼ «abal patal jitaʼ kin koʼoy i belomtaláb yab ka tsemets, abal kin koʼoy i ejataláb abal etsʼey» (Juan 3:​16). Kom a Jesús in bínaʼits in ejatal, a Jehová wéʼits neʼets kin tixkʼaʼ patal an yajchiktaláb axi tu jilchij a Adán. Tam, max ki tejwamédhaʼ i belomtaláb kʼal jawaʼ in tʼajámal a Jesús, neʼets ki ejtow ku kʼwajiy abal etsʼey tejéʼ ban Tsabál, tam a Jehová kin wenkʼow ti jun i paraíso (Isaías 65:​21-​23).

 ABAL KA EXÓBNAʼ MÁS

3. A Jesús in bínaʼ in ejatal abal tu ku kʼaniy kʼal an walabtaláb ani an tsemláj

1. A Adán pelak jun i inik axi tʼokat, pero tam ti wálbin, in watʼbanchij in tsákamil an walabtaláb ani an tsemláj.

2. A Jesús pelak jun i inik axi tʼokat, ani kom jajáʼ in belkaʼ a Dios, neʼets kin tʼajaʼ abal patal an atikláb ka tʼokej in ejatal ani ka kʼwajiy abal etsʼey.

4. Patal i bátsʼuwal i alwataláb kom a Jesús in bínaʼ in ejatal

 5. A Jehová in bínaʼ in tsakámil abal kʼal tatáʼ

In jaʼúbchik a Jehová in lej kʼakʼnál kom a Jesús in bínaʼ in ejatal, ani in tsúʼtalchik jantʼiniʼ jun i tsʼejwalixtaláb abal jajáʼ. Abal ka tsuʼuwchik jun i tʼiplab ka ajiychik Gálatas 2:​20, ani ka tsálpaychik kʼal axéʼ:

• ¿Jantʼiniʼ in tejwamédhaʼ an abatwálej Pablo abal in lej belálak abal a Jesús in bínaʼ in ejatal abal kʼal jajáʼ?

Tam ti a Adán wálbin, in watʼbanchij patal in tsakámil an walabtaláb ani an tsemláj. Pero a Jehová in abaʼ in tsakámil kin bínaʼ in ejatal, abal wawáʼ ki ejtow ku kʼwajiy abal etsʼey.

Biyat a ajiyal axéʼ xi versículos, ka tsalpay jantʼiniʼ in atsʼálak a Jehováʼ tam ti in tsuʼuw abal in tsakámil kʼwajatak in yajchiknál. Ka ajiychik Juan 19:​1-7 ani 16-​18, ani ka tsálpaychik kʼal axéʼ:

• ¿Jantʼoj a atsʼál tam ka tsalpay kʼal patal jawaʼ a Jehová ani a Jesús in tʼajámal abal kʼal tatáʼ?

 JAWAʼ I EXOBNÁMAL

A Jehová in éjtowal tu ku pákwlanchij i wálab ani tu ku pidhaʼ an aychixtaláb abal ku kʼwajiy abal etsʼey, kom a Jesús in bínaʼits in ejatal.

Ki tʼilaʼ jawaʼ i exóbnaʼ

• ¿Jaleʼ ti tsemets a Jesús?

• ¿Jantʼoj in bajuw kin tʼajaʼ a Jesús kom in bínaʼ in ejatal?

• ¿Jantʼoj tam alwataláb a bátsʼuwal tatáʼ, kom a Jesús in bínaʼ in ejatal?