Ohigbu ka Adam mla Iifu i lɛyitaajɛ lɛ Ɔwɔico ŋ ma, alɔ gē biya íne, gē má owe klla gē kwū. a Amáŋ alɔ lɛ eyiyoce. Ujehofa lɛ ɔ ya tɔɔtɛ ku alɔ le hɛta ŋma íne ō biya mla ikwū oŋma lɛ ɔyi nu nōo wɛ Ujisɔsi Ukraist a. Ubáyíbu nwu ka ō bu ipu ikwū ku Ujisɔsi, ó lɛ alɔ fula. Ofula wɛ ɔdā duuma néē i gba, ō ya ɛɛ kéē lɛ ɔcɛ nyata. Ɔdā nɛ Ujisɔsi gba a wɛ oyeeyi ku nu nōó lɛ ɛnyá ŋ ma. (Jé Umátiyu 20:28.) Eko nɛ Ujisɔsi cɛ ō gekwu ipu ɛcɛ nyā a, ó lɛ ɔ ya tɔɔtɛ ku alɔ lɛ ɛjɛɛji ɔdā nōo hɛ Adam mla Iifu abɔ a lɛ cigbihi. Ujisɔsi klla mafu ɛgɛ nɛ anu mla Ujehofa yihɔtu alɔ a. Ɛlā ō nwu nyā géē ta uwɔ abɔ ka ikwū ku Ujisɔsi kóō jɛ uwɔ eyī tōōtɔ̄ɔ̄.

1. Ɛgɛnyá nɛ alɔ gáā lɛ itene ŋma ikwū ku Ujisɔsi icɛ a?

Ohigbu ku alɔ wɛ ācɛ ō biya íne a, alɔ gē ya ɔdā alɛwa nōó he Ujehofa ɔtu ŋ. Amáŋ, ɔdaŋ ku alɔ le piyabɔ ŋma íne ō biya ku alɔ ɔkwɔɔkwɛyi klla ba Ujehofa ɛba o bu Ujisɔsi kóō kwu ya alɔ ɛhi, nɛ alɔ klla ceyitikwu ku alɔ biya íne ɔɔma gɛ ŋ, alɔ lɔfu jɔɔnyɛ ɛnɛɛnɛ ɛma olɔhi mla Ɔwɔico. (1 Ujɔ́ni 2:1) Ubáyíbu kahinii: “Ohɔ́nyɛtá abɔ̄yī nū móōwē dúú eko nōó kwú igbɛ ékpónú ohígbū íne nɛ̄ ɛ̄jɛ̄ɛ̄jī ācɛ bīya ā, ɔ̄cɛ olɔhi kwɛyí ācobīyíne, ó yá ɛ̄nyā cɛ́ɛ́ kóō lɛ alɔ kagwó mla Ɔwɔicō.”—1 Upíta 3:18.

2. Ɛgɛnyá nɛ alɔ géē lɛ itene ŋma ikwū ku Ujisɔsi ɛcɔbu a?

Ujehofa ta Ujisɔsi ɛhɔ kóō gā lɛ oyeeyi ku nu nōó lɛ ɛnyá ŋ ma gwɛɛya, “ka ɔ̄cɛ dúúmā nōo lɔtūce [Ujisɔsi] í gáā yíífi ŋ́, amáŋ ó géē lɛ oyēeyī opiyóó.” (Ujɔ́ni 3:16) Ahinya lɛ Ujisɔsi ka ɔdā nɛ ó ya a, ó gboji gɛ ŋ, Ujehofa géē bi ɛjɛɛji ɔdobɔbi nōo wa ohigbu ikpɛyi olɔfu ka Adam a wa oŋmɛyi. Ɛnyā wɛ ka ɔdaŋ ku alɔ kpɔtuce ɛya ō gwo ku Ujisɔsi, alɔ géē lɛ ɛga ō jɔɔnyɛ oyeeyi opiyoo ipu uparadais ɛcɛ nyā!—Ayisáya 65:21-23.

 JÉ GƆBU

3. Ikwū ku Ujisɔsi lɛ alɔ hɛta ŋma íne ō biya mla ikwū

1. Adam wɛ ɔcɛ nɛ ó lɛ ɛnyá ŋ, amáŋ ó ta ō lɛyitaajɛ lɛ Ɔwɔico. Ohigbu ɔdā nɛ ó ya nyā, alɛɛcɛ gē biya íne klla gē kwū

2. Ujisɔsi wɛ ɔcɛ nɛ ó lɛ ɛnyá ŋ nōo kē lɛyitaajɛ lɛ Ɔwɔico. Ohigbu ɔdā nɛ ó ya nyā alɛɛcɛ lɛ ɛga ō kwu piya ācɛ nōó lɛ ɛnyá klla jɔɔnyɛ oyeeyi opiyoo

4. Ikwū ku Ujisɔsi lɔfu lɛ itene lɛ ɛjɛɛji ācɛ

 5. Ɛya ō gwo ku Ujisɔsi wɛ ɛhi ŋma ɛgiyi Ujehofa gā uwɔ

Aɔya ku Ujehofa gē má ɛya ō gwo ku Ujisɔsi a bɛɛka ɛhi ku abɔyi uwa a. Ocabɔ, jé Ācɛ Ugalésīya 2:20, cɛɛ ku aa kɔka lɛyikwu ɔka nyā:

• Ɛgɛnyá nɛ ɔcocɛhɔ Upɔlu mafu kóō má ɛya ō gwo ku Ujisɔsi a bɛɛka ɛhi nōo wɛ aku nu a?

Eko nɛ Adam biya íne a, anu mla ɛjɛɛji ayi nu le ta ipu unwalu ku ikwū. Amáŋ Ujehofa ta ɔyi nu ɛhɔ kóō gā gekwu o ya ɛɛ ku a lɛ ɛga ō jɔɔnyɛ oyeeyi opiyoo.

Abɔ a gáā jé aɛga ku Ubáyíbu nōo ba ɛhaajɛ a, leyi yɛ ɛgɛ nɛ ɔtu ya Ujehofa lɛ eko nɛ Ɔyi nu yɔ i má owe a. Jé Ujɔ́ni 19:1-7, 16-18, cɛɛ ku aa kɔka lɛyikwu ɔka nyā:

• Ɛgɛnyá nɛ ɔtu ya uwɔ lɛyikwu ɔdā nɛ Ujehofa mla Ujisɔsi ya gā uwɔ a?

 ƆDI NƐ A NWU A?

Ohigbu ikwū ku Ujisɔsi a, Ujehofa lɔfu je íne ō biya ku alɔ ya alɔ ɛhi. Alɔ klla lɔfu lɛ ɛga ō jɔɔnyɛ oyeeyi opiyoo.

Aɔka ō tu alɔ ɛlá kwu ɔdā nɛ alɔ nwu

• Ɔdiya nɛ Ujisɔsi kwū a?

• Ɛgɛnyá nɛ ɛya ō gwo ku Ujisɔsi nɛ ó lɛ ɛnyá ŋ ma wɛ ɛya nōo cika jɛ lɛ ɔdā nōo hɛ Adam abɔ a?

• Ɛgɛnyá nɛ ikwū ku Ujisɔsi lɔfu lɛ itene gā uwɔ a?