A t’adure, a ch’ọbata, a la ñọ kwu todu ki Adam kpai If ki ch’ata kpai iye wa ejodudu kọ egbomu Ọjọ gbọ. a Ama, a n’ukibeno. Jihofa jẹñwu ọma-wñ Jisọs Kraist ki wa kwu todu ki neke la wa tanẹ kwefu adure kpai ukwu. Baibul kakini ukwu Jisọs ch’ulatanẹ. Ulatanẹ chẹñwu ku ma ra ku ma neke du gb’onẹ tanẹ. Ọmẹ ki Jisọs ra ch’ọlai-wñ ki chẹ jọkpa. (Gba Matiu 20:28.) Alu ki Jisọs jẹ ki d’ọlai-wñ tanẹ todu wa, e-lẹ jẹñwu ki jẹ che ñwu wa k’a neke n’ọlai ki Adam kpai If du tinyọ lẹ. Ẹñwu ki Jisọs che ki dẹ du tejugede ọna k’owñ kpai Jihofa afẹdọ wa. Ukọchẹ-i ach’atẹko wẹ k’ẹ neke ma ọna k’ẹ neke du ña kaki alu ki Jisọs kwu todu wa che w’ẹ eju.

1. Abu ukwu Jisọs neke ch’atẹko wa eñini-i?

Todu k’a ch’amẹnẹ adure, a ch’amẹñwu wewe ki akp’Ọjọ ẹdọ biẹ. Ama, ichẹñwu k’a ch’iwọ todu ẹbiẹnẹ k’a che, k’a la ch’ologwu bu Jihofa lefu Jisọs Kraist ki du ba ñwu wa, k’a la chẹñwu k’a neke che k’a we dabi chẹñwu ẹbiẹnẹ lẹ, e-lẹ ajẹñwu wa jura onukwu ọmẹmẹlẹ kpai Jihofa. (1 Jọn 2:1) Baibul kakini: ‘Kraisti kwu tod adure onu kate. Ẹnọkpakpa lẹ kwu tod amẹnuji, todu kʼi mʼuwa ko wʼugbo Ọjọ.’​—1 Pita 3:​18.

2. Abu ukwu Jisọs neke ch’atẹko wa ejọgba?

Jihofa kpẹ Jisọs w’ilẹ ki wa d’ọlai-wñ ki jọkpa ch’ele “todu k’ẹnẹ du ki akẹdọno [Jisọs] ki we elenyọ, k’i muda n’iñmi ogbegbelẹ.” (Jọn 3:​16) Todu ẹñwu ki Jisọs che-i, e-lẹ ajẹñwu Jihofa ad’amẹñwu ẹbiẹnẹ ki t’ache todu adure Adam w’ukpoji. E-Iẹ du ña kaki ichẹñwu k’a n’ukẹdọno oji ẹñwu ki Jisọs che ñwu wa, a neke n’iñmi ogbegbelẹ efu Paradais anẹ ilẹ-i!​—Aizaya 65:​21-​23.

 N’UMA NYỌGBA

3. Ukwu Jisọs gba wa tanẹ kwefu adure kpai ukwu

1. Adam ch’ẹnẹ ki chẹ jọkpa. Ama todu ki t’adure, ọgbọ amonẹ du at’adure, ma la akwu

2. Jisọs ch’ẹnẹ ki chẹ jọkpa. I la gbomu Ọjọ gbọ. E-lẹ ajẹñwu amonẹ ku ma neke jile ejọkpa, ku ma la neke n’iñmi ogbegbelẹ

4. Ọgbọ amonẹ neke jile kwefu ukwu Jisọs

 5. Ulatanẹ chẹñwu ele ki kwugbo Jihofa ñwẹ

Am’onukwu Jihofa ali ukwu Jisọs kaki i ch’ele ọkpu ñwu ma. K’a g’ujiwe, gba Abo Galatia 2:​20, ubilẹ mẹ ch’oluka oji ene-i:

• Abu ẹnukpuchẹ Pọl du ña kaki i ali ukwu Jisọs dabu ele ọkpu ki kw’ugbo Jihofa w’ugbo-wñ?

Iko k’Adam t’adure, i f’ukwu wa ñwu ọla-wñ manyu am’ugbẹ-wñ chaka. Ama, Jihofa kpẹ Ọma-wñ ki wa kwu todu k’a neke n’iñmi ogbegbelẹ.

Alu k’ẹ na gba am’ọgba Baibul-i, kpibe alu ki dẹ ef’ẹdọ Jihofa iko k’Ọma-wñ ach’ọbata. Gba Jọn 19:​1-7, 16-​18, ubilẹ mẹ ch’oluka oji ene-i:

• Abu ẹñwu ki Jihofa kpai Jisọs che ñwẹ dẹ ọla wẹ?

 ẸY’ỌLA UKỌ-I

Ukwu Jisọs ajẹñwu Jihofa ki neke d’adure wa ba ñwu wa, k’a la neke n’iñmi ogbegbelẹ.

Ẹñwu ẹ kọchẹ?

• Ẹñwu chi ki Jisọs kwu?

• Ọna ẹñwu ọlai Jisọs ki jọkpa ch’ẹñwu ukoji ọmẹ todu amonẹ du?

• Abu ẹ neke jile kwefu ukwu Jisọs?