Adam mọ Eve mọ Jehovah gbaa ye peigha kị duonị omịnị sei mịẹ má ụya fị mịnị. a Anịa omịnị ukịẹmọye emi. Jehovah, Jesus Christ akị sei mọ fịị mọ duo wó zụọbụọmọ mụ bara mịẹ paamọdẹ. Bible gbaa amọ Jesus fịị mị, paraị ịkịan kị mịẹpaamọ wó pịrị wẹrị emi. Paraịye mị anị akị saa gbẹẹ wẹrị kịmị mịẹ fomuun nana mịnị ye. Jesus wo sei kpọ fa ụndụ bị akị bei saa gbẹẹ wó pịrị mị. (Matthew 20:28 goo.) Anị duonị, omịnị Adam mọ Eve mọ nana agbẹị wẹrị yebosẹ waị nana mịnị, má bei yemị Jesus mọ Jehovah mọ wó tarị kụrọmọ emi bara kpọ mịẹdịa dẹ. Bei egberitịbị mị, baratụa ị́ pịrị wẹrị Jesus mịẹ yebị iné tọrụkẹrị dẹịn mịnị.

1. Jesus fịị mị tebara ka kị baratụa wó pịrị mịnị a o?

Sei bolou ka wó zii wẹrịemi duonị, omịnị Jehovah dịsẹgha yeama mịẹ mịnị. Anịa omịnị bolou dei, bụọmọye bii má angọtụa waị wó mịẹ bụọmọdẹ seibo mịẹgha ifie sẹ, omịnị laa Ọkpọnanaowei mọ ebi ikie kẹrị mịnị. (1 John 2:1) Bible gbaa amọ: “seibo duonị Christ fịị mị, kịrịịye mịẹ kịmị fii akị seiye mịẹ mịnị otu pịrị mị, baratụa a pịrị Ọkpọnanaowei mọ naịn mụ duonị.”—1 Peter 3:18.

2. Jesus fịị duonị omịnị bei bọlọụ mị, te ebiama kị nana mịnị a o?

Jehovah, Jesus fịrịmọ bo fịị wó pịrị dá “peibolou akị [Jesus] a tụadẹ kịmịsẹ fịịgha fa, anịa fagha fagha ụndụ kị nana mịnị.” (John 3:16) Anị duonị peibolou akị Jesus kụn ịkịan bọọ tụadẹ kịmịsẹ, mị kiriogbo bọọ paradise a inyenrin timi bẹseri bẹseri laa mịnị. Jehovah, Jesus fịị duonị, alaghatimi Adam duo bo ụyabosẹ kọn siin mịnị. Jesus mịẹ yebị wó mịẹ pọwẹị mị!—Isaiah 65:21-23.

 EBIBARA TUUDỌỤ

3. Jesus fịị duonị, omịnị sei mọ fịị mọ duo peree dẹ

1. Sei Adam angọ bọọ fa timi mi. Anịa Ọkpọnanaowei gbaaye peigha duonị omịnị sei mịẹ wẹrị wósẹ bo sei kịmịama a paa má fịị mịnị

2. Jesus benebene sei gbelegha kịmị. Mọabịkpọ, Jesus Ọkpọnanaowei gbaa ye pei mị, anị duonị, omịnị laa sei mọ fịị mọ duo wó zụọ-tẹịmọ mịnị

4. Jesus fịị bị baratụa kịmịsẹ pịrị a paaemi

 5. Paraị ịkịan mị anị Jehovah akị ị́ pịrị dẹ dịẹpịrịye

Jehovah ikieotumọ, paraị ịkịan bị akị dịẹpịrịye kị diimọ wẹrị emi. Gbaa maba, Galatians 2:20 goo dá, bei biibịbị kẹrị ẹrẹtei:

• Paul tebara ka kị paraị ịkịan mị akị ụ laa emi dịẹpịrịye bara diimọ ma o?

Sei mịẹdẹ bị, Adam mọ wo ziituu mọ bo fịị bolou a sụọdẹ. Anịa Jehovah Jesus fịrịmọ bo fịị wó pịrịdẹ duonị, omịnị laa bẹseri bẹseri ụndụ nana mịnị.

Mị Bible yọmọ ị́ mọ goo mịnị mị, kịmị-otu Jesus ụyamọtimi ifie bị, yemị Jehovah gbeletimi bara kẹrị iroro. John 19:1-7, 16-18 goo dá, bei biibịbị kẹrị ẹrẹtei:

• Jehovah mọ Jesus mọ mịẹ yebị tebara ka kị ị́ gbele ma o?

 KỊLỌỌBARA

Jesus fịị duonị, Jehovah wó seimọ akị wó bụọmọ mịnị, má bẹseri bẹseri ụndụ kpọ akị wó pịrị mịnị.

Waị diitụa

• Jesus tetuu kị duonị fịị ma o?

• Jesus angọ bị tebara ka kị agbẹị emi ịkịan a paa ma o?

• Jesus fịị mị te arere kị mịẹ paamọ ị́ pịrị ma o?