Le mɛɛ Adam nda Ifi kɛɛ Mɛlɛka diom yɛ, miŋ tosa hakioo, miŋ saŋga nduyɛ miŋ vi. a Kɛ keŋ chɔm naa maa ŋ nɔ tiindaŋ te le. Mi Chɛhowa nuuviaa nɛiyo le naa piŋioo. Mbo yɔŋ Po ndɔɔ Chiisu Kiliti le mbo huŋ soli naa o hakioo niŋ a piɔmndo. Baabuiyo pɛɛku maa piɔm Chiisu wo tosa ni miŋ sɔla baŋaa. Baŋaa cho ni, nyɛ waŋndo yɔŋgu le wana cho o biyɔɔ niŋndo malɔɔ wo. Nyɛ Chiisu yɔŋgu le naa baŋaa wo cho yoomu ndɔ walaŋndo ni. (Nuawɔ Maatiu 20:​28.) Chiisu ndoo nɔ le piɔm sɔla kposoŋ te. Kɛ mbo yɔŋgu yoomu ndɔ walaŋndo a kɔllo kpou o chieeŋndo choo. Mi hei kumbul naa nɛiyo le miŋ sɔla nyɛ o nyɛ ndoo hɛluŋ Adam nda Ifi. Piɔm o sɔla hoo wo chɔm vɛlɛ mɛɛ kpɛ ndu nda Chɛhowa kaala naa yɛ. Suɛi lebolle hei cho num mala ma chɔɔlu balika melaa nɔ le piɔm Chiisu sɔla wo.

1. Vɛɛ piɔm Chiisu wo ke yɛ naa tɔnɔɔ suŋ suŋ?

Le mɛɛ naŋ cho wanaa lahakiaa yɛ, miŋ tosa sɔɔŋ tau ŋ tɛɛmbuu Chɛhowa kɔllo woŋ. Te ŋ kel pɛ suei le hakila naalaŋ nduyɛ miŋ nyɔɔlu Chɛhowa o diola Chiisulaŋ niŋ, o nɔla mbo mal naa haki. Nduyɛ, te ŋ kindiŋ pɛ o nɛi o nɛi niŋ miŋ miŋgi lɛ balaŋ o hakila laŋ niŋ te, ŋ nɔla miŋ tuei chaŋyɛi kpɛɛluŋ nde yeela a ndu. (1 Chɔŋ 2:​1) Baabuiyo dimi aa: “Lepilɛ kpe Kiliti vi le hakilaŋ ni. Ndu wana sakpoo mbo wu le wanaa sendu le wa, le halikpeŋ mbo miŋgi nya o diompilɔɔ niŋ a Mɛlɛka.”—1 Pitɛ 3:​18.

2. Vɛɛ piɔm Chiisu wo cho yɛ naa tɔnɔɔ ke o siɔdii lachioo niŋ?

Mi Chɛhowa viam Chiisu le mbo yɔŋgu yoomu ndɔ walaŋndo. O hei niŋ, “wana o wana dɔu laalaŋndo o [Chiisu] niŋ pɛ, o cho tambii sɔla le. Kɛ o cho yoomu fafɛɛŋndo sɔla.” (Chɔŋ 3:​16) Ŋ naŋ bɔɔ kɔl le nyɛ Chiisu tosa hoo wo. Hei cho tosa mi Chɛhowa huŋ faŋa sɔɔŋ wɔɔŋ kɛ kɛ Adam tosa miŋ wa naa choo. Hoo chɔm maa te ŋ dɔu pɛ laalaŋndo o sala soliaŋ Chiisu wo niŋ, ŋ cho hunɔɔ yoomoo tueiyɔɔ yeela lefafɛɛŋ o kpele hɛnɛkiɔɔ niŋ o lɛŋndeŋ choo.—Aisaya 65:​21-23.

 CHƆƆLU YAASIAA

3. Piɔm Chiisu wo soli naa o hakioo niŋ a piɔmndo

1. Wana walaŋndo Adam wa ni kɛ mbo kɛɛ Mɛlɛka diom. Okoŋ mbo chuu waŋnda chieeya hakioo a piɔmndo

2. Wana walaŋndo Chiisu wa ni. Nduyɛ mɛɛ o tuei Mɛlɛka diom, mbo kumbul waŋnda chieeya nɛiyo le ma huŋ simnuŋ wanaa walaŋ okoŋ ma sɔla yoomu fafɛɛŋndo

4. Piɔm Chiisu wo nɔla mbo chuu waŋnda chieeya kpou tɔnɔɔ

 5. Le num Chɛhowa yɔŋgu sala baŋaa ni

Chaaŋaa Chɛhowaa che sala baŋaa maa ke fula Chɛhowa o ba le nda wo o cho ni. Le tamaseliiyo, nuawɔ Kaleesiaŋnda 2:​20, okoŋ mi la suukaŋ o nyunaa hoo choo:

• Vɛɛ kiilanɔɔ Pɔɔl ndoo che yɛ sala baŋaa?

Mɛɛ Adam tosa hakioo, mi piɔmndo huŋ le ndu nda chuauwaa nduaa kpou. Kɛ, mi Chɛhowa yɔŋgu Po ndɔɔ mbo huŋ wu le num le halikpeŋ ma tuei yoomu fafɛɛŋndo yeela.

Te a wa pɛ diomndaŋ veeloo o bolii Baabuiye hei niŋ, yiyaŋndɔ mɛɛ kɔllo wa Chɛhowa yɛ mɛɛ o che Po ndɔɔ saŋgaa. Nuawɔ Chɔŋ 19:​1-7, 16-18, okoŋ mi la suukaŋ o nyunaa hoo choo:

• Vɛɛ kɔllo cho yɛ num a nyɛ Chɛhowa nda Chiisu tosa le numndo?

 SƆƆŊ KULLOŊ

Piɔm Chiisu wo tosa ni mi Chɛhowa wa naa malɔɔ haki le hakila naalaŋ. Nduyɛ, ndu kumbul naa nɛiyo ni le miŋ huŋ sɔla yoomu fafɛɛŋndo.

Nyunala miiŋgaa choolaŋ

• Le yɛɛnɛ Chiisu vi yɛ?

• Le yɛɛnɛ yoomu walaŋ Chiisu wo ndoo yeemaŋ yɛ le naa baŋaa?

• Vɛɛ piɔm Chiisu wo chuu yɛ num tɔnɔɔ?