Twonoona, tubonaabona, era tufa olw’okuba abantu abaasooka, Adamu ne Kaawa, baajeemera Katonda. Naye tulina essuubi nti embeera eno tujja kugivaamu. Yakuwa yakola enteekateeka ey’okutununula okuva mu kibi n’okufa okuyitira mu Mwana we, Yesu Kristo. a Bayibuli egamba nti okuyitira mu kufa kwe, Yesu yawaayo ekinunulo. Ekinunulo gwe muwendo oguweebwayo okusobola okununula omuntu. Omuwendo Yesu gwe yawaayo bwe bulamu bwe obutuukiridde. (Soma Matayo 20:28.) Yesu yandibadde asobola okubaawo ku nsi emirembe gyonna. Naye yakkiriza okuwaayo obulamu bwe ku lwaffe, bw’atyo n’atuggulirawo ekkubo ery’okufuna ebyo byonna Adamu ne Kaawa bye baali batufiirizza. Ate era Yesu yakiraga nti ye ne Yakuwa batwagala nnyo. Essomo lino ligenda kutuyamba okweyongera okusiima okufa kwa Yesu.

1. Tuganyulwa tutya mu kufa kwa Yesu leero?

Olw’okuba tuli boonoonyi, tukola ebintu bingi ebitasanyusa Yakuwa. Kyokka bwe twenenya mu bwesimbu ensobi zaffe era ne tusaba Yakuwa okuyitira mu Yesu Kristo okutusonyiwa, era ne tufuba obutaddamu kukola nsobi ezo, tusobola okuba n’enkolagana ey’oku lusegere ne Katonda. (1 Yokaana 2:1) Bayibuli egamba nti: “Kristo omutuukirivu yafa omulundi gumu olw’ebibi by’abantu abatali batuukirivu asobole okubaleeta eri Katonda.”​—1 Peetero 3:18.

2. Okufa kwa Yesu kunaatuganyula kutya mu biseera eby’omu maaso?

Yakuwa yatuma Yesu okuwaayo obulamu bwe obutuukiridde “buli muntu yenna [akkiririza mu Yesu] aleme okuzikirira, wabula afune obulamu obutaggwaawo.” (Yokaana 3:16) Olw’ekyo Yesu kye yakola, Yakuwa anaatera okuggyawo ebintu byonna ebibi ebyava mu bujeemu bwa Adamu. Ekyo kitegeeza nti bwe tukkiririza mu ssaddaaka ya Yesu, tujja kusobola okunyumirwa obulamu emirembe gyonna mu lusuku lwa Katonda ku nsi!​—Isaaya 65:21-23.

 YIGA EBISINGAWO

3. Okufa kwa Yesu kutusumulula okuva mu kibi n’okufa

1. Adamu yali muntu atuukiridde eyajeemera Katonda era n’aleetera abantu ekibi n’okufa

2. Yesu yali muntu atuukiridde eyagondera Katonda era n’asobozesa abantu okuba n’essuubi ery’okufuuka abatuukiridde n’okufuna obulamu obutaggwaawo

4. Okufa kwa Yesu kusobola okuganyula abantu bonna

 5. Ekinunulo kirabo okuva eri Yakuwa

Mikwano gya Yakuwa batwala ekinunulo ng’ekirabo kye yabawa kinnoomu. Ng’ekyokulabirako, soma Abaggalatiya 2:20, oluvannyuma mukubaganye ebirowoozo ku kibuuzo kino:

• Omutume Pawulo yakiraga atya nti yali atwala ekinunulo ng’ekirabo Katonda kye yamuwa ye ng’omuntu ku bubwe?

Adamu bwe yayonoona, ye ne bazzukulu be baasalirwa ogw’okufa. Naye Yakuwa yatuma Omwana we okutufiirira tusobole okufuna obulamu obutaggwaawo.

Bw’oba osoma ebyawandiikibwa bino wammanga, fumiitiriza ku ngeri Yakuwa gye yawuliramu bwe yalaba Omwana we ng’abonaabona. Soma Yokaana 19:1-7, 16-18, oluvannyuma mukubaganye ebirowoozo ku kibuuzo kino:

• Owulira otya bw’olowooza ku ekyo Yakuwa ne Yesu kye baakukolera?

 MU BUFUNZE

Olw’okufa kwa Yesu, Yakuwa asobola okutusonyiwa ebibi byaffe, era ekyo ne kitusobozesa okuba n’essuubi ery’okufuna obulamu obutaggwaawo.

Okwejjukanya

• Lwaki Yesu yafa?

• Mu ngeri ki obulamu Yesu bwe yawaayo gye bwali bwenkanankana n’obwo Adamu bwe yatufiiriza?

• Okufa kwa Yesu kuyinza kukuganyula kutya?