CIJIJO 27
Rufu hwa Jesu Hunotiponesa!
Itusu tinoshaisha, tinotambujika no kufa ngo kuti Adhamu na Evha, avazivi kuzwira Mwari. a Izvi azvidi kureva kuti apacina vetero. Jehovha wakatumira Mwana wake, Jesu Kristu kuti aviye kuzotisujunura kucishaishi no rufu. Bhaibheri rinojijisa kuti, rufu hwa Jesu hwakapagari muripo. Muripo imutengo unopagahwi kuitira kusujunura ari wese. Jesu wakapagari mutengo uu ngo upenyu hwake hwakakwana. (Verenganyi Mateu 20:28.) Jesu wakatifunungurira mukana wokupona kwenda no kwenda no kuwana zvese zvakaruzwa ndi Adhamu na Evha. Rufu wa Jesu wakakhombija kuti iyena pamwepo na Jehovha vanotida maningi. Cijijo ici cinozomubesera kuengejera kubongesera kwenyu kuno muripo wa Jesu.
1. Rufu hwa Jesu hunotibeseresa kudini nyamasi uno?
Tese tiri vashaishi, ndiyo ndava kuti tinoita zviro zvizinji zvicikadakajisi Jehovha. Asi ngo ndava yozvakatiitira Jesu, tingaregerehwa zvishaishi zvedu. Ngo kudaro, tinodikana kukhauya kamare, tokumbira kuregerehwa ndi Jehovha ngo zina ra Jesu no kuita zvese zvatinokwanisa kuti titame kuitazve cishaishi condhoco. Kudari tikaita izvo tinozova no ushamwari hwakavanga na Jehovha. (1 Johani 2:1) Bhaibheri rinoti: “Kristu wakafira zvishaishi kamwe mbhera narini; mururami kufira vacizivi kururama, kuti amuendese kuna Mwari.”—1 Pedhru 3:18.
2. Rufu hwa Jesu hunozotibeseresa kudini kumbejiyo?
Jehovha wakatumira Jesu kuti aviye kopira upenyu hwake hwakakwana “kuti vese vanomutenda vatame kuparajwa, asi vawane upenyu hucikaperi.” (Johani 3:16) Ngo ndava yo muripo wa Jesu, Jehovha anozopeja zviro zvese zvakashata zvakaitika ngo kutama kuzwira kwa Adhamu. Izvi zvinoreva kuti, kudari tikava no rutendo kumuripo wa Jesu, tinozowana mukana wokupona kwenda no kwenda muparadhiso pasi pano!—Isaia 65:21-23.
NASANYI KUPSAKISISA
Nasanyi kuzwisisa kuti ngenyi Jesu wakapira upenyu hwake kwatiri, perapo vonanyi kuti mungabesereka kudini ngo kuzvipira kwake.
3. Muripo wa Jesu unotisujunura kucishaishi no rufu
Rijanyi VHIDHIYO, perapo bhuisananyi ngo muvhunjo unotevera.
-
Ngo zvapi zvakaruza Adhamu ngo kutama kwake kuzwira Mwari?
Verenganyi Varoma 5:12, perapo bhuisananyi ngo muvhunjo unotevera:
-
Ngo wapi muviyo wokuposa kwa Adhamu?
Verenganyi Johani 3:16, perapo bhuisananyi ngo muvhunjo unotevera:
-
Ngenyi Jehovha wakatumira Mwana wake panyika?
-
Adhamu wainga ari mundhu wakakwana, asi ngo ndava yokutama kwake kuzwira, vandhu vese vanoshaisha no kufa
-
Jesu wainga ari mundhu wakakwana, ngo ndava yokuzwira kwake, vandhu vese vangawana upenyu hwakakwana no kupona kwenda no kwenda
4. Rufu hwa Jesu hungabesera vandhu vese
Rijanyi VHIDHIYO, perapo bhuisananyi ngo muvhunjo unotevera.
-
Rufu wo mundhu umwe basi ungabeseresa kudini vandhu vese?
Verenganyi 1 Timoti 2:5, 6, perapo bhuisananyi ngo muvhunjo unotevera:
-
Adhamu wainga ari mundhu acina ushaishi asi ngo ndava yokuposa kwake, vandhu vese vakabathwa ngo cishaishi no rufu. Jesu waingavo ari mundhu acina ushaishi. Jesu wakaitenyi kuti aripe “muripo unozwirana ku vandhu vese”?
5. Muripo icipo ca Jehovha kwamuri
Kuno shamwari ja Jehovha, muripo icipo cinosisira maningi. Inga muezaniso, verenganyi Vagaratiya 2:20, perapo bhuisananyi ngo muvhunjo unotevera:
-
Ngozvapi zvinokhombija kuti mupostori Pauro waivona muripo inga cipo cakapuwa iyena kamare?
Adhamu paakashaisha, iyena no vandhu vese vaizobahwa pasure po kushaisha kwake, vakatongehwavo rufu. Asi Jehovha wakapira upenyu hwo Mwana wake kuti muwane upenyu hwo kwenda no kwenda.
Pamunonga meciverenga mavhesi anotevera, rangariranyi kuti Jehovha wakajizwa kudini kuvona Mwana wake ecitambujika. Verenganyi Johani 19:1-7, 16-18, perapo bhuisananyi ngo muvhunjo unotevera:
-
Munojizwa kudini ngo kuziva zvakamuitira Jehovha na Jesu?
VANDHU VAMWENI VANGAMUVHUNJISA KUDARI: “Rufu hwo mundhu umwe ungaitisa kudini kuti uponese vandhu vese?”
-
Imwimwi maizodavirisa kudini?
ZVOTAJIJA
Ngo ndava yo rufu hwa Jesu, Jehovha angatiregerera zvishaishi zvedu. Rufu hwa Jesu hunotipazve mukana wokupona kwenda no kwenda.
Kuhwirijira
-
Ngenyi Jesu wakafa?
-
Mu njira yapi upenyu wakakwana wa Jesu wakava “muripo unozwirana ku vandhu vese”?
-
Rufu hwa Jesu ungatibesera kudini?
ZIVANYI ZVIMWENI
Vonanyi kuti ngenyi upenyu hwakakwana hwa Jesu unodanijwa kuti muripo.
“Chibayiro chaJesu ‘Chinodzikinura Sei Vazhinji’?” (Mu interneti)
Verenganyi muzwe zvatinodikana kuita kuti tiponeswe.
Kureva kuti Jehovha anoregerera pikija zvishaishi zvikuru?
“Mibvunzo yeBhaibheri Inopindurwa” (Murindiri, No. 1 wa Maio wo 2013, Cishona)
Vonanyi kuti kujija ngo pamusoro po muripo wa Jesu kwakabesera kudini mwanarume umweni kuti acinje mugariro wake.
a Cishaishi asipi basi ciro cakashata cinoithwa ngo mundhu. Asi cinonangirazve ciro cinotiita kuti tese tide kuita zviro zvakashata ngokuti tese takavha kuna Adhamu na Evha.
