E ndo li siɔ kpale, e ndo hũ pɛnɔ wa e ndo kpili na lo mɛ ya Adamu na Eva akɛ̃ndó tɔndɔngɔ Nzapa. a Kanda ta dungɔ lɛ ngɛ̃́ tɛ e na ngbãngɔ bo ngaso ma. Yehova lɛkɛndó kpale ti tɔ̃ngɔ e ka gbɛ mbɛ ti siɔ kpale nga na kwá na lége tɛ Nyi lo, Yezo Kristo. Ngbangɔ tɛnɛ ya Yezo tɔ̃ndó e na lége ti kwá tɛ lo. Tɔ̃ngɔ adu falanga mɛ afuta ti zingɔ na zo mɛ ka gbɛ tumbu. Ye mɛndó Yezo hɛ̃ ti tɔ̃ngɔ azi adu dungɔ lɛ ngɛ̃́ tɛ lo ti lengbingɔ. (Di Matie 20:28.) Na lo mɛ ya Yezo ndó na tɛrɛ ti lengbingɔ ko, lo lengbindó ti dungɔ ge lɛ sese bwai na bwai, kanda lo yendó kpingɔ kwá ti nɛngɔ ya e lua dungɔ lɛ ngɛ̃́ mɛndó Adamu na Eva agele na ni. Na lingɔ ngaso, Yezo fandó ya lo na Yehova ndo ye e gba. Wangɔ mɛ na zangɔ mɔ ya mɔ ti na tɔndɔngɔ gba na lo ti kwá tɛ Yezo.

1. Ngasia la kwá tɛ Yezo alengbi ti zangɔ e ndɛ nɛ?

Na lo mɛ ya e du awa lingɔ siɔ kpale ko, ngoi zu e ndo li aye mɛ ndo hɛ̃ Yehova sɔngɔ bɛ. Kanda elengbi ti batangɔ mangbi tɛ e na Yehova se du ya e ndo ma vundu ti asiɔ kpale mɛ e li, wa e yɔ ya lo ka lɛ lo ndo siɔ kpale tɛ e na lége tɛ Yezo Kristo, wa e kɛ̃ diringɔ lingɔ siɔ kpale niko fãni mɛndɛ̃ ko, e na ngbãngɔ bo akwa lo. (1 Yoanɛ 2:1) Ngbangɔ tɛnɛ ya: “Kristo nvɛni akpi ndo so ĩ. Lo kpi ndo bo fani kɔi so hãngɔ siɔ ye tɛ azi zingɔ. Lo mɛ ndo ta lo li siɔ ye ma ko, lo kpi ndo so songɔ asiɔ azi, wadila ĩ ti azi tɛ Nzapa.”​—1 Pɛtro 3:18.

2. Nzɔ̃ sulu mɛ kwá tɛ Yezo na hɛ̃ngɔ azi na bi mɛ na gangɔ nɛ?

Yehova tondó Yezo ge lɛ sese ya lo hɛ̃ dungɔ lɛ ngɛ̃́ tɛ lo ti lengbingɔ na lo tɛ azi ya “se zo aye lo tɛ [Yezo] ko, ta lo kpi ma, ko lo lua du ti kaka.” (Yoanɛ 3:16) Na lége ti tɔ̃ngɔ tɛ Yezo ko, Yehova na hãngɔ asiɔ lo zu mɛ kɛ̃ngɔ nyɔ tɛ Adamu asi na ni. Afa ya, se e du na loyengɔ na ndo tɔ̃ngɔ tɛ Yezo ko, e na luangɔ lége ti dungɔ na dungɔ lɛ ngɛ̃́ bwai na bwai ge lɛ sese mɛ na tingɔ Paradizo!​—Yisaya 65:21-23.

 GI HĨNGANGƆ LO MƐNDƐ̃

3. Kwá tɛ Yezo a tɔ̃ e ka gbɛ mbɛ ti siɔ kpale nga na kwá

1. Adamu ndó zo ti lengbingɔ, na ngoi mɛndó lo kɛ̃ tɔndɔngɔ Nzapa ko, lo ziandó hɛ̃ e siɔ kpale nga na kwá

2. Yezo dundó zo ti lengbingɔ, na lo mɛ ya lo tɔndɔndó Nzapa ko, lo hɛ̃ e nzɔ̃ dangɔ bɛ ti singɔ ka gbɛ mbɛ ti zangangɔ lengbingɔ nga na dangɔ bɛ ti dungɔ lɛ ngɛ̃́ ti bwai na bwai

4. Kwá tɛ Yezo alengbi ti hɛ̃ngɔ azi zu nzɔ̃ lo

 5. Tɔ̃ngɔ adu ye mɛ Nzapa hɛ̃ e gɛgɛrɛ

Akwa Yehova ndo hũ ya tɔ̃ngɔ du nzɔ̃ ye mɛ Yehova hɛ̃ zo na zo gɛgɛrɛ. Di Galatia 2:20, wa na pɛni hɛ̃ gbinya ti hũnda olo mɛ:

• Ye mɛ ndo fa ya toma Polo ndo hũndó ya tɔ̃ngɔ du nzɔ̃ ye mɛ Nzapa ahɛ̃ lo nɛ?

Na ngoi mɛndó Adamu li siɔ kpale ko a hɛ̃ndó lo na atara lo zu tumbu ti kwá. Kanda Yehova hɛ̃ndó Nyi lo ya lo kpi na lo tɛ e ti nɛngɔ ya e lua lége ti sepalangɔ na dungɔ lɛ ngɛ̃́ ti bwai na bwai.

Na ngoi mɛ mɔ ndo di avɛrsɛ mɛ ko, da bɛ mɔ na se mɛndó Yehova ma na tɛrɛ lo na ngoi mɛndó Nyi lo ndo hũ pɛnɔ. Di Yoanɛ 19:1-7, 16-18, wa na pɛni hɛ̃ gbinya ti hũnda olo mɛ:

• Ngoi mɛ mɔ ndo da bɛ mɔ na lo ti aye mɛ Yehova na Yezo li na lo tɛ mɔ, mɔ ndo ma tɛrɛ mɔ ngasia?

 NA NDUNU NI

Kwá tɛ Yezo li ya Yehova ka lɛ lo ndo siɔ kpale tɛ e wa ni li nga ya e ti na nzɔ̃ dangɔ bɛ ti luangɔ dungɔ lɛ ngɛ̃́ ti bwai na bwai.

Bozongeli

• Nda mɛndó Yezo kpi nɛ?

• Ngasia la dungɔ lɛ ngɛ̃́ tɛ Yezo ti lengbingɔ alengbindó ti tɔ̃ngɔ azi zu nɛ?

• Nzɔ̃ lo mɛ kwá tɛ Yezo hɛ̃ mɔ nɛ?