FAKAAKOAGA 27
Maeke Fēfē e Mate ha Iesu ke Fakamoui a Tautolu?
Kua agahala, matematekelea, mo e mamate a tautolu ha kua nakai omaoma e hoa uluaki ko Atamu mo Eva ke he Atua. a Ka e nakai tiaki noa a tautolu. Kua foaki e Iehova e puhala ke fakahao a tautolu mai he malaia he agahala mo e mate, puhala he haana Tama ko Iesu Keriso. Fakaako he Tohi Tapu ko e mate ha Iesu ne foaki e lukutoto. Ko e lukutoto ko e totogi ne foaki ke fakatokanoa e tagata. Ko e totogi ne foaki e Iesu ko e haana moui mitaki katoatoa. (Totou Mataio 20:28.) He makai a Iesu ke foaki e tonuhia ke moui tukulagi he lalolagi, ne hafagi e ia e puhala ma tautolu ke liu moua e tau mena oti ne galo e Atamu mo Eva. Fakakite foki e Iesu e lahi he fakaalofa haana mo Iehova ki a tautolu. To lagomatai he fakaakoaga nei ke fakahokulo e loto fakaaue haau ke he mate ha Iesu.
1. Aoga fēfē a tautolu mogonei he mate ha Iesu?
Ha ko e tau tagata agahala a tautolu, loga e mena ne taute e tautolu kua nakai fakafiafia a Iehova. Ka e maeke a tautolu ke fakatokihala mooli he tau agahala ha tautolu ti ole ki a Iehova puhala ia Iesu Keriso ke fakamagalo mai ti ka eketaha a tautolu ke ua liu taute e tau hehē ia, to tata e fakafetuiaga kapitiga ha tautolu mo e Atua. (1 Ioane 2:1) Pehē e Tohi Tapu: “Ha ko Keriso foki, lagataha ne mamahi ai a ia ha ko e tau hala, ko e tututonu ko e hukui he tau tagata nakai tututonu, kia takitaki e ia a tautolu ke he Atua.”—1 Peteru 3:18.
2. He vahā i mua, aoga fēfē a tautolu he mate ha Iesu?
Fakafano mai e Iehova a Iesu ke foaki e moui mitaki katoatoa haana “kia nakai mate taha ne tua kia [Iesu], ka kia moua e ia e moui tukulagi.” (Ioane 3:16) Fakaaue ke he mena ne taute e Iesu, to nakai leva ti utakehe e Iehova e tau mena kelea oti ne tutupu mai he nakai omaoma ha Atamu. Kakano e mena nei ka fakagahuahua e tua ha tautolu ke he poa ha Iesu, to moua e tautolu e magaaho ke momoui tukulagi he lalolagi parataiso!—Isaia 65:21-23.
KUMIKUMI FAKAHOKULO
Fakahokulo e maama haau ke he kakano ne foaki e Iesu e moui, ti manamanatu ke he puhala kua aoga ki a koe.
3. Fakatokanoa he mate ha Iesu mai he agahala mo e mate
Tā e VITIŌ, ti tutala ke he hūhū nā.
-
Ko e heigoa ne galo ia Atamu he magaaho ne nakai omaoma a ia ke he Atua?
Totou Roma 5:12, ti tutala ke he hūhū nei:
-
Lauia fēfē e moui haau ha ko e agahala ha Atamu?
Totou Ioane 3:16, ti tutala ke he hūhū nei:
-
Ko e ha ne fakafano mai e Iehova e Tama haana ke he lalolagi?
-
Atamu ko e tagata mitaki katoatoa ne nakai omaoma ke he Atua ti tuku e tau tagata ke he agahala ti mamate
-
Iesu ko e tagata mitaki katoatoa ne omaoma ke he Atua ti takitaki e tau tagata ke mitaki katoatoa mo e moui tukulagi
4. Maeke e mate ha Iesu ke aoga e tau tagata oti
Tā e VITIŌ, ti tutala ke he hūhū nā.
-
Maeke fēfē e mate he taha e tagata ke aoga e tau tagata oti?
Totou 1 Timoteo 2:5, 6, ti tutala ke he hūhū nei:
-
Ko Atamu ko e tagata mitaki katoatoa ka e tuku e ia e tau tagata ke he agahala ti mamate. Ko e tagata mitaki katoatoa foki a Iesu. Puhala fe ne foaki e ia e “lukutoto” ne tatai?
5. Ko e lukutoto ko e mena fakaalofa ha Iehova ki a koe
Onoono e tau kapitiga ha Iehova ke he lukutoto ko e mena fakaalofa ki a lautolu. Ma e fakatai, totou Kalatia 2:20, ti tutala ke he hūhū nei:
-
Fakakite fēfē he aposetolo ko Paulo kua onoono a ia ke he lukutoto ko e mena fakaalofa ki a ia?
Magaaho ne agahala a Atamu, ko ia mo e tau fanau oti haana ne fakahala ke mamate. Ka e fakafano mai e Iehova e Tama haana ke mate ke maeke a koe ke moua e moui tukulagi.
He totou e koe e tau kupu tohi nā, manamanatu ke he logonaaga ha Iehova he mamahi e Tama haana. Totou Ioane 19:1-7, 16-18, ti tutala ke he hūhū nei:
-
Fēfē e logonaaga haau ke he mena ne taute e Iehova mo Iesu ma haau?
KA HŪHŪ TAHA TAGATA: “Maeke fēfē e tagata tokotaha ke mate ma e tau tagata oti kana?”
-
To fēfē e tali haau?
MANATU KATOA
Foaki he mate ha Iesu e fakavēaga ma Iehova ke fakamagalo e tau agahala ha tautolu, ati moua e tautolu e magaaho ke momoui tukulagi.
Liu Fakamanatu
-
Ko e ha ne mate a Iesu?
-
Puhala fe he moui mitaki katoatoa ha Iesu ne tatai ke he lukutoto?
-
Aoga fēfē a koe he mate ha Iesu?
KUMI FOKI
Fakaako ke he kakano ne fakahigoa e moui mitaki katoatoa ha Iesu ko e lukutoto.
“Puhala Fe he Poa ha Iesu ‘ko e Lukutoto ma e Tau Tagata Tokologa’?” (Vala tala he kupega hila)
Kumikumi ke he mena kua lata a tautolu ke taute ke moua e fakamouiaga.
Maeke nakai a Iehova ke fakamagalo foki e tau agahala kelea lahi?
“Tau Hūhū Tohi Tapu kua Tali” (Ko e Kolo Toko, Iulai-Aokuso 2013)
Totou ke iloa e puhala ne lagomatai he poa he Keriso e taha tagata ke hiki e mahani haana.
“Nakai Liu Au ke Fakatupa ke he Vale” (Vala tala he kupega hila)
a Nakai agahala ni ha kua taute he taha mena kelea. Kua agahala foki he hihiga pauaki ke he tau mena kelea ha ko e mena tutupu mai a tautolu ia Atamu mo Eva.