27 NUENƆ
Bu Mɛ Sīdee Na Luh Jizɔs I Dap Kpɔā A?
I si pɔrɔ, tɔga, sa u nyɔɔbee Adam le Iv alu i tua tɛ le ka bee lɛɛbeekɛɛ̄ Bari. a Mɛ i ɛrɛ bɛābu. Jɛhova enɛa i bɛābu kɔ elu e’agara i lɛɛ bu pɔrɔ le luh tɛ̄maloo ye Nwiīnɛɛdam Jizɔs Kraist. Baibol tɔgɛ kɔ Jizɔs bee i agara tɛ̄maloo ye luh. A’agara na nu alu ekpɛ lokwa alu e’iye ziī nɛɛ. Nu Jizɔs bee kpɛ na ye dum a mmana a si gbɛnɛ du. (Buū Matiu 20:28.) Sɔ̄ Jizɔs aa ye dɔ lokwa i dap ɛrɛ dum a naatah a kɛnɛkɛ̄ mmɛ deedee, a kpaāna dee i nɛ lo esikɛ̄ ɛrɛ dɛ̄dɛɛ̄ nu Adam le Iv bee peere. Jizɔs bee tɔgɛnage kɛ̄ alɛ le Jɛhova i wereloo doo. Ekobee ue ama eyerebah i nɛ kɔ i agɛrɛbah tɔgɛ nia loo luh Jizɔs.
1. Luh Jizɔs dap i dɔbiī nɛ doodoo wa anii’ee?
Nyɔɔbee i lu pya pɔrɔ a, i doo gbɛnɛ-edo nu a naa nia Jɛhova. Kerewo, lo i ɛrɛ ekiɛ̄nu sɔ̄ i si pɔrɔ sa bara kɔ Jɛhova a aaloo i nɛ tɛ̄maloo Jizɔs Kraist sa ii sina pya lo pɔrɔ, i ɛrɛ kaāna gbanialoo kiikɛ̄ Bari le. (1 Jɔn 2:1) Baibol kɔ: “Kraist bee unage nyɔɔ pɔrɔ ziī sɔ̄ loo dɛ̄dɛɛ̄ nɛɛ, nɛɛ kaāna dogo nyɔɔ pya pɔrɔ dogo, lokwa a i su nua loo Bari.”—1 Pita 3:18.
2. I ɛrɛ biī aāloo luh Jizɔs doodoo wa li deesī?
Jɛhova bee yere Jizɔs kɔ a nɛ ye dum a mmana “lokwa ɛrɛgeba nɛɛ a . . . yira nɛ [Jizɔs] naale epe mɛ a e’ɛrɛ dum a naa tah.” (Jɔn 3:16) Bu i ɛɛ loo nu Jizɔs doo, sɔ̄ sɔ̄ naa binia Jɛhova elɛɛ dɛ̄dɛɛ̄ pɔrɔ pɔrɔ nu a sira aaloo lɛɛbeekɛɛ̄ Adam. Lo ama kura kɔ lo i ɛrɛ yira bu waara zɔɔ Jizɔs, dee ekpaā i nɛ lo e’ɛrɛ ekpeloo dum bu paradais a kɛnɛkɛ̄ mmɛ deedee!—Aisaia 65:21-23.
NƆ YERELOO
Nyimɛ o edaābeeloo kiiloo nu anua Jizɔs nɛ ye dum, sa o kɛɛrɛbu loo kɛ̄ a a dɔbiī nɛ doo.
3. Luh Jizɔs agara i lɛɛ bu pɔrɔ le luh
Bira lo VIDIO, lɛɛ o agara ebip a nyɔɔnɛ ama.
-
Amunu lenu na Adam bee peere sɔ̄ a lɛɛbeekɛɛ̄ Bari a?
Buū Pya Rom 5:12, lɛɛ o agara ebip ama:
-
Pɔrɔ Adam bee si e’ɛrɛ pah nyɔɔ o dum doodoo wa?
Buū Jɔn 3:16, lɛɛ o agara ebip ama:
-
Ena anua Jɛhova bee yere ye Nwiīnɛɛdam nua a kɛnɛkɛ̄ a?
-
Adam bee mmana, mɛ ye lɛɛbeekɛɛ̄ bee su pɔrɔ le luh nua nyɔɔ pya nɛɛ
-
Jizɔs bee mmana sa gbaɛ̄tɔ̄loo Bari lo edoo kɔ pya nɛɛ a mmana sa tɔɔ̄dum mmɛ deedee
4. Luh Jizɔs dap dɔbiī nɛ dɛ̄dɛɛ̄ nɛɛ
Bira lo VIDIO, lɛɛ o agara ebip a nyɔɔnɛ ama.
-
Luh ziī nɛɛ edɔbiī nɛ dɛ̄dɛɛ̄ nɛɛ doodoo wa?
Buū 1 Timɔti 2:5, 6, lɛɛ o agara ebip ama:
-
Adam bee mmana, mɛ pɔrɔ a bee si doo kɔ pya nɛɛ a si pɔrɔ sa u. Jizɔs bee lenage nɛɛ a mmana. Bu mɛ sīdee na Jizɔs bee ‘agara dɛ̄dɛɛ̄ nɛɛ’ a?
5. A’agara lu dɔɔ̄nu Jɛhova a nɛ
Ziī ziī pya gbo Jɛhova ɛp dɔɔ̄nu a’agara doodoo nu Jɛhova wa nɛ. Bu edoba, buū Pya Galetia 2:20, lɛɛ o agara ebip ama:
-
Bu mɛ sīdee na nɛɛ lɛɛratam Pɔɔl tɔgɛ kɔ a ɛbe a’agara nua dɔɔ̄nu Jɛhova ye nɛe a?
Sɔ̄ Adam esia pɔrɔ sah, bee lu ebiaɛ luh nɛ pya ye manamana le ɛɛ. Mɛ Jɛhova bee yere ye Nwiīnɛɛdam kɔ a u lokwa o dap tɔɔ̄dum ina deedee.
Kuma sɔ̄ o gaa buū pya dɔ ama, kɛɛrɛ kɛ̄ a bee tɔɔ̄loo Jɛhova doo sɔ̄ ye Nwiīnɛɛdam aa tɔga. Buū Jɔn 19:1-7, 16-18, lɛɛ o agara ebip ama:
-
Nu Jɛhova le Jizɔs a doo nɛ tɔɔ̄ a loo doodoo wa?
ZIĪ NƐƐ DAP BIP KƆ: “Ziī nɛɛ edap u bee dɛ̄dɛɛ̄ nɛɛ doodoo wa?”
-
O agara doodoo wa?
TƐƐ̄NYƆƆ
Luh Jizɔs doo kɔ Jɛhova a dap aaloo i pɔrɔ i nɛ, sa i nɛ dee lo e’ɛrɛ ekpeloo dum mmɛ deedee.
Ebip Tɛ̄ma Nyɔɔ
-
E na anua Jizɔs bee u a?
-
Bu amunu sīdee na dum Jizɔs a mmana bɔloo a’agara a?
-
Luh Jizɔs dap a dɔbiī nɛ doodoo wa?
GBĪTƐ̄ NU
Nɔ nu anua alu esu dum Jizɔs a mmana kure nu a’agara.
“Waara Zɔɔ Jizɔs Lu ‘A’agara Nɛ Booboo Nɛɛ’ Doodoo Wa?” (Ekobee ue a le nyɔɔ intanɛt)
Gbītɛ̄ nu alu ebɛɛ̄ kɔ i doo lokwa i ɛrɛ kpɔā.
“Bu Mɛ Sīdee Na Jizɔs Kpɔā Nɛɛ A?” (Ekobee ue a le nyɔɔ intanɛt)
Jɛhova dapge aaloo gbɛnɛ pɔrɔ ni?
““Pya Ebip A Dɛɛa Nyɔɔ Baibol Alu E’agara” (The Watchtower, May 1, 2013)
Ɛp kɛ̄ nɔnu akiiloo waara zɔɔ Kraist yerebah nɛ ziī gbara kɔ a nyaana ye sīdee tɔɔ̄dum doo.
a Pɔrɔ naale aba sɔ̄ alu edoo nu a bee piya. Mɛ pɔrɔ lunage kɛ̄tɔɔ̄ egbea alu e’ɛrɛ aābah i tua tɛ le ka.
