Ọwan e ruẹ ọdandan, a rioja, jeghwai hwuẹ, fọkime ituakpọ erukaro na, nọyẹ, Adam ọrhẹ Eve, i tiẹn uvwele Osolobrugwẹ. a Ọrẹn, e vwo ifiẹrorhọ. Jehova o mwuegbe izede ro no simi ọwan nẹ ọdandan ọrhẹ uhwu, nyoma Ọmọyen, Jesu Kristi. Baibol na o yonirin ọwan taghene i Jesu ọ kwa otan na nyoma uhwu ọnẹyen. Otan, osa ra kwa ne tiobọnu ohworho. Osa ri Jesu ọ kware yẹ, arhọ ọgbagba ọnẹyen rọ ghanranren omamọ. (Se Matthew 20:28.) Ọke i Jesu ọ ha arhọ i bẹmẹdẹ ọnẹyen kpahontọre rẹn ọwan ọke rọ ha uvuẹn otọrakpọ na, no rhiẹ izede na firhọ ra na rharhumu vwo ọsoso oborẹ Adam ọrhẹ Eve i kpare fughwẹ. Jesu o dje oborẹ ọye ọrhẹ i Jehova i vwo ẹguọlọ kpahen ọwan te. Uyono ọnana ọnọ ha userhumu rẹn ọwan dje ọdaremẹro phia kpahen uhwu i Jesu.

1. Marhẹ ene ru mẹrẹn erere nẹ uhwu i Jesu inyenana?

Fọkime ọwan iruedandan, ne ruẹ ekwakwa buebun ra lẹrhẹ i Jehova tuekwẹre. Ọrẹn, orhianẹ ọdandan re ruru ọ ghini da ọwan, arha rẹ i Jehova nọ harhomu ọwan nyoma i Jesu Kristi jeghwai damoma re ne je ru oborẹ ọsọre ghwomaran, ọwan ni ne vwo onyerẹnkugbe rọ kpẹnkpẹnren rhẹ Osolobrugwẹ. (1 John 2:1) Baibol na nọ tare: “Kristi o hwuru ukwọgbọ fọkiẹ edandan, ọvwata fọkiẹ eri vwe rhiẹ evwata, nọ sabu sun are bru Osolobrugwẹ.”—1 Peter 3:18.

2. Marhẹ uhwu i Jesu ono ru ha userhumu rẹn ọwan obaro na?

Jehova o dje i Jesu nọ ha arhọ ọgbagba ye kpahontọre “neneyo kohworho kohworho ro vwo esegburhomẹmro kpahiẹn [nọyẹ i Jesu] arha ghwọghiẹ-ẹ, no no vwo arhọ i bẹmẹdẹ.” (John 3:16) Oma ọmerhen ọwan kpahen oborẹ i Jesu o ruru, nime phẹrẹkpẹ, Jehova ọ samọ fiobarhọ ọsoso ekwakwa ibiobiomu ra mẹrẹn fọkime Adam ọ tiẹn uvwele yi. Ọnana o mevirhọ taghene erhe vwo esegburhomẹmro kpahen izobo i Jesu, ne ne vwo uphẹn ra na riamerhen akpenyerẹn bẹmẹdẹ uvuẹn i paradais ro no rhirhiẹ otọrakpọ na!—Isaiah 65:21-23.

 YONO KODO RHỌ

3. Uhwu i Jesu o ti rẹ ọwan nẹ ọdandan ọrhẹ uhwu

1. Adam ọhworhare rọ gbare rọ tiẹn uvwele Osolobrugwẹ, fọkiẹ ọnana, ituakpọ ne ruẹ ọdandan jeghwai hwuẹ

2. Jesu ọhworhare rọ gbare rọ ha uvwele Osolobrugwẹ, fọkiẹ ọnana, ituakpọ ni ne vwo arhọ rọ gbare, jeghwai nyerẹn bẹmẹdẹ

4. Ihworho ephian ina sabu mẹrẹn erere nẹ uhwu i Jesu

 5. Otan na ẹghẹlẹ i Jehova ọ ha wẹn

Igbehian i Jehova e ni otan na jerẹ ẹghẹlẹ ri Jehova ọ yẹrẹ aye. Jerẹ udje, se Galatians 2:20, orho ru, are i gba kpahenrhọ onọ ọnana:

• Marhẹ ọnyikọ Paul o ru djephia taghene o ni otan na jerẹ ẹghẹlẹ ra yẹriẹ?

Ọke Adam o ruẹ ọdandan, ne brorhiẹn uhwu kpe yi ọrhẹ ọsoso emọyen. Ọrẹn, Jehova o dje Ọmọyen no hwu neneyo a sabu vwo uphẹn ra na riamerhen akpenyerẹn bẹmẹdẹ.

Ọke we se eghwẹmro enana, gbe roro kpahen oborẹ oma o ruẹ i Jehova ọke rọ mẹrẹn Ọmọyen rọ rioja. Se John 19:1-7, 16-18, orho ru, are i gba kpahenrhọ onọ ọnana:

• Marhẹ oma o ruo kpahen oborẹ i Jehova ọrhẹ i Jesu i ru wẹn?

 ME WU YONORIN?

Nyoma uhwu i Jesu yi Jehova ọ harhomu edandan ọwan, ọnana yọ yẹrẹ ọwan uphẹn ra na riamerhen akpenyerẹn bẹmẹdẹ.

Ẹzẹkoko

• Mesoriẹ i Jesu o hwu?

• Marhẹ arhọ ọgbagba i Jesu o ru rhiẹ otan rọ gbare?

• Marhẹ uhwu i Jesu ono ru yọ erere?