E yeke sara siokpari, e yeke bâ pasi nga e yeke kui ndali ti so kozo koli na wali, Adam na Ève, ake lani yanga ti Nzapa. a Me e yeke na beku. Jéhovah aleke ti zi e na gbe ti ngbâa ti siokpari na kuâ na lege ti Molenge ti lo, Jésus Christ. Bible afa na e so na lege ti kuâ ti Jésus, lo futa mbeni ye ti zi azo. Jésus amû fini ti lo so ayeke mbilimbili-kue ti zi e na gbe ti siokpari na kuâ. (Diko Matthieu 20:28.) So Jésus ayeke mbilimbili-kue nga lo mä lakue yanga ti Jéhovah, lo lingbi lani ti ngbâ na fini lakue lakue na ndö ti sese. Ye oko, lo yeda ti kui ndali ti e ti zi lege na e ti kiri ti wara aye kue so Adam na Ève aperdre ni lani. Jésus afa nga tongana nyen la lo na Jéhovah aye e mingi. Ye ti manda so ayeke sara si mo kiri singila mingi ndali ti kuâ ti Jésus.

1. Kuâ ti Jésus apeut ti mû maboko na e laso tongana nyen?

So siokpari ayeke na terê ti e, e yeke sara aye mingi so anzere na Jéhovah ape. Ye oko, tongana e sara vundu biani ndali ti asiokpari ti e na e hunda Jéhovah ti pardonné e na lege ti Jésus Christ nga tongana e sara kue ti kiri ti sara afaute ni so ape, e peut ti ga akota kamarade ti Nzapa (1 Jean 2:1). Bible atene: “Christ akui gï fani oko biani biani awe tënë ti asiokpari, zo ti mbilimbili ndali ti azo so ayeke mbilimbili pëpe, si lo lingbi ti gue na ala na Nzapa.”—1 Pierre 3:18.

2. Kuâ ti Jésus apeut ti mû maboko na e na yâ ti angoi so ayeke ga tongana nyen?

Jéhovah atokua lani Jésus ti mû fini ti lo so ayeke mbilimbili-kue “si zo kue so amä na bê na [Jésus], a lingbi ti futi lo pëpe, me lo yeke na fini ti lakue lakue.” (Jean 3:16). Grâce na ye so Jésus asara, fafadeso Jéhovah ayeke zi asioni ye kue so kengo yanga ti Adam aga na ni. So aye ti tene tongana e mä na bê na sandaga ti Jésus, e yeke wara lege ti duti na fini lakue lakue na yâ ti Paradis na ndö ti sese.—Ésaïe 65:21-23.

 GI TI HINGA AYE MINGI

3. Kuâ ti Jésus azi e na gbe ti siokpari na kuâ

1. Adam ayeke lani zo so ayeke mbilimbili-kue so ake yanga ti Nzapa, ndani la azo ayeke sara siokpari nga ala yeke kui

2. Jésus ayeke lani zo so ayeke mbilimbili-kue so amä yanga ti Nzapa na lo sara si azo ayeke ga ande mbilimbili-kue nga ala yeke ngbâ ande na fini lakue lakue

4. Kuâ ti Jésus apeut ti mû maboko na azo kue

 5. Ye so a futa ti zi azo ayeke cadeau so Jéhovah amû na mo

Akamarade ti Jéhovah abâ ye so a futa ti zi azo tongana cadeau so lo mû na ala. Na tapande, diko aGalate 2:20, na pekoni kiri tënë na hunda so:

• Tongana nyen la bazengele Paul afa so lo bâ ye so a futa ti zi azo tongana cadeau so a mû na lo?

Na ngoi so Adam asara siokpari, a dë ngbanga ti kuâ na li ti lo na ahale ti lo kue. Me Jéhovah atokua Molenge ti lo ti kui tongaso si mo peut ti duti na fini lakue lakue.

Na ngoi so mo yeke diko aversê so ayeke na gbe ni ge, imaginé tongana nyen la a doit lani ti son Jéhovah mingi na ngoi so Molenge ti lo ayeke bâ pasi. Diko Jean 19:1-7, 16-18, na pekoni kiri tënë na hunda so:

• Ye so Jéhovah na Jésus asara ndali ti mo asara mo tongana nyen?

 NA NDURU TËNË

Kuâ ti Jésus amû lege na Jéhovah ti pardonné asiokpari ti e, nga a mû lege na e ti ngbâ na fini lakue lakue.

Dango bê

• Jésus akui lani ngbanga ti nyen?

• Na lege wa la fini ti Jésus so ayeke mbilimbili-kue ayeke mbeni ye so alingbi na ni so a futa ti zi azo?

• Tongana nyen la mo peut ti bâ nzoni na lege ti kuâ ti Jésus?