ROSO 27
Yesuusi Reyo Gatissannonkehu Hiittoonniiti?
Cubbaataamma ikkinoommohu, qarrammeemmohunna reyineemmohu umi manni Addaaminna Heewani Maganoho hajajama giwino daafiraati. a Kayinni hexxo dinonke yaa diˈˈikkino. Cubbunninna reyotenni ganteemmo gede, Yihowa Beettosi Yesuusi Kiristoosi ninke daafira reyara uullara soyino. Qullaawu Maxaafi, Yesuusi reyo wodo ikkitinonketa kulanno. Wodo mitto mancho keere fushshate baantanni waagaati. Yesuusi ninkera yee baatino waagi, guuta mancho ikke heeˈranno heeshshooti. (Maatewoosi 20:28 nabbawi.) Yesuusi uullate aana guuta mancho ikke ilamino daafira, uullate aana hegerera heeˈrate qoosso noosi. Ikkollana, isi hattee qoossosi umisi fajjonni facci asse agure, Addaaminna Heewaninni kainohunni hoongoommore baalankare wirro afiˈneemmo gede doogo faninonke. Yesuusi assinori isinna Yihowa mageeshshi geeshsha baxxannonkero leellishanno. Kuni rosi Yesuusi reyora noohe galati lexxanno gede kaaˈlannohe.
1. Yesuusi reyo xaa yannara kaaˈlitannonkehu hiittoonniiti?
Cubbaataamma ikkinoommo daafira, Yihowa dadillisannoha lowo coye assineemmo. Ikkollana, cubbinkera addinta gaabbinummoro, Yihowa Yesuusi Kiristoosi widoonni gatona yaannonke gede huucciˈnummoronna loonsoommo soˈro lende loonseemmokki gede dandaaminkere baala assineemmoha ikkiro, Maganu jaalla ikkine heeˈra dandiineemmo. (1 Yohaannisi 2:1) Qullaawu Maxaafi togo yaanno: “Kiristoosino ninke Maganunniwa shiqishara yee, keeraancho ikke heeˈrenni, keeraanchimma afiˈnoommokkirira cubbinkenni kainohunni mitte hige qarra adhe reyino.”—1 Pheexiroosi 3:18.
2. Yesuusi reyo albillitte kaaˈlitannonkehu hiittoonniiti?
Yihowa, Yesuusi guuta mancho ikke heeˈranno heeshshosi sayise aanno gede soyino; isi hatto assinohu Yesuusa “ammaˈninohu baalu hegere heeshsho afiˈranno gede ikkinnina baˈˈannokki [gedeeti].” (Yohaannisi 3:16) Yesuusi wodo ikkinonke daafira, Yihowa muli yannara Addaami finqille abbitinoha busha coye baalanka hunanno. Hatto yaa, Yesuusi wodo ammanneemmota leellinsheemmoha ikkiro, uullate aana gannatete hegerera hagiidhinanni heeˈra dandiineemmo yaate!—Isayaasi 65:21-23.
LEDDE XIINXALLI
Yesuusi heeshshosi sayise uyinohu mayiraatironna tini atera kaaˈlitannohehu hiittoonniitiro ledde rosi.
3. Yesuusi reyo cubbunna reyotewiinni keere fushshitannonke
VIIDIYO laˈe; hakkiinni aante noo xaˈmo hasaabbe.
-
Addaami cubbo loosi woyite mayi faro huˈnino?
Roomu Sokka 5:12 nabbabbe; hakkiinni aante noo xaˈmo hasaabbe:
-
Addaami loosino cubbi ate gawajjinohehu hiittoonniiti?
Yohaannisi 3:16 nabbabbe; hakkiinni aante noo xaˈmo hasaabbe:
-
Yihowa Beettosi uullara soyinohu mayiraati?
-
Addaami umo guuta manchooti; hakkiinni Maganoho hajajama giwino; isinni kainohunni mannu ooso cubbaataamma ikkitino daafira reyitanno
-
Yesuusino guuta manchooti; isi kayinni Maganoho hajajamino; isi widoonni mannu ooso guuta ikkite hegerera heedhanno faro afidhino
4. Yesuusi reyo mannu baalunkura kaaˈlitannote
VIIDIYO laˈe; hakkiinni aante noo xaˈmo hasaabbe.
-
Mittu manchi reyo manna baalaho kaaˈlitannohu hiittoonniiti?
Umi Ximootewoosi 2:5, 6 nabbabbe; hakkiinni aante noo xaˈmo hasaabbe:
-
Addaami guuta mancho ikkirono, cubbo loosino; hakko daafira mannu baalunku cubbaataamonna reyannoha ikkino. Yesuusino uullate aana noo yannara guuta manchooti. Yesuusi kakkalo assino heeshsho cubbunninna reyotenni gatissannonkehu hiittoonniiti?
5. Wodo Yihowa atera uyinohe eltooti
Yihowa jaalla, wodo insara addinni uyinoonninsa elto gede assite laˈanno. Galatiyu Sokka 2:20 nabbabbe; hakkiinni aante noo xaˈmo hasaabbe:
-
Soqqamaasinchu Phaawuloosi wodo isira addinni uyinoonni elto gede asse laˈˈannota coyiˈrinohu hiittoonniiti?
Addaami cubbo loosita, isinna sirchisi baalunku reyitannore ikkitino. Ikkollana, hegerera hagiidhitanni heeˈra dandaatto gede, Yihowa Beettosi ate daafira reyanno gede soyino.
Aane noo qummeeshsha nabbawatto woyite, Yihowa Beettisi shete reyi woyite mageeshshi geeshsha xissiisiˈrinoro hedate woˈnaali. Yohaannisi 19:1-7, 16-18 nabbabbe; hakkiinni aante noo xaˈmo hasaabbe:
-
Yihowanna Yesuusi assitinohere hedatto woyite mayyaatto?
MITU MANNI TOGO YEE XAˈMARA DANDAANNO: “Mittu manchi manna baala hiitto asse gatisara dandaanno?”
-
Ati tennera mayite qolatto?
XAPHISHSHA
Yesuusi reyinonke daafira, Yihowa cubbonke gatona yaa dandaanno; qoleno hegere heeshsho ragiˈra dandiineemmo.
Kageeshsha Rosoottore
-
Yesuusi reyinohu mayiraati?
-
Yesuusi kakkalo assino heeshsho cubbunninna reyotenni gatissannonkehu hiittoonniiti?
-
Yesuusi reyo kaaˈlitannohehu hiittoonniiti?
EGENNO LEXXI
Yesuusita guuta heeshsho wodote yinoonnihu mayiraatiro rosi.
“Yesuusi Kakkalo ‘Lowo Mannira Wodo’ Ikkitinohu Hiittoonniiti?” (Webisayitenkera fultino borro)
Gato afiˈrate maa assa hasiissannonke?
“Yesuusi Gatisannonkehu Hiittoonniiti?” (Webisayitenkera fultino borro)
Yihowa jawa cubbono gatona yaanno?
“Qullaawu Maxaafi Xaˈmonna Dawaro” (Agarooshshu Shae, Onkoleessa 1, 2013)
Mittu manchi Kiristoosi wodo daafira rosasi akatasi biddi assiˈranno gede kaaˈlitinosi gara wodanchi.
“Xaate Finqillete Borojjicho Diˈˈikkoommo” (Webisayitenkera fultino borro)
a Cubboho yaa bushare assa calla diˈˈikkitino. Addaaminna Heewaniwiinni cubbo ragiˈnoommo daafira, bushare assate widira hingeno dooˈnoommoreeti yaate.
Kurino Lai
DUUCHU MANNI XAˈMANNO XAˈMO
Yihowa Farciˈraasine Qullaawa Maxaafa Xiinxallissannohu Hiittoonniiti?
Yihowa Farciˈraasine ledo Qullaawa Maxaafa woxe baaxxittokkinni xiinxallatto woyite, baxoottota Qullaawu Maxaafi tiro horoonsiˈra dandaatto. Xiinxallokkira maatekki gudisse woy jaallakki koyisa dandaatto.
