LES 27

Fa a dede fu Yesus e frulusu wi?

PREI

Wi e sondu, wi e pina èn wi e dede fu di den fosi libisma, Adam nanga Eva, trangayesi Gado. a Ma toku howpu de gi wi. Yehovah seni en Manpikin, Yesus Krestes, fu kon dede gi wi so taki wi kan kon fri fu sondu nanga dede. Bijbel e leri wi taki a dede fu Yesus na wan lusu-paiman. Wan lusu-paiman na a moni di wan sma e pai fu meki wan sma kon fri. Yesus no pai nanga moni, ma a gi en libi fu frulusu libisma. (Leisi Mateyus 20:28.) Fu di Yesus no ben abi sondu meki a ben abi a reti fu libi fu têgo na grontapu. Ma a ben de klariklari fu dede gi wi, so taki wi kan kisi ala sani baka di Adam nanga Eva lasi. Yesus sori tu o furu en nanga Yehovah lobi wi. A les disi o yepi yu fu kisi moro warderi gi a dede fu Yesus.

1. Fa a dede fu Yesus e tyari wini gi wi na ini a ten disi?

Fu di wi na sondusma meki wi e du furu sani di Yehovah no lobi. Ma toku wi kan de bun mati fu Gado. Efu wi wani de mati fu Yehovah, dan wi musu sari fu den sondu di wi du, wi musu aksi Yehovah na ini a nen fu Yesus fu gi wi pardon èn wi musu du ala san wi man fu no meki den srefi fowtu baka (1 Yohanes 2:1). Bijbel e taki: „Krestes srefi di ben de wan reti-ati sma, dede wán leisi nomo gi sma di no bun èn a frulusu den fu den sondu fu den. Na so a tyari unu go na Gado.”—1 Petrus 3:18.

2. Fa a dede fu Yesus o tyari wini gi wi na ini a ten di e kon?

Yehovah seni Yesus kon fu dede gi wi „so taki ala sma di e bribi na ini [Yesus] no sa dede, ma sa kisi têgo libi” (Yohanes 3:16). Fu di Yesus du a sani disi meki Yehovah o tyari wan kaba kon na ala den ogri di miti wi fu di Adam trangayesi en. Disi wani taki dati efu wi e bribi na ini a lusu-paiman fu Yesus, wi o man libi fu têgo na ini wan paradijs na grontapu!—Yesaya 65:21-23.

SORTU TRA SANI YU KAN LERI?

Wi o taki fu tra sani di o yepi yu fu frustan moro bun fu san ede Yesus dede gi wi èn sortu wini dati e tyari kon gi yu.

3. A dede fu Yesus e frulusu wi fu sondu nanga dede

Prei a FELEM èn taki fu na aksi disi:

FELEM: Fu san ede Yesus dede?—Pisi 1 (2:01)

San Adam lasi di a trangayesi Gado?

Leisi Romesma 5:12 èn taki fu na aksi disi:

San a sondu fu Adam du nanga yu?

Leisi Yohanes 3:16 èn taki fu na aksi disi:

Fu san ede Yehovah seni en Manpikin kon na grontapu?

Adam no ben abi sondu, ma fu di a trangayesi Gado meki a tyari sondu nanga dede kon gi libisma
Yesus no ben abi sondu. Fu di a gi yesi na Gado meki libisma man kon fri fu sondu èn den kan kisi têgo libi

4. Ala sma kan kisi wini fu a dede fu Yesus

Prei a FELEM èn taki fu na aksi disi:

FELEM: Fu san ede Yesus dede?—Pisi 2 (2:00)

Fa a dede fu wán man kan tyari wini kon gi ala sma?

Leisi 1 Timoteyus 2:5, 6 èn taki fu den aksi disi:

Adam no ben abi sondu, ma fu di a trangayesi Gado meki ala sma kisi sondu èn den e dede. Neleki Adam, Yesus no ben abi sondu. Fu san ede a dede fu Yesus ben de „wan paiman di fiti fu bai ala sma kon fri”? Fa dati tyari wini kon gi wi?

5. A lusu-paiman na wan kado di Yehovah gi yu

Den mati fu Yehovah e si a lusu-paiman leki wan kado di a gi den. Leisi Galasiasma 2:20 èn taki fu na aksi disi:

Sortu sani di na apostel Paulus taki e sori taki a ben si a lusu-paiman leki wan kado di Gado gi en?

Di Adam sondu a tyari dede kon gi ensrefi èn gi ala den bakapikin fu en. Ma Yehovah seni en Manpikin kon fu dede gi yu so taki yu kan kisi têgo libi.

Te yu e leisi a Bijbeltekst disi, dan prakseri fa Yehovah ben firi di a ben si fa en Manpikin ben pina. Leisi Yohanes 19:1-7, 16-18. Baka dati taki fu na aksi disi: