PĚNGANGĚNDUNGANG 27
Kerea Papateng Yesus Botonge Makasal᷊amatẹ̌ si Kitẹ?
I kitẹ nakoạ taumata marosa, nasigěsạ, dingangu mate ual᷊ingu taumata humotong, i Adam dingangi Hawa, tawe timuhụ su Mawu. * Katewe, situasing i kitẹ tawe kerene turusẹ̌. Yehuwa seng něnadia ral᷊eng gunang měnal᷊amatẹ̌ si kitẹ bọu dosa dingangu papate limiung Ahus’E, i Yesus Kristus. Alkitapẹ̌ něněntiro limiung papatene, i Yesus něnadia tatěbusẹ̌. Tatěbusẹ̌ kai arěga niwaehẹ̌ gunang mapakawebasẹ̌ taumata. I Yesus něnadia tatěbusẹ̌ su tempong i sie něgělị pěbawiahe nasukụ. (Basa Matius 20:28.) Su tempong i Yesus němile gunang tawe měbiahẹ̌ kěkalẹ̌ su dunia, i sie němuka ral᷊eng si kitẹ tadeạu saụ makaěbạ apa seng nipakailang karạ i Adam dingangi Hawa. Yesus lai něnodẹ i sie dingangi Yehuwa sěbạe makěndagẹ̌ si kitẹ. Pěngangěndungang ini sarung makatul᷊ung si kau limembong měngarěga papateng i Yesus.
1. Kerea i kitẹ makaěbạ gunane bọu papateng i Yesus orasẹ̌ ini?
Ual᷊ingu i kitẹ marosa, i kitẹ někoạ lawọ hal᷊ẹ̌ nakatědụ naung i Yehuwa. Katewe, mạeng i kitẹ kahěngang-hěngang mẹ̌tobatẹ̌, mẹ̌dorong ampung si Yehuwa lumiung Yesus Kristus, dingangu mẹ̌tawakal᷊i tawe saụ měkoạ pẹ̌sasal᷊a ene, i kitẹ sarung mědal᷊ahapị mapia dingangu Mawu. (1 Yohanes 2:1) Alkitapẹ̌ naul᷊ị, ”Kristus, tau nihino, nate gunang taumata tawe nihino” tadeạu ”měngahạ si kamene sarang Mawu”.—1 Petrus 3:18.
2. Su tempo mahi, kerea i kitẹ botonge makaěbạ gunane bọu papateng i Yesus?
Yehuwa něndolohẹ̌ si Yesus gunang měnarakang pěbawiahe nasukụ ”tadeạu apang mangimang si [Yesus] tawe mawinasa katewe makaěbạ pěbawiahẹ̌ kěkalẹ̌”. (Yohanes 3:16) Ual᷊ingu apa nikoạ i Yesus, seng mal᷊ighạ i Yehuwa sarung mapakailang kěbị barang dal᷊akị nariadi ual᷊ingu i Adam. Ini mangal᷊ene mạeng i kitẹ mangimang su tatěbusi Yesus, i kitẹ sarung makaěbạ kesempatan gunang měbiahẹ̌ mal᷊uasẹ̌ sarang karěngụe su firdaus su dunia.—Yesaya 65:21-23.
BANGKA PAKARAL᷊UNG
Mahịe měngěndung limembong mal᷊awọ soal u kawe nụe i Yesus něgělị pěbawiahe, dingangu kerea i kau botonge makaěbạ gunane.
3. Papateng i Yesus nakawebasẹ̌ si kitẹ bọu dosa dingangu papate
Putarẹ̌ VIDEONE, bọu ene bisarai kakiwal᷊one.
-
Kesempatan apa nipakailang karạ i Adam su tempong i sie tawe timuhụ su Mawu?
Basa Roma 5:12, bọu ene bisarai kakiwal᷊o ini:
-
Kerea dosang i Adam piạ pěngarune su pěbawiahu?
Basa Yohanes 3:16, bọu ene bisarai kakiwal᷊o ini:
-
Kawe nụe Yehuwa něndolohẹ̌ Ahus’E sarang dunia?
-
I Adam kai taumata nasukụ kụ tawe timuhụ su Mawu, ual᷊ingu ene kěbị taumata nakoạ marosa kụ sarung mate
-
Yesus kai taumata nasukụ kụ timuhụ su Mawu, ual᷊ingu ene kěbị taumata botonge saụ makoạ masukụ dingangu měbiahẹ̌ kěkalẹ̌
4. Papateng i Yesus piạ gunane su kěbị taumata
Putarẹ̌ VIDEONE, bọu ene bisarai kakiwal᷊one.
-
Kerea papateng sěngkatau piạ gunane su kěbị taumata?
Basa 1 Timotius 2:5, 6, bọu ene bisarai kakiwal᷊o ini:
-
I Adam kai taumata nasukụ kụ i sie nakakoạ kěbị taumata marosa dingangu mate. I Yesus lai taumata nasukụ. Kerea i sie nakoạ ”tatěbusẹ̌ sebanding”?
5. Tatěbusẹ̌ kai hadiah bọu i Yehuwa gunang i kau
Su manga hapị i Yehuwa, tatěbusẹ̌ ene kai hadiah gunang i sire sěngkatau-sěngkatau. Contone, basa Galatia 2:20, bọu ene bisarai kakiwal᷊o ini:
-
Kerea Rasul Paulus něnodẹ tatěbusẹ̌ kai hadiah gunang i sie?
Su tempong i Adam někoạ dosa, i sie dingangu manga hitene sarung mate. Katewe, Yehuwa něndolohẹ̌ Ahus’E tadeạu i kitẹ makaěbạ kesempatan gunang měbiahẹ̌ mal᷊uasẹ̌ sarang karěngụe.
Su tempong mẹ̌basa manga ayatẹ̌ ini, pẹ̌tiněna kerea pěndang i Yehuwa su tempong Ahus’E nasigěsạ. Basa Yohanes 19:1-7, 16-18, bọu ene bisarai kakiwal᷊o ini:
-
Kerea pěndangu su tempong nakasingkạ apa seng nikoạ i Yehuwa dingangi Yesus gunang i kau?
ARAMANUNG PIẠ U NẸ̌KIWAL᷊O: ”Kerea sěngkatau botonge makatěbusẹ̌ kěbị taumata?”
-
Kerea i kau sumimbahẹ̌ kakiwal᷊o ene?
RINGKASAN
Papateng i Yesus nakoạ dasarẹ̌ si Yehuwa gunang měngampung dosang i kitẹ, kụ ene lai nakakoạ i kitẹ nakaěbạ kesempatan měbiahẹ̌ mal᷊uasẹ̌ sarang karěngụe.
Apa seng nikaěndungangu?
-
Kawe nụe Yesus nate?
-
Kerea pěbawiahi Yesus nasukụ kai tatěbusẹ̌ sebanding?
-
Kerea papateng i Yesus piạ gunane si kau?
PĚMANDA LAI
Pěngěndungke kawe nụe pěbawiahi Yesus nasukụ nisěbạ tatěbusẹ̌.
”Apa Mangal᷊ene Pěbawiahi Yesus Kai ’Tatěbusẹ̌ gunang Lawọ Taumata’?” (Artikel web)
Pěmanda apa harusẹ̌ koateng i kitẹ tadeạu masal᷊amatẹ̌.
”Yesus Měnanal᷊amatẹ̌—Apa Mangal᷊ene Hal᷊ẹ̌ Ene?” (Artikel web)
Apa i Yehuwa sarung měgělị ampung maning i kitẹ někoạ dosa gěguwạ?
”Kakiwal᷊ong Alkitapẹ̌ Nisimbaheng” (Menara Pengawal, 1 Mei 2013)
Pěmanda kerea něngěndung soal u tatěbusi Kristus nakatul᷊ung sěngkatau esẹ limawang kenangan dal᷊akị.
”Nẹ̌tatahang Ual᷊ingu Nẹ̌tahěndung Kakěndagẹ̌ si Yehuwa” (Menara Pengawal, 15 Mei 2015)
^ par. 3 Dosa ene bal᷊inẹ kětạeng kakanoạ dal᷊akị. Dosa lai mangal᷊ene keadaan narusa arau tawe nasukụ niturusẹ̌ i Adam dingangi Hawa si kitẹ.