Xapulana latamanin, Adán chu Eva, ni kgalhakgaxmatkgolh Dios. Wa xlakata akinin kgalhiyaw talakgalhin, patinanaw chu niyaw. a Pero kgalhiyaw akgtum takgalhkgalhin. Jehová limaklakaskinit xKgawasa, Jesucristo, xlakata nakinkalakgmaxtuyan ktalakgalhin chu klinin. Biblia masiya pi Jesús kinkalilakgmaxtun xlinin. Talakgmaxtut wa tuku xokgokan xlakata wi tiku nalakgmaxtukan. Chu Jesús mastalh xlatamat nema ni xkgalhi talakgalhin xlakata xkinkalakgmaxtun (kalikgalhtawakga Mateo 20:28). Xlakata Jesús ni xkgalhi talakgalhin chu ankgalhin kgalhakgaxmatli Jehová, tlan xlatamalh putum kilhtamaku unu kKatiyatni, pero xatapaxuwan makgxtakglhli uma xlakata akinin tlan xkgalhiparaw tuku Adán chu Eva xmakgatsankgakgonit. Uma tuku tlawalh limasiyalh pi Jehová chu xla lu kinkapaxkikgoyan. Uma takgalhtawakga namakgtayayan tlakg napaxtikatsiniya xlakata Jesús mastalh xlatamat.

1. ¿La kinkamakgtayayan la uku xlakata Jesús nilh?

Xlakata makglakgalhinanin akinin, lhuwa tuku tlawayaw nema ni lakgati Jehová. Pero tlan xʼamigos Dios nawanaw komo xlikana nitlan nalimakgkatsiyaw kintalakgalhinkan, naskiniyaw Jehová kxtukuwani Jesús pi kakinkatapatin chu naliskujaw xlakata nialh natlawayaw talakgalhin nema tlawanitaw (1 Juan 2:1). Biblia wan: «Cristo kaj makgtum nilh chu xapalh talakgalhin, chatum lataman tiku tlan likatsi xpalakata latamanin tiku nitlan likatsikgo, xlakata nakapulalinan kxlakatin Dios» (1 Pedro 3:18).

2. ¿La nakinkamakgtayayan kkilhtamaku nema aku mima xlakata Jesús nilh?

Jehová malakgachalh xKgawasa xlakata namasta xlatamat nema ni xkgalhi talakgalhin «xlakata putum tiku nalimasiya pi kanajlani ni namalakgsputukan wata nakgalhi latamat nema ni kgalhi xlisputni» (Juan 3:16). Xlakata tuku tlawalh Jesús, Jehová nialh makgas namasputu putum tuku nitlan kitaxtunit xlakata Adán ni kgalhakgaxmatnalh. Uma wamputun pi komo nakanajlaniyaw xtamakamastan Jesús, tlan nalipaxuwayaw latamat putum kilhtamaku unu kkatiyatni akxni akgtum paraíso nawan (Isaías 65:21-23).

 TLAKG KALAKPUTSANANIW

3. Xlinin Jesús kinkalakgmaxtuyan ktalakgalhin chu klinin

1. Adán ni xkgalhi talakgalhin, pero ni kgalhakgaxmatli Dios chu kamatitaxtinilh talakgalhin chu linin putum latamanin

2. Xlakata Jesús ni xkgalhi talakgalhin chu kgalhakgaxmatli Dios, tlawalh pi latamanin tlan nalatamakgo putum kilhtamaku chu nialh nakgalhikgo talakgalhin

4. Xlinin Jesús tlan nalitamakgtayakgo putum latamanin

 5. Talakgmaxtut akgtum tamaskiwin nema Jehová maxkinitan

Tiku tlan talalinkgo Jehová, liʼakxilhkgo talakgmaxtut la akgtum tamaskiwin nema xla kamaxkinit xchatunukan. Kalikgalhtawakgatit Gálatas 2:20 niku lichuwinan chatum chixku tiku chuna xliʼakxilha talakgmaxtut. Alistalh kalichuwinantit uma:

• ¿Tuku tachuwin maklakaskilh apóstol Pablo xlakata nalimasiya pi talakgmaxtut akgtum tamaskiwin nema xla xmaxkikanit?

Akxni Adán lakgalhinalh, kamatitaxtinilh linin putum xkamanan. Pero Jehová makamilh xKgawasa kKatiyatni xlakata xmastalh xlatamat chu chuna wix tlan nalatapaya putum kilhtamaku.

Akxni nalikgalhtawakgaya uma texto, kalilakpuwanti la makgkatsilh Jehová akxni akxilhli pi xKgawasa xpatinama. Kalikgalhtawakgatit Juan 19:1-7 chu 16-18 chu kalichuwinantit uma:

• ¿La makgkatsiya akxni lilakpuwana tuku Jehová chu Jesús tlawakgolh mimpalakata?

 TUKU KATSINIW

Xlakata Jesús nilh kimpalakatakan, Jehová tlan kinkatapatiyan kintalakgalhinkan chu kinkamaxkiyan talakaskin tlan nalatamayaw putum kilhtamaku.

¿Tuku xkgalhtinanti?

• ¿Tuku xlakata nilh Jesús?

• ¿Tuku xlakata xlatamat Jesús tlan «xokgolh tuku xtalakaskin» xlakata xkinkalakgmaxtun?

• ¿La makgtayayan xlakata nilh Jesús?