DYONDZO 27
Rifu Ra Yesu Ri Hi Ponisa Njhani?
Ha dyoha, hi xaniseka ni ku tlhela hi fa hikuva vanhu vo sungula ku nga Adamu na Evha a va xi yingisanga Xikwembu. a Kambe sweswo a swi endlanga leswaku swi vhela swi va swi herile hi hina. Yehovha u endle leswaku hi kota ku kutsuriwa eka xidyoho lexi ni rifu hi ku tirhisa N’wana wakwe, Yesu Kreste. Bibele yi dyondzisa leswaku Yesu u hi kutsurile hi rifu rakwe. Nkutsulo i mali leyi humesiwaka leswaku ku tshunxiwa munhu wo karhi. Yesu u hakele nkutsulo hi ku nyikela hi vutomi byakwe tanihi munhu la hetisekeke. (Hlaya Matewu 20:28.) Loko Yesu a nyikela hi vutomi byakwe leswaku a nga hanyi hilaha ku nga heriki la misaveni, u endle leswaku swi tlhela swi koteka leswaku hi kuma hinkwaswo leswi Adamu na Evha swi va lahlekeleke. Yesu u yi veke erivaleni ndlela leyi yena na Yehovha va hi rhandzaka ha yona. Dyondzo leyi, yi ta ku pfuna leswaku u ya u swi tlangela swinene leswi Yesu a hi feleke.
1. Rifu ra Yesu ri hi vuyerisa njhani namuntlha?
Leswi hi nga vadyohi, hi endla swilo swo tala leswi Yehovha a nga swi tsakeriki. Hambiswiritano, loko hi tisola hikwalaho ka swidyoho swa hina ivi hi khongela eka Yehovha hi tirhisa vito ra Yesu Kreste leswaku a hi rivalela, hi tlhela hi lwa hi matimba leswaku hi nga ha phindhi swihoxo sweswo, hi ta va vanghana lavakulu va Xikwembu. (1 Yohane 2:1) Bibele yi ri: “Kreste u fe kan’we swi helela kwalaho a fela swidyoho, munhu wo lulama a fela lava nga lulamangiki, leswaku a mi kongomisa eka Xikwembu.”—1 Petro 3:18.
2. Rifu ra Yesu ri ta hi vuyerisa njhani enkarhini lowu taka?
Yehovha u rhume Yesu leswaku a nyikela hi vutomi byakwe “leswaku loyi a pfumelaka eka [Yesu] a nga lovisiwi kambe a kuma vutomi lebyi nga heriki.” (Yohane 3:16) Hikwalaho ka leswi Yesu a swi endleke, ku nga ri khale Yehovha u ta herisa swilo hinkwaswo swo biha leswi vangiweke hi ku nga yingisi ka Adamu. Leswi swi vula leswaku loko hi kombisa ripfumelo eka gandzelo ra Yesu, hi ta hanya hilaha ku nga heriki eparadeyisini kona kwala misaveni!—Esaya 65:21-23.
ANAKANYISISA
Dyondza swo tala mayelana ni leswaku hikwalaho ka yini Yesu a nyikele hi vutomi byakwe kutani u xiya ndlela leyi swi ku vuyerisaka ha yona.
3. Rifu ra Yesu ra hi tshunxa eka xidyoho ni rifu
Tlanga VHIDIYO, ivi mi bula hi xivutiso lexi landzelaka.
-
Leswi Adamu a nga xi yingisangiki Xikwembu u lahlekeriwe hi yini?
Hlaya Varhoma 5:12, ivi mi bula hi xivutiso lexi:
-
Xidyoho xa Adamu xi ku khumba njhani?
Hlaya Yohane 3:16, ivi mi bula hi xivutiso lexi:
-
Hikwalaho ka yini Yehovha a rhumele N’wana wakwe emisaveni?
-
Adamu a a hetisekile kambe leswi a nga xi yingisangiki Xikwembu u endle leswaku vanhu va va ni xidyoho va tlhela va fa
-
Yesu a a hetisekile naswona u yingise Xikwembu a endla leswaku vanhu va kota ku kuma vutomi lebyi nga heriki
4. Rifu ra Yesu ri nga vuyerisa vanhu hinkwavo
Tlanga VHIDIYO, ivi mi bula hi xivutiso lexi landzelaka.
-
Swi kotekisa ku yini leswaku rifu ra munhu un’we ri vuyerisa vanhu hinkwavo?
Hlaya 1 Timotiya 2:5, 6, ivi mi bula hi xivutiso lexi:
-
Adamu a a hetisekile kambe u endle leswaku vanhu va va ni xidyoho va tlhela va fa. Yesu na yena a a hetisekile. I yini leswi a nga swi endla leswaku a ‘kutsula’ vanhu?
5. Yehovha u ku nyike nyiko ya nkutsulo
Vanghana va Yehovha va teka nkutsulo ku ri nyiko. Hi xikombiso, hlaya Vagalatiya 2:20, ivi mi bula hi xivutiso lexi:
-
Muapostola Pawulo u swi kombise njhani leswaku u teka nkutsulo ku ri nyiko?
Loko Adamu a dyoha, yena ni vana vakwe hinkwavo va tluleriwe hi rifu. Kambe Yehovha u rhumele N’wana wakwe a ta hi fela leswaku u ta tiphina hi vutomi lebyi nga heriki.
Loko u ri karhi u hlaya tindzimana leti landzelaka, ehleketa ndlela leyi Yehovha a nga ha vaka a titwe ha yona loko a vona N’wana wakwe a ri karhi a xaniseka. Hlaya Yohane 19:1-7, 16-18, ivi mi bula hi xivutiso lexi:
-
U titwa njhani hi leswi Yehovha na Yesu va ku endleleke swona?
UN’WANA A NGA HA KU VUTISA A KU: “Swi ta njhani leswaku munhu un’we a fela vanhu hinkwavo?”
-
A wu ta n’wi hlamula njhani?
NKATSAKANYO
Rifu ra Yesu ri endla leswaku Yehovha a hi rivalela swidyoho naswona ri endla leswaku swi koteka ku hanya hilaha ku nga heriki.
Mpfuxeto
-
Yesu u fele yini?
-
Yesu u wu nyikele njhani nkutsulo loko a ri laha misaveni?
-
Rifu ra Yesu ri ku vuyerisa njhani?
KUMA LESWI ENGETELEKEKE
Dyondza leswaku hikwalaho ka yini rifu ra Yesu ri vitaniwa nkutsulo.
“Rifu Ra Yesu ‘Ri Kutsula Vanhu Vo Tala’ Hi Ndlela Yihi?” (Nhlokomhaka leyi kumekaka eka website)
Twana leswi hi faneleke hi swi endla leswaku hi ponisiwa.
“Yesu Wa Ponisa—Njhani?” (Nhlokomhaka leyi kumekaka eka website)
Xana Yehovha wa rivalela loko u endle xidyoho lexikulu?
“Swivutiso Leswi Hlamuriwaka Hi Bibele” (Xihondzo xo Rindza, May 1, 2013)
Vona ndlela leyi ku dyondza hi gandzelo ra Kreste swi n’wi pfuneke ha yona wanuna un’wana leswaku a cinca mahanyelo yakwe.
“A Ndza Ha Ri Hlonga Ra Madzolonga” (Nhlokomhaka leyi kumekaka eka website)
a Xidyoho a kova ku endla swilo swo biha ntsena. Kambe xi katsa nsusumeto lowu hi velekiweke na wona wo lava ku endla swilo swo biha.
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
