MATAUPU 27
E Faka‵sao Pefea Tatou ne te Mate o Iesu?
A tatou e agasala, e logo‵mae, kae ‵mate ona ko te sē faka‵logo o te tauavaga muamua ko Atamu mo Eva ki te Atua. a Kae e se fakauiga i ei me ko seai se ‵tou fakamoemoega. Ko oti ne fakatoka ne Ieova se auala ke faka‵sao ei tatou mai te agasala mo te mate e auala i tena Tama, ko Iesu Keliso. E akoako mai i te Tusi Tapu me ne fai ne Iesu te togiola e auala i tena mate. A te togiola se ‵togi e ‵tau o ‵togi atu ke mafai o fakasaoloto se tino. A te ‵togi telā ne ‵togi atu ne Iesu ko te tāua o tena ola ‵lei katoatoa e pelā me se tino. (Faitau te Mataio 20:28.) I te taimi ne tuku atu ei ne Iesu mo te loto fiafia tena saolotoga ke ola ki te se-gata-mai i te lalolagi, ne ‵tala mai ei ne ia te auala ke mafai o toe maua ne tatou a mea kolā ne ‵galo atu i a Atamu mo Eva. Ne fakaasi mai foki ne Iesu a te lasi o te a‵lofa o lāua mo Ieova ki a tatou. Ka fesoasoani mai eiloa a te mataupu tenei ke momea aka te ‵tou loto fakafetai ki te mate o Iesu.
1. E aoga pefea ki a tatou i aso nei a te mate o Iesu?
Ona ko tatou ne tino agasala, e fai ne tatou a mea e uke kolā e fakafanoanoa atu ki a Ieova. Kae kafai e sala‵mo tonu tatou ki ‵tou agasala kae fakamolemole atu ki a Ieova e auala i a Iesu Keliso ke fakamagalo tatou, kae fakaoti ‵tou mafi ke mo a ma toe fai a mea ‵se konā, e mafai eiloa o maua ne tatou se va fakataugasoa ‵pili mo te Atua. (1 Ioane 2:1) E fai mai te Tusi Tapu: “Ne mate a Keliso fakatasi mō taimi katoa mō agasala, se tino amiotonu mō tino amio sē ‵tonu, ko te mea ke takitaki atu ei koutou ki te Atua.”—1 Petelu 3:18.
2. E aoga pefea ki a tatou i aso mai mua a te mate o Iesu?
Ne uga mai ne Ieova a Iesu ke tuku mai tena ola ‵lei katoatoa e pelā me se tino “ko te mea ke se fakaseai atu so se tino telā e fakaasi atu faeloa te fakatuanaki ki a [Iesu] kae ke maua ne ia te ola se-gata-mai.” (Ioane 3:16) E fakafetai tatou ki te mea ne fai ne Iesu, me ko pili fua o fakaseai atu ne Ieova a mea ma‵sei katoa kolā ne māfua mai i te sē fakalogo o Atamu. Ko tena uiga kafai e fakatuanaki tatou ki te taulaga a Iesu, ka mafai o maua ne tatou a te avanoaga ke ola ki te se-gata-mai i te lalolagi palataiso!—Isaia 65:21-23.
KELI MALOSI IFO
Fai ke malamalama faka‵lei koe i te pogai ne tuku atu ei ne Iesu tena ola, kae mafaufau ki te aoga o te mea tenā ki a koe.
3. E fakasaoloto tatou ne te mate o Iesu mai te agasala mo te mate
Pei te VITIO, ko sau‵tala ei ki te fesili tenei.
-
Se a te avanoaga ne galo atu i a Atamu i te taimi ne seki fakalogo ei ki te Atua?
Faitau te Loma 5:12, ko sau‵tala ei ki te fesili tenei:
-
Ne pokotia pefea tou olaga i te agasala a Atamu?
Faitau te Ioane 3:16, ko sau‵tala ei ki te fesili tenei:
-
Kaia ne uga mai ne Ieova tena Tama ki te lalolagi?
-
A Atamu se tagata ‵lei katoatoa telā ne seki fakalogo ki te Atua kae ne oko atu ei ki tino a te agasala mo te mate
-
A Iesu se tagata ‵lei katoatoa telā ne fakalogo ki te Atua kae ko maua ne tino te avanoaga ke oko atu ki se tulaga ‵lei katoatoa mo te ola se-gata-mai
4. E aoga ki tino katoa a te mate o Iesu
Pei te VITIO, ko sau‵tala ei ki te fesili tenei.
-
E aoga pefea ki tino katoa a te mate o se tagata e tokotasi?
Faitau te 1 Timoteo 2:5, 6, ko sau‵tala ei ki te fesili tenei:
-
A Atamu se tagata ‵lei katoatoa kae ne fai ne ia ke maua ne tino katoa a te agasala mo te mate. A Iesu se tagata ‵lei katoatoa foki. Ne fai pefea a ia mo fai “se togiola telā e fetaui tonu mō tino katoa”?
5. A te togiola ko te meaalofa a Ieova ki a koe
E ‵kilo atu a taugasoa o Ieova ki te togiola e pelā me se meaalofa totino ki a latou. E pelā mo te Kalatia 2:20, ke faitau ki ei, ko sau‵tala ei ki te fesili tenei:
-
Ne fakaasi mai pefea ne te apositolo ko Paulo me ne kilo atu a ia ki te togiola e pelā me se meaalofa totino ki a ia?
I te taimi ne agasala ei a Atamu, ne togi atu ne ia a ia eiloa mo tino kolā ne ‵tupu mai i a ia ki te mate. Kae ne uga mai ne Ieova tena Tama ke mate ko te mea ke mafai o maua ne koe te avanoaga ke ola ki te se-gata-mai.
Kafai e faitau koe ki fuaiupu konei, mafaufau ki lagonaga o Ieova i te taimi ne logo‵mae ei tena Tama. Faitau te Ioane 19:1-7, 16-18, ko sau‵tala ei ki te fesili tenei:
-
Ne a ou lagonaga ki te mea ne fai ne Ieova mo Iesu mō koe?
KĀTI KA FESILI MAI SE TINO: “E mafai pefea o mate se tagata e tokotasi mō tino katoa?”
-
Ka tali atu pefea ne koe?
MANATU AOGA
Ne fakatoka ne te mate o Iesu se fakavae ke mafai o fakamagalo ne Ieova ‵tou agasala, kae tuku mai foki i ei se avanoaga ke mafai o maua ne tatou a te ola se-gata-mai.
Fesili
-
Kaia ne mate ei a Iesu?
-
Ne fai pefea te ola ‵lei katoatoa o Iesu mo fai se togiola telā e fetaui tonu mō tino katoa?
-
E mafai pefea o aoga ki a koe a te mate o Iesu?
NISI FAKAMATALAGA
Tauloto ki te pogai e taku ei a te ola ‵lei katoatoa o Iesu e pelā me se togiola.
“Ne Fai Pefea te Taulaga a Iesu mo Fai se ‘Togiola mō Tino e Tokouke’?” (Mataupu i te neti)
Faitau ki mea kolā e ‵tau o fai ne tatou ke mafai o ‵sao.
E mata, e mafai ne Ieova o fakamagalo a agasala matagā?
“Tali ki Fesili Mai te Tusi Tapu” (Te Faleleoleo Maluga, Me 1, 2013)
Faitau ki te auala ne aoga ei te taulaga a Keliso ki se tagata ke ‵fuli ana uiga mo faifaiga.
a A te agasala e se fakasino atu fua ki te faiga o se mea masei. E mafai foki o fakasino atu ki te tulaga masei telā ne togi mai ki a tatou.