YOOSOMA 27
Okhwa wa Yesu onkela onoopola hayi?
Hiyo noottheka, ninnahaawa ni ninnakhwa, mwaha wooweera, Adamu ni Heva khayaamwiiwelenle Muluku. a Nnaamweera vareene hiiho, eyo kheemootxelinhe Yehova opaka yootthunaawe. Yehova aamurumiha mwanawe Yesu kristu weera anoopole mwa yoottheka ni okhwa. Biblya onnaxuttiha weera, okhwa wawe, Yesu ooliva anoopolaka soottheka sootheene. Yoowoopola eri ntoko mutthu owaleliwe mukadeya, avinyaka mutthu mukina analiva musurukhu weera amoopole mukhwaawe. Etthu Yesu olinvaawe ori okumi awe wookwanela. (Mmusome Matheyo 20:28.) Yesu oonikhavihera ookhalano eparakha yookhala mahuku ootheene valaponi. Yesu oohula ephiro weera nikhaleno itthu sootheene seiyo Adamu ni Heva yaalunsaaya. Okhwa wawe woohoonihera moota Yehova ni Yesu annisivelaaya. Mwa yoosomeene yeela, enookela onoonihera etthu nneeraahu nipake weera noonihere oxukurela yoovaha ya Yesu.
1. Okhwa wa Yesu onaanikhavihere hayi olelo?
Ootheene hiyo, niyariwe ni yoottheka. Mwa yeeyo, ikwaha ikina ninnapaka itthu simmunyoonyiha Yehova. Mene mwaha wa ele Yesu onipakenlaawe nnoowera oleveleliwa soottheka sahu. Mene weera eyo yeereye, ontthuneya ottharuwa mweekhaikhai ni ovekela nlevelelo wa Yehova. Ni opaka ele ninweraahu weera nihitthikele soottheka imoharu. Napaka eyo, nnoorowa olipiha onthamwene ahu ni Yehova. (1 Yohani 2:1) Biblya oneera: “Tthiri Kristu okhwiye khuluwi niwoko na sottheka, Naxariya niwoko na atakhali, wera òkeliheni wa Muluku.”—1 Pedru 3:18.
2. Okhwa wa Yesu onkela onaanikhavihera hayi muhoolo?
Yehova oomurumiha Yesu weera avahe okumi awe woohittheka. ‘Wera mutthu ori othene anamwiwelele ahiriheye nto akhaleno okumi wohimala’. (Yohani 3:16) Mwaha wa mukuttho wa Yesu, Yehova onrowa omaliha sooxupa sootheene sinnixupa sinkhumelela mwaha wohiiwelela wa Adamu. Eyo entaphulela weera, naaroromelaka mukuttho wa Yesu nnookhalano eparakha yookhala mahiku ootheene mparadiso valaponi!—Yesaya 65:21-23.
WEERA MUXUTTERE SINTXIPALE
Mwiiwexexe nnene mwaha wa heeni Yesu onikhwenlaawe ni mwaha wa heeni etthu eyo, ennikhaviheraaya.
3. Mukuttho wa Yesu onnanoopola mwa yoottheka ni okhwa
Moone EVIIDIYU. Avinyaka mutthekule ni epontu enttharelana.
-
Eparakha heeni Adamu ayelenlaaya mwaha woohimwiwelela Muluku?
Mmusome Aroma 5:12. Avinyaka mutthekule ni epontu enttharelana:
-
Yoottheka ya Adamu evolenle hayi okumi ahu?
Mmusome Yohani 3:16. Avinyaka mutthekule ni epontu enttharelana:
-
Mwaha wa heeni Yehova aamuruminhaawe mwanawe owa valaponi?
-
Adamu aari mutthu oomalela mene mwaha woohiiwelela wawe atthu ootheene annattheka ni annakhwa
-
Yesu aari mutthu oohittheka, mene mwaha woowiiwelela wawe, atthu ootheene annaweherera okhala mahuku ootheene
4. Okhwa wa Yesu onimwaakhavihera atthu ootheene
Moone EVIIDIYU. Avinyaka mutthekule ni epontu enttharelana.
-
Moota heeni okhwa wa mutthu mmoha oneeraaya waakhavihere atthu ootheene?
Mmusome 1 Timotheyo 2:5, 6. Avinyaka mutthekule ni epontu enttharelana:
-
Adamu aari mutthu oohittheka, nto mwaha wa yootthekaawe, atthu oottheene toottheka ni annakhwa. Mene tho, Yesu aari mutthu oohittheka. Moota heeni owo ‘owenraawe waavuluxa’ atthu ootheene?
5. Yoowoopola eparakha etokweene Yehova oovanhaaweni
Asinthamwene a Yehova anoona weera yoowopola eparakha etokweene Yehova avanhaawe. Mwa ntakihero, mmusome Agalata 2:20. Avinyaka mutthekule ni epontu enttharelana:
-
Murummwa Paulo oonihenre moota heeni oxukurela yoowoopola ntoko yoovaha enkhuma wa Muluku?
Adamu atthekakaru, atthu ootheene annattaruxiwa ni okhwa. Mene nto Yehova, oovaha okumi wa mwanawe weera atthu ootheene ekhaleno eparakha yookhala mahuku ootheene valaponi.
Muupuwele moota Yehova oonenlaawe vaavo aamonnaawe mwanawe ahaawaka. Mmusome Yohani 19:1-7, 16-18. Avinyaka mutthekule ni epontu etharelana:
-
Nyuwo munoonela hayi etthu opankaawe Yehova ni Yesu?
WAKHALA WEERA MUTTHU OHOOKOHANI: “Moota heeni okhwa wa mutthu mmoha onaavuluxaaya atthu ootheene?”
-
Mwaakela waakhula hayi?
NYAHA SOOTTHUNEYA
Mwaha wa okhwa wa Yesu, Yehova onoolevelela soottheka sahu sootheene. Okhwa wa Yesu tho, onnanivaha eparakha yookhala mahuku ootheene.
Wuuluula
-
Eheeni yaamweerinhe Yesu okhwa?
-
Moota heeni okumi woohittheka wa Yesu enweraaya owoopola atthu ootheene?
-
Moota heeni okhwa wa Yesu onookhaviheraayani?
WEERA MUSUWELE ITTHU SINTXIPALE
Muxuttere mwaha wa heeni ekumi ya Yesu eneeriwaaya ti yoowoopola.
“Moota heeni mukuttho wa ‘onaavuluxaaya atthu antxipale’?” (Mwaha va jw.org)
Moonelele etthu nintthuneyaahu opaka weera noopowe.
“Masu ooweera ‘Yesu onnanoopola antaphulela eheeni’?” (Mwaha va jw.org)
Neereke Yehova onnalevelela mpaka soottheka itokotoko?
“Waakhuliwa wa Makoho Voohimya sa Biibiliya” (Owehaweha, 1.º a Maio a 2013)
Moone moota mulopwana mmoha aatxentxalaawe omutthu awe mwaha wooxuttera voohima sa mukuttho wa Yesu.
a Yoottheka khahiyono paahi etthu yoonanara empakiwa ni mutthu. Eyo tho enthoonyera weera naahiilipihera pooti opaka itthu soonanara mwaha wooweera ninkhuma wa Adamu ni Heva.
