Nakakasala kita, nag-aantos, ngan namamatay tungod kay an siyahan nga mag-asawa, hira Adan ngan Eva, waray magin masinugtanon ha Dios. a Pero may paglaom pa kita. Hi Jehova naghimo hin paagi basi matalwas kita ha sala ngan kamatayon pinaagi han iya Anak, hi Jesu-Kristo. Igintututdo han Biblia nga pinaagi han kamatayon ni Jesus, igintagana niya an lukat. An lukat amo an kantidad nga iginbabayad basi tagan hin kagawasan an usa nga tawo. An kantidad nga iginbayad ni Jesus amo an iya perpekto nga kinabuhi sugad nga tawo. (Basaha an Mateo 20:28.) Han kinaburut-on nga iginsakripisyo ni Jesus an iya katungod nga mabuhi hin waray kataposan ha tuna, nagin posible nga maibalik ha aton an ngatanan nga nawara nira Adan ngan Eva. Iginpakita liwat ni Jesus an daku nga gugma niya ngan ni Jehova ha aton. Ini nga leksyon mabulig basi maghilarom pa an imo apresasyon ha kamatayon ni Jesus.

1. Paonan-o kita makakapahimulos yana ha kamatayon ni Jesus?

Tungod kay makasasala kita, damu an aton ginbubuhat nga nakakapasubo kan Jehova. Pero kon tinuod nga nagbabasol kita ha aton mga sala ngan mangaro hin pasaylo kan Jehova pinaagi kan Jesu-Kristo, ngan kon bubuhaton naton an aton pinakamaopay nga mahihimo basi diri na mautro ito nga mga sayop, puydi kita magin duok nga sangkay han Dios. (1 Juan 2:1) An Biblia nasiring: “An Kristo namatay hin makausa gud la para ha mga sala, usa nga matadong nga tawo para ha mga diri magtadong, basi giyahan kamo ngadto ha Dios.”—1 Pedro 3:18.

2. Ha tiarabot, paonan-o kita makakapahimulos ha kamatayon ni Jesus?

Ginsugo ni Jehova hi Jesus nga ihatag an iya perpekto nga kinabuhi sugad nga tawo “basi an bisan hin-o nga nagpapakita hin pagtoo [kan Jesus] diri mabungkag kondi magkaada kinabuhi nga waray kataposan.” (Juan 3:16) Tungod han ginbuhat ni Jesus, hirani na wad-on ni Jehova an ngatanan nga magraot nga butang nga resulta han pagin diri masinugtanon ni Adan. Nangangahulogan ini nga kon magpapakita kita hin pagtoo ha halad ni Jesus, magkakaada kita higayon nga mabuhi hin malipayon ha waray kataposan ha paraiso nga tuna!—Isaias 65:21-23.

 DUGANG NGA USISAHA

3. An kamatayon ni Jesus nagtatalwas ha aton ha sala ngan kamatayon

1. Hi Adan perpekto nga tawo nga waray magin masinugtanon ha Dios, tungod hito an mga tawo nakakasala ngan namamatay

2. Hi Jesus perpekto nga tawo nga nagin masinugtanon ha Dios, tungod hito an mga tawo may higayon nga magin perpekto ngan mabuhi ha waray kataposan

4. An ngatanan nga tawo makakapahimulos ha kamatayon ni Jesus

 5. An lukat usa nga regalo ni Jehova ha imo

Para ha mga sangkay ni Jehova, an lukat usa nga personal nga regalo. Pananglitan, basaha an Galacia 2:20, katapos, hisguti niyo ini nga pakiana:

• Paonan-o iginpakita ni apostol Pablo nga an lukat usa nga personal nga regalo ha iya?

Han nakasala hi Adan, hiya ngan an ngatanan niya nga tulin ginhukman hin kamatayon. Pero ginsugo ni Jehova an iya Anak basi mamatay para magkaada ka higayon nga mabuhi hin malipayon ha waray kataposan.

Samtang ginbabasa mo an masunod nga teksto, imadyina kon ano an gin-abat ni Jehova han nag-aantos an iya Anak. Basaha an Juan 19:1-7, 16-18, katapos, hisguti niyo ini nga pakiana:

• Ano an imo gin-aabat mahitungod han ginbuhat ni Jehova ngan ni Jesus para ha imo?

 SUMARYO

Tungod kay namatay hi Jesus, puydi mapasaylo ni Jehova an aton mga sala, ngan naghahatag ito ha aton hin higayon nga mabuhi hin malipayon ha waray kataposan.

Repaso

• Kay ano nga namatay hi Jesus?

• Ha ano nga paagi an perpekto nga kinabuhi ni Jesus sugad nga tawo usa nga katugbang nga lukat?

• Paonan-o ka makakapahimulos ha kamatayon ni Jesus?