KAPITE 27
He Koʼe Neʼe Mate Ia Sesu?
ʼE tou agahala, a mo mamahi pea mo mamate ʼuhi ko te talagataʼa ʼa Atama mo Eva. Kae neʼe fai e Sehova he fakatuʼutuʼu ke tou ʼateaina mai te agahala mo te mate. Neʼe ina foaki mai tona ʼAlo, ia Sesu Kilisito. ʼE ui ʼi te Tohi-Tapu ʼaki te mate ʼo Sesu, neʼe ina foaki ai he totogi. Ko he totogi ʼe fai moʼo fakaʼateainaʼi he tahi. Pea ko te totogi ʼae neʼe foaki e Sesu neʼe ko tona maʼuli haohaoa. (Lau ia Mateo 20:28.) Neʼe haohaoa ia Sesu pea mo fakalogo tuʼumaʼu kia Sehova, koia neʼe feala pe ke maʼuli ʼo heʼe gata ʼi tana nofo ʼi te kele. Kae neʼe lotolelei ke mate maʼa tatou ke feala ke tou toe maʼu te maʼuli haohaoa ʼae neʼe pulihi e Atama mo Eva. Neʼe ina toe fakaha tonā ʼofa mamahi mo Sehova kia tatou. ʼE tokoni mai anai te kapite ʼaeni ke lahi age totatou lotofakafetaʼi ki te mate ʼo Sesu.
1. Kotea te ʼu fua lelei ʼe tou maʼu ia ʼaho nei?
ʼE tou agahala, koia ʼe tou fai ai ni aga ʼe mole fiafia ai Sehova. Kae, ʼe feala ke tou maʼu ni felogoi lelei mo te ʼAtua mo kapau ʼe tou fakahemala moʼoni ki ʼatatou agahala, mo kole tana fakamolemole ʼaki ia Sesu Kilisito pea mo faiga ke mole tou toe fai te ʼu agahala ʼaia. (1 Soane 2:1) ʼE ui fenei ʼi te Tohi-Tapu: “Neʼe mate ia Kilisito tuʼa tahi ʼo talu ai moʼo pulihi te ʼu agahala, ko he tagata faitotonu maʼa he kau heʼe faitotonu, ke taki ai koutou ki te ʼAtua.”—1 Petelo 3:18.
2. Kotea te ʼu fua lelei ʼe tou maʼu ʼi te ka haʼu?
Neʼe fekauʼi ifo e Sehova ia Sesu ke haʼu ʼo foaki tona maʼuli haohaoa. Kotea tona tupuʼaga? Ke feala ki ‘ʼae ʼe tui kia Sesu ke mole mate kae ke ina maʼu te maʼuli heʼe gata.’ (Soane 3:16) Koia ʼaki te sakilifisio ʼa Sesu, kua vave pulihi pe e Sehova te ʼu mamahi fuli, ʼae ʼe tupu ʼuhi ko te talagataʼa ʼa Atama. Ko tona fakaʼuhiga kapau ʼe tou tui ki te sakilifisio ʼaia, ʼe tou maʼuʼuli anai ʼo heʼe gata ʼi te palatiso, ʼi te kele.—Esaia 65:21-23.
TA FAKALOLOTO
Ta vakaʼi he tahi ʼu manatu ʼo te tupuʼaga ʼo te mate ʼa Sesu pea ʼe fua lelei feafeaʼi kia koe.
3. Kua tou ʼateaina mai te agahala mo te mate
Vakaʼi te ʼATA VITEO, pea fai te fehuʼi ʼae ʼe hoa mai.
-
Kotea te fealagia ʼae neʼe mole maʼu e Atama ʼi tana talagataʼa ki te ʼAtua?
Lau ia Loma 5:12, pea fai te fehuʼi ʼaeni:
-
Kotea te ʼu nunuʼa ʼo te agahala ʼa Atama neʼe tou tau mo ia?
Lau ia Soane 3:16, pea fai te fehuʼi ʼaeni:
-
He koʼe neʼe fekauʼi ifo e Sehova tona ʼAlo ki te kele?
-
Neʼe haohaoa ia Atama. Kae neʼe tou agahala mo mamate ʼuhi ko tana talagataʼa
-
Neʼe haohaoa ia Sesu. Neʼe fakaʼateainaʼi ai tatou mai te agahala pea mo maʼu te maʼuli heʼe gata ʼuhi ko tana fakalogo
4. Neʼe mate Sesu maʼa te hahaʼi fuli
Vakaʼi te ʼATA VITEO, pea fai te fehuʼi ʼae ʼe hoa mai.
-
Neʼe fua lelei feafeaʼi te mate ʼa he foʼi tokotahi maʼa te hahaʼi fuli?
Lau ia 1 Timoteo 2:5, 6, pea fai te fehuʼi ʼaeni:
-
Neʼe haohaoa ia Atama, kae neʼe agahala ʼo tou agahala ai mo mamate. Neʼe toe haohaoa mo Sesu. Kae neʼe ina fakaʼateainaʼi feafeaʼi tatou mai te agahala mo te mate?
5. Ko te totogi ʼe ko he meʼa ʼofa mai ia Sehova
Ko te totogi ʼe ko he meʼa ʼofa neʼe foaki mai e Sehova kia tatou takitokotahi. Koia, ʼi tatatou iloʼi te faʼahi ʼaia, ʼe tou fakaovi ai kia te ia. Lau ia Kalate 2:20, pea fai te fehuʼi ʼaeni:
-
ʼE ha feafeaʼi ʼi te vaega ʼaeni neʼe fakaʼuhiga e Paulo te totogi ko he meʼa ʼofa maʼa ia?
Hili te agahala ʼa Atama, neʼe tautea leva ia ia ki te mate ʼo feia mo tona hologa. Kae neʼe fekauʼi ifo e Sehova tona ʼAlo ke haʼu ʼo mate ke ke maʼu te maʼuli heʼe gata.
ʼI tau lau te ʼu vaega ʼae ʼe hoa mai, fakakaukauʼi te meʼa ʼae neʼe logoʼi e Sehova ʼi tana sio ifo ki te mamahi ʼo tona ʼAlo. Lau ia Soane 19:1-7, 16-18, pea fai te fehuʼi ʼaeni:
-
Kotea ʼe ke logoʼi moka ke fakakaukauʼi te ʼofa ʼo Sehova mo Sesu kia koe?
ʼE UI E ʼIHI: “ʼE lava feafeaʼi ki he tagata ʼe tahi ke mate moʼo haofaki te hahaʼi fuli?”
-
Kotea anai tau tali?
MANATU TAFITO
Neʼe mate ia Sesu, koia ʼe lava fakamolemole e Sehova ʼatatou agahala pea mo tou maʼu te maʼuli heʼe gata.
Fehuʼi Fakamanatu
-
He koʼe neʼe mate ia Sesu?
-
Neʼe fakaʼateainaʼi feafeaʼi tatou mai te agahala mo te mate?
-
Neʼe fua lelei feafeaʼi kia koe te mate ʼo Sesu?
TE TAHI ʼU MANATU
He koʼe ʼe ui ko te maʼuli haohaoa ʼo Sesu ʼe ko he totogi?
ʼE gata pe koa ki takita tui kia Sesu ke haofaki ai kita?
“ʼE Haofaki Feafeaʼi e Sesu Te Hahaʼi?”(Alatike ʼi te jw.org)
ʼE fakamolemole koa e Sehova te ʼu agahala mamafa?
“Te ʼu Tali Ki Te ʼu Fehuʼi Fakatohi-Tapu” (Ko Te Tule Leʼo ʼaho 1 ʼo Sulio 2013)
Neʼe tokoni feafeaʼi te sakilifisio ʼo Sesu ki he tagata ke ina fetogi tona ʼulugaaga.
““Je ne suis plus esclave de la violence” (Alatike [fakafalani] ʼi te jw.org)
a Ko te kupu agahala ʼe feala ke fakaʼuhiga ki he aga ʼe kovi. Kae ʼe toe fakaʼuhiga foki ki te ʼuhiga agahala ʼa Atama mo Eva, ʼae neʼe nā tuku mai.