Cumu qué nuzuubaʼ Adán ne Eva stiidxaʼ Dios la? nga runi ralenenu pecadu, racananu ne rátinu. a Peru qué nusaana Jehová ni zacá si, biquiiñebe Xiiñibe, Jesucristu, para gulabe laanu de lu náʼ pecadu ne guendaguti. Biblia rusiidiʼ gudixe Jesús para ganda guilanu, cásica riguixe ti binni para gundaacabe tuuxa, ne gupa xidé bidii Jesús xquendanabani sin donda para ganda guilanu (biindaʼ Mateo 20:28). Qué niná Jesús nibani ndaaniʼ Guidxilayú riʼ para siempre. Ne cumu qué ñúnibe ni la? bixhélebe ti neza para ganda gudxiguétabe ni biniti Adán ne Eva. Laaca bisihuínnibe pabiáʼ nadxiibe laanu ne pabiáʼ nadxii Jehová laanu. Zacané lección riʼ lii gánnaluʼ ximodo zanda gudiiluʼ xquixe peʼ pur bidii Jesús xquendanabani.

1. ¿Ximodo racané guendaguti stiʼ Jesús laanu yanna?

Cumu binni ruchee laanu la? rúninu stale cosa ni qué riuulaʼdxiʼ Jehová. Peru zanda gaca xhamígunu laabe pa gaca arrepentirnu de ca cosa ni cadi jneza rúninu ne guinábanu perdón laabe de lu lá Jesús. Ne gúninu stipa cadi guibiguetaʼ gúninu cosa ni cadi jneza (1 Juan 2:1). Biblia ná: «Ti biaje si guti Cristu para guixá ca pecadu stitu, guti ti binni nachaʼhuiʼ pur ca binni ni cadi nachaʼhuiʼ, para ganda chinebe laatu ra nuu Dios» (1 Pedro 3:18).

2. ¿Ximodo zacané guendaguti stiʼ Jesús laanu despué?

Biseendaʼ Jehová Xiiñiʼ para gudii xquendanabani sin donda «ti guiráʼ tu gapa fe Xiiñibe cadi guinitilú, sínuque guicaa guendanabani ni qué zaluxe» (Juan 3:16). Pur ni biʼniʼ Jesús riʼ, maʼ qué zandaa zabee Jehová guiráʼ yuubaʼ ne guendananá ni nápanu pur qué nuzuubaʼ Adán diidxaʼ. Nga runi, pa gápanu fe lu sacrificiu stiʼ Jesús riʼ, zanda guibáninu sin qué chuʼ dxi gátinu ndaaniʼ Guidxilayú riʼ ora maʼ nácani ti paraísu (Isaías 65:21-23).

 GUIZÍʼDIRUNU JMA

3. Zanda guilanu de lu náʼ pecadu ne guendaguti pur bidii Jesús xquendanabani

1. Guca Adán ti hombre perfectu, peru dxi maʼ qué nuzuubabe stiidxaʼ Dios bitiidibe pecadu ne guendaguti guiráʼ xixé binni.

2. Guca Jesús ti hombre perfectu ne cumu bizuubabe stiidxaʼ Dios la? bixhélebe ti neza para ganda guicaa binni guendanabani ni qué zaluxe ne gácacaʼ perfectu.

4. Zanda gacané guendaguti stiʼ Jesús guiráʼ xixé binni

 5. Xiñee naca ni gudixe Jesús pur binni ti regalu stiʼ Jehová para lii

Ruuyaʼ ca xhamigu Jehová ni biaxa pur laacaʼ casi ti regalu stibe para laacaʼ. Para gunibiaʼtu tobi de laacabe, laguundaʼ Gálatas 2:20 ne laiquiiñeʼ pregunta riʼ para güitu diidxaʼ:

• ¿Xi diidxaʼ biquiiñeʼ apóstol Pablo para gusihuinni ruuyaʼ ni biaxa pur laa casi ti regalu para laa?

Cumu bichee Adán la? guti ne bitiidiʼ guendaguti guiráʼ ca xiiñiʼ. Peru biseendaʼ Jehová Xiiñiʼ lu Guidxilayú riʼ para gatiʼ ne zacá ganda guibániluʼ sin qué chuʼ dxi gátiluʼ.

Ora gúʼndaluʼ ca versículo riʼ, bixuiʼlú ximodo biʼniʼ sentir Jehová ora biʼyaʼ cayuninácabe Xiiñiʼ. Laguundaʼ Juan 19:1-7 ne 16-18, ne laiquiiñeʼ pregunta riʼ para güitu diidxaʼ:

• ¿Ximodo runi sentirluʼ ora guiníʼ íqueluʼ ni biʼniʼ Jehová ne Jesús pur lii?

 XI BIZÍʼDINU

Pur guendaguti stiʼ Jesús zanda guni perdonar Jehová laanu ne laaca zanda guibáninu sin qué chuʼ dxi gátinu.

Xi biziidiluʼ

• ¿Xiñee guti Jesús?

• ¿Ximodo nga gudixe Jesús, ti hombre perfectu, «biaʼca ni biniti» Adán?

• ¿Ximodo zanda gacané guendaguti stiʼ Jesús lii?