Ani namanga ingapai, kini rungo, na kini kpiki mbiko gu bambata arogotise nangia Adamu na Eva nabasasangba Mbori. a Ono gaani akpakarapai re ayugongo gupai nga ani zanga maabangirise te. Yekova ima zakagene furani tipa ka batasarani be ingapai na kpio vurube Wiriko nga, Yesu Kristo. Baibiri nayugo gupai nga Yesu afu motumo tumorii vurube kpioko. Motumo nga guhe i afuhe tipa ka tumo boro. Guhe Yesu atumo na ni nga gu ungako nadu ni rengberengbehe. (Mo gedi Matayo 20:28.) Ho Yesu afutiko ni ka kpi tipa aboro gbia nyenye unga auru kpotosende, ko azakigene furani berewe ani gbia agu ahe dunduko Adamu na Eva aingisihe. Yesu ayugu bakio wai a ko gbiati Yekova nakpinyemurani. Gi wirikapai re nika undo ro ka kiiso gamo tambuahe tipa pakpio Yesu.

1. Waigu rengbe ani ka gbia undo ti pakpio Yesu areme?

Bambiko ani nga aboro ingapai, ani namanga dungu apai nga gu nasa gberãrago ti Yekova. Wa vura duhe wo, ka ani biratirani ti gaani aingapai na ki sana Yekova vurube Yesu Kristo ko mbupai furani, na ani kini mangi asadatise ka zanga manga kina agu aingapai re, ani ima rengba ka gbia ngbarago ti mbembedi pabakure na Mbori. (1 Yoane 2:1) Baibiri naya: ‘Kristo ahi apai [kpi] a tipa ingaapai bara sa, ruru boro ku ba aboro ingapai, ya ko gasi rani koyo du Mbori ni.’—1 Petero 3:18.

2. Waigu rengbe ani ka gbia undo ti kpio Yesu kumbatayo?

Yekova akedi Yesu ko fu gu ungako nadu ni rengberengbe he ‘ya gu ni ka idi pa [Yesu] ni kpi nga te, ono nyenye unga du adu be ni.’ (Yoane 3:16) Mbiko gupai Yesu amangihe re, barambeda, Yekova nika mbakada gu gbegberẽ apai dunduko Adamu amangihe mbiko zanga giasangba. Gipai re nayugo gupai nga ka ani du na idapase kuti ga Yesu motumo, ani duadu na momu tipa ka raka na ngbarago rogo paradizo auru kpotosende!—Yesaya 65:21-23.

 MO WIRIKI KURA DUNGU APAI

3. Kpio Yesu afu ranirii furani be ingapai na kpio

1. Adamu angia rengberengbe kumba nga gu ko na basasangba Mbori na ki sa gupai nga aboro dunduko du ngba gu gene nandu koyo du ingapai ni na kpio

2. Yesu angia rengberengbe kumba nga gu ko na gisangba Mbori na na mbiko gipai re, aboro dunduko du na momu ka da ni rengberengbe yo na ki raki nyeanye kindi

4. Kpio Yesu ima rengba ka fu undo fu aboro dunduko

 5. Motumo nga ga Yekova gamahe foro

Abakurea Yekova nabi motumo wa gu gamahe i nagamuhe fu kina boro yo nitiyo. Ni kpiapai, mo gedi AGaratio 2:20, na tifuoho, mo ki sakipai tipa gi sanahe re:

• Waigu gu mokedi nangia Pauro ayugu gupai nga ko aabi motumo wa gu gamahe i nagamuhe fuko?

Ho Adamu aingipai ni, i asari ngbanga ko gbiati awiriko sa kina kpio. Ono Yekova akedi Wiriko ko kpi tipa ro wa ka mo rengbe ka du na momu ka raka na ngbarago nyeanye kindi.

Wa mo nikaa gedi agi veresi re, mo makianga wai Yekova arengbe kadu ho Wiriko aarungo ni. Mo gedi Yoane 19:1-7, 16-18, na tifuoho, mo ki sakipai tipa gi sanahe re:

• Waigu mo abi gupai Yekova gbiati Yesu amangihe foro re?

 GINIPAI MO NAWIRIKIHE?

Kpio Yesu naasa Yekova ko mbupai furani ti gaani aingapai, na si nafu momu furani ani raki nyeanye kindi na ngbarago.

Fugöpai

• Tipagine Yesu akpi ti ni?

• Rogo gini gene Yesu afu rengberengbe ungako ni motumo?

• Waigu kpio Yesu narengbe ka undo ro?