Sɛ wʋ ɔhɔnwʋ ɩfa akyɛdɩ kɩnlɩma be ɩma wʋ a, kɛ ɩma ɛtɩ nɣanlɩ ese a? Ɩma wʋ anyɩ ide na ɩkã wʋ ma ɛyɛ dɩyɛ be ɛfa ekile kɛɛ, wʋ anyɩ ɩsɔ akyɛdɩ mɔɔ ɩva ɩma wʋ nɩ. Akyɛdɩ kezile mɔɔ ɩtɛla ebiyela mɔɔ Gyehova nɩɩ Gyisɛsɩ bɛva bɛma yɛ nɩ yɛ lɛ elelɛdɩyɛ nɩ. Kɛ ɩkɛyɛ na yɛahile nwʋmɔ anyɩnlɩzɔlɛ a?

1. Mɩnla ɔhʋanɩ ɔkʋ̃ yɛ yɛkɔhʋla yekoluwa zʋ yekehile kɛɛ, yɛ anyɩ ɩsɔ mɔɔ Nyamɩnlɩ nɩɩ Kɩlayɩsɩ bɛyɛ bɛma yɛ nɩ a?

Bayɩbʋlʋ yɩ ɩbɔ anʋhʋba kɛɛ “abiyela mɔɔ ikele [Gyisɛsɩ] ikeli nɩ” ɩkɔhʋla ikenyia nnwʋanlɩ mɔɔ íni awielɩyɛ. (Dwɔɔnʋ 3:16) Kɛ yɛkɛyɛ eyi yekeze a? Ɩsɛ kɛɛ yekile kɛɛ yede Gyisɛsɩ yedi iluwa abɔkɔ mɔɔ yesizi nɩɩ yɛ nyɛlɩyɛ zʋ. (Gyemisi 2:17) Sɛ yɛda ye dedi ali iluwa yɛ nyɛlɩyɛ nɩɩ odwokɔ mɔɔ yɛkã zʋ a, nɩ yɛhyɛɛ ɔhɔnwʋvalɛ mɔɔ yɛ nɩɩ Gyisɛsɩ nɩɩ yɩ Zɩ Gyehova wɔ yi nu ɛzɩzɩbɛ.—Kɩnga Dwɔɔnʋ 14:21.

2. Mɩnla egyimalilɛ titili yɛ ɩbʋwa yɛ ma yekile mɔɔ Gyehova nɩɩ Gyisɛsɩ bɛyɛ bɛma yɛ nɩ nwʋ anyɩnlɩzɔlɛ a?

Ohunluma mɔɔ ansaana Gyisɛsɩ ibawu nɩ, ihileli yɩ adʋwavʋlɔ yɩ ɔhʋanɩ fʋlɔ mɔɔ boluwá ɔzʋlɔ behile yɩ afɔlɩ nɩ nwʋ anyɩnlɩzɔlɛ. Ɩhanlɩ ihileli bɛ kɛɛ, beyiyia numɔ na bɛyɛ dɩyɛ titili be mɔɔ Bayɩbʋlʋ ɩfʋlɔ yɩ “Niibenyia Yɩ Alɩyɛ” mɔɔ besia bɔfʋlɔ yɩ Kɩlayɩsɩ Yi Owulo Nwʋ Ɛhakɛlɛlilɛ. (1 Kɔlɛntɩmaa 11:20) Nɩ Gyisɛsɩ ɩpɛ kɛɛ yɩ asʋ̃mavʋlɔ nɩ mmɔ nɩɩ nɔhʋanlɛ Kilisinyiamaa mɔɔ bɛkɛɣa aɣinzi nɩ bɛkakɛ kɛɛ, ɩvalɩ yɩ nnwʋanlɩ ɩwɔlɩ afɔlɩ ɩmanlɩ yɛ. Mɔɔ ɩfalɩ ayiyialɩyɛ eyi nwʋ nɩ, Gyisɛsɩ ɩhanlɩ kɛɛ: “Bɛyɛ́ eyi bɛva bɛhakɛ mɩ.” (Luuku 22:19) Sɛ ɔkɔ Ɛhakɛlɛlilɛ yɩ be a, nɩ ɛdaa yɩ ali kɛɛ wʋ anyɩ ɩsɔ ɔlɔlɛ kezile mɔɔ Gyehova nɩɩ Gyisɛsɩ bɛla yɩ ali behile yɛ nɩ baaba.

 SUMÁ SƲ̃MAA

3. Mɩnla yɛ yɛkɛyɛ yɛkɛva yekehile kɛɛ yɛ anyɩ ɩsɔ yɩ a?

Fá yɩ kɛɛ ɔdɔ nzulo nu mɔɔ ɔnʋmaa, yɛ abiye ileli wʋ nnwʋanlɩ a. Asʋ̃ wʋ ɛɣɛɛlɛ ikevi mɔɔ enii kʋ̃ nɩ ɩyɛlɩ ɩmanlɩ wʋ nɩ a? Anzɛnyɩɩ sa ɛpɩbɛ ɔhʋanɩ azʋlɔtʋ mɔɔ ɛkɛva ekehile kɛɛ wʋ anyɩ ɩsɔ mɔɔ ɩyɛlɩ ɩmanlɩ wʋ nɩ?

Mɔɔ Gyehova ɩyɛlɩ nɩ ti, yenyia ɔnwʋmɔ ɔhʋanɩ kɛɛ yɛkɔwʋwa azɩ daabaa eɣile be. Kɩnga 1 Dwɔɔnʋ 4:8-10, na akʋ̃ bozunzú ndwokɔɣizialɛ eyimmɔ nwʋ:

• Mɩnla ti mɔɔ Gyisɛsɩ yɩ afɔlɩ nɩ, ɩdɩ akyɛdɩ mɔɔ ɩtʋ bʋlɔ a?

• Mɔɔ Gyehova nɩɩ Gyisɛsɩ bɛyɛ bɛma wʋ nɩ, kɛ ɩma ɛtɩ nɣanlɩ ese a?

Mɩnla yɛ yɛkɛyɛ na yɛava yɛahile kɛɛ yɛ anyɩ ɩsɔ mɔɔ Gyehova nɩɩ Gyisɛsɩ bɛyɛ bɛma yɛ nɩ a? Kɩnga 2 Kɔlɛntɩmaa 5:15 nɩɩ 1 Dwɔɔnʋ 4:11; 5:3. Sɛ bɛkɩnga numɔ ɔkʋ̃ bela bowie a, bozunzú odwokɔɣizialɛ eyi nwʋ:

• Kɛmɔ ɛhɛlɛlɛ odwokɔ yɩ ɩkã nɩ, mɩnla yɛ yɛkɛyɛ na yɛava yɛahile nwʋmɔ anyɩnlɩzɔlɛ a?

4. Sumazumá Gyisɛsɩ

Ɔhʋanɩ fʋlɔ mɔɔ yɛkɔhʋla yekoluwa ɔzʋlɔ yekehile anyɩnlɩzɔlɛ yɛ lɛ kɛɛ yekozumazuma Gyisɛsɩ. Kɩnga 1 Pita 2:21, na akʋ̃ bozunzú odwokɔɣizialɛ eyi nwʋ:

• Mɩnla ɔhʋanɩ zʋ yɛ yɛkɔhʋla yɛkɛva Kɩlayɩsɩ yɩ agyia a?

• Mɩnla yɛ ɩkɔlɩ ɔzʋlɔ wɔ Ɛhakɛlɛlilɛ yɩ tʋ a?

 YƖ DƆKƆWƆLƐ

Sɛ yenyia Gyisɛsɩ nu dedi na yɛkɔ yi owulo nwʋ Ɛhakɛlɛlilɛ yɩ tʋ a, nɩ yɛdaa yɩ ali kɛɛ yɛ anyɩ ɩsɔ mɔɔ ɩyɛ ɩma yɛ nɩ.

Kɛ Okowuwa Ekeze a?

• Kɛ abiye ikenyia Gyisɛsɩ yi nu dedi nɩ, kɛ yɩ tʋ ikile a?

• Mɩnla yɛ ɛpɛ kɛɛ ɛyɛ ɛfa ekile kɛɛ wʋ anyɩ ɩsɔ mɔɔ Gyehova nɩɩ Gyisɛsɩ bɛyɛ bɛma wʋ nɩ a?

• Mɩnla ti mɔɔ nwʋmɔ ihyinyia paa kɛɛ, ɔkɔhɔ Kɩlayɩsɩ yi owulo nwʋ Ɛhakɛlɛlilɛ yɩ be a?