አንድ ጓደኛህ ጥሩ ስጦታ ቢሰጥህ ምን ይሰማሃል? በጣም እንደምትደሰትና ለስጦታው ያለህን አድናቆት ለጓደኛህ ማሳየት እንደምትፈልግ የታወቀ ነው። ይሖዋና ኢየሱስ ከሁሉ የላቀ ስጦታ ሰጥተውናል። ይህ ስጦታ ምንድን ነው? ለዚህ ስጦታ አድናቆት እንዳለን ማሳየት የምንችለውስ እንዴት ነው?

1. አምላክና ክርስቶስ ላደረጉልን ነገር አድናቆት እንዳለን የምናሳይበት አንዱ መንገድ ምንድን ነው?

መጽሐፍ ቅዱስ ‘በኢየሱስ የሚያምን ሁሉ’ የዘላለም ሕይወት እንደሚያገኝ ይናገራል። (ዮሐንስ 3:16 የግርጌ ማስታወሻ) በኢየሱስ እንደምናምን ማሳየት የምንችለው እንዴት ነው? ‘በኢየሱስ አምናለሁ’ ብሎ መናገር ብቻ በቂ አይደለም። ድርጊታችንም ሆነ በሕይወታችን የምናደርገው ምርጫ በኢየሱስ እንደምናምን የሚያሳይ ሊሆን ይገባል። (ያዕቆብ 2:17) በቃልም ሆነ በድርጊት እምነታችንን ስናሳይ ከኢየሱስና ከአባቱ ከይሖዋ ጋር ያለን ወዳጅነት ይጠናከራል።—ዮሐንስ 14:21⁠ን አንብብ።

2. ይሖዋና ኢየሱስ ላደረጉልን ነገር አድናቆታችንን ለማሳየት የሚያስችለን የትኛው ልዩ ዝግጅት ነው?

ኢየሱስ፣ ከመሞቱ በፊት በነበረው ምሽት ላይ ተከታዮቹ ለቤዛው ያላቸውን አድናቆት ማሳየት የሚችሉበትን ሌላ መንገድ ተናግሯል። መጽሐፍ ቅዱስ “የጌታ ራት” በማለት የሚጠራውን ልዩ በዓል አቋቁሟል፤ ይህ በዓል የክርስቶስ ሞት መታሰቢያ ተብሎም ይታወቃል። (1 ቆሮንቶስ 11:20) ኢየሱስ ይህን በዓል ያቋቋመው ሐዋርያቱና ከእነሱ በኋላ የሚመጡት እውነተኛ ክርስቲያኖች በሙሉ እሱ ለእኛ ሲል ሕይወቱን መስጠቱን እንዲያስታውሱ ነው። ኢየሱስ ይህን በዓል አስመልክቶ “ይህን ሁልጊዜ ለመታሰቢያዬ አድርጉት” የሚል ትእዛዝ ሰጥቷል። (ሉቃስ 22:19) በመታሰቢያው በዓል ላይ ስትገኝ ይሖዋና ኢየሱስ ለሰው ልጆች ላሳዩት ጥልቅ ፍቅር ያለህን አድናቆት ታሳያለህ።

 ጠለቅ ያለ ጥናት

3. አድናቆት ለተግባር ያነሳሳል

ውኃ ውስጥ ልትሰጥም ስትል አንድ ሰው አዳነህ እንበል። ይህ ሰው ያደረገልህን ነገር ትረሳዋለህ? ወይስ ላደረገልህ ነገር አድናቆትህን ለመግለጽ ትሞክራለህ?

የዘላለም ሕይወት የማግኘት አጋጣሚ የተከፈተልን በይሖዋ ደግነት ነው። አንደኛ ዮሐንስ 4:8-10⁠ን አንብቡ፤ ከዚያም በሚከተሉት ጥያቄዎች ላይ ተወያዩ፦

• የኢየሱስ መሥዋዕት ልዩ ስጦታ ነው የምንለው ለምንድን ነው?

• ይሖዋና ኢየሱስ ስላደረጉልህ ነገር ምን ይሰማሃል?

ይሖዋና ኢየሱስ ላደረጉልን ነገር አድናቆታችንን ማሳየት የምንችለው እንዴት ነው? ሁለተኛ ቆሮንቶስ 5:15⁠ን እንዲሁም 1 ዮሐንስ 4:11⁠ን እና 5:3⁠ን አንብቡ። እያንዳንዱን ጥቅስ ካነበባችሁ በኋላ በሚከተለው ጥያቄ ላይ ተወያዩ፦

• በዚህ ጥቅስ መሠረት አድናቆታችንን ማሳየት የምንችለው እንዴት ነው?

4. ኢየሱስን ምሰል

አድናቆታችንን ማሳየት የምንችልበት ሌላው መንገድ ኢየሱስን መምሰል ነው። አንደኛ ጴጥሮስ 2:21⁠ን አንብቡ፤ ከዚያም በሚከተለው ጥያቄ ላይ ተወያዩ፦

• የኢየሱስን ፈለግ በጥብቅ መከተል የምትችለው በየትኞቹ መንገዶች ነው?

• በመታሰቢያው በዓል ላይ ምን ነገሮች ይከናወናሉ?

 ማጠቃለያ

በኢየሱስ እንደምናምን በተግባር በማሳየትና የሞቱን መታሰቢያ በማክበር ኢየሱስ ላደረገልን ነገር አድናቆታችንን ማሳየት እንችላለን።

ክለሳ

• በኢየሱስ እንደምናምን ማሳየት የምንችለው እንዴት ነው?

• ይሖዋና ኢየሱስ ላደረጉልህ ነገር አድናቆትህን ለማሳየት ያሰብከው በምን መንገድ ነው?

• የክርስቶስን ሞት መታሰቢያ ማክበር በጣም አስፈላጊ የሆነው ለምንድን ነው?