LEKSION 28
Ipakita ang Apresasyon sa Ginhimo ni Jehova kag ni Jesus Para sa Imo
Ano ang batyagon mo kon hatagan ka sang imo abyan sang manami nga regalo? Sigurado malipay ka gid, kag pasalamatan mo sia. Ginhatagan kita ni Jehova kag ni Jesus sing pinakamaayo nga regalo. Ano ini, kag paano naton ipakita nga nagapasalamat kita sa sini?
1. Ano ang isa ka paagi nga mapakita naton ang apresasyon sa ginhimo sang Dios kag sang Cristo para sa aton?
Ang Biblia nagpromisa nga ‘ang tanan nga nagatuo kay Jesus’ mabuhi sing wala katapusan. (Juan 3:16) Paano naton mapakita nga nagatuo kita kay Jesus? Indi lang basta nga nagapati kita kay Jesus. Kundi dapat makita sa aton mga desisyon kag mga ginahimo nga nagatuo kita sa iya. (Santiago 2:17) Kon ang aton pagtuo makita sa aton ginahimo kag ginahambal, magabakod ang aton pagpakig-abyan kay Jesus kag sa iya Amay, nga si Jehova.—Basaha ang Juan 14:21.
2. Ano nga espesyal nga okasyon nga mapakita naton ang pagpasalamat sa ginhimo ni Jehova kag ni Jesus sa aton?
Sang gab-i antes mapatay si Jesus, ginsilingan niya ang iya mga sumulunod nga may isa pa ka paagi nga mapakita ang pagpasalamat sa iya halad. Ginsugdan niya ang espesyal nga okasyon nga ginatawag sang Biblia nga “Panihapon sang Ginuo,” ukon ang Memoryal sang kamatayon sang Cristo. (1 Corinto 11:20) Ginhimo ini ni Jesus para dumdumon sang iya mga apostoles, kag sang tanan nga matuod nga Cristiano sang ulihi, nga ginhatag niya ang iya kabuhi para sa aton. Gani ginsugo sila ni Jesus: “Padayon ninyo nga himua ini sa pagdumdom sa akon.” (Lucas 22:19) Kon magtambong ka sa Memoryal, ginapakita mo nga nagapasalamat ka sa daku nga gugma nga ginpakita ni Jehova kag ni Jesus sa aton.
USISAA PA GID
Usisaon naton ang iban pa nga paagi nga mapakita naton ang apresasyon sa daku nga gugma ni Jehova kag ni Jesus. Hibaluon naton kon ngaa importante ang Memoryal sang kamatayon sang Cristo.
3. Ipakita ang imo pagpasalamat
Imadyina nga may nagluwas sa imo sang daw malumos ka na. Kalimtan mo na lang bala ang ginhimo sang nagbulig sa imo? Ukon mangita ka sing paagi para pasalamatan sia sa iya ginhimo?
Si Jehova ang naghatag sa aton sing kabuhi. Basaha ang 1 Juan 4:8-10, dayon binagbinaga ini nga mga pamangkot:
-
Ngaa ang halad ni Jesus espesyal nga regalo?
-
Ano ang ginabatyag mo sa ginhimo ni Jehova kag ni Jesus para sa imo?
Paano naton mapakita ang apresasyon sa ginhimo ni Jehova kag ni Jesus para sa aton? Basaha ang 2 Corinto 5:15 kag 1 Juan 4:11; 5:3. Pagkatapos mabasa ang kada bersikulo, binagbinaga ini nga pamangkot:
-
Base sa sina nga bersikulo, paano naton mapakita ang aton pagpasalamat?
4. Iluga si Jesus
Ang isa pa ka paagi nga mapakita naton ang aton apresasyon amo ang pag-ilog kay Jesus. Basaha ang 1 Pedro 2:21, dayon binagbinaga ini nga pamangkot:
-
Paano mo masunod sing maayo ang mga ginhimo ni Jesus?
Gintun-an gid ni Jesus ang Pulong sang Dios, ginsugid ang maayong balita, kag ginbuligan ang iban
5. Magtambong sa Memoryal sang kamatayon sang Cristo
Para mahibaluan mo kon ano ang natabo sa una nga Panihapon sang Ginuo, basaha ang Lucas 22:14, 19, 20. Dayon binagbinaga ini nga mga pamangkot:
-
Ano ang natabo sa Panihapon sang Ginuo?
-
Ano ang ginarepresentar sang tinapay kag sang alak?—Tan-awa ang bersikulo 19 kag 20.
Gusto ni Jesus nga saulugon sang iya mga disipulo ang Panihapon sang Ginuo sing makaisa kada tuig sa anibersaryo sang iya kamatayon. Gani ang mga Saksi ni Jehova nagatipon kada tuig para dumdumon ang kamatayon sang Cristo suno sa iya sugo. Para may ideya ka sa sining importante nga okasyon, tan-awa ang VIDEO. Dayon binagbinaga ang masunod nga pamangkot.
-
Ano ang ginahimo kon Memoryal?
Ang tinapay nagarepresentar sa perpekto nga lawas ni Jesus bilang tawo nga ginhalad niya para sa aton. Ang alak nagarepresentar sa iya dugo
KON MAGSILING ANG IBAN: “Magtuo ka lang kay Jesus maluwas ka na.”
-
Paano mo gamiton ang Juan 3:16 kag Santiago 2:17 para ipaathag nga may dapat pa himuon?
SUMARYO
Mapakita naton ang apresasyon sa ginhimo ni Jesus para sa aton paagi sa pagtuo sa iya kag pagtambong sa Memoryal sang iya kamatayon.
Rebyu
-
Paano naton mapakita nga nagatuo kita kay Jesus?
-
Paano mo mapakita ang imo apresasyon sa ginhimo ni Jehova kag ni Jesus para sa imo?
-
Ngaa importante ang pagtambong sa Memoryal sang kamatayon sang Cristo?
DUGANG NGA IMPORMASYON
Bangod napatay ang Cristo para sa aton, ano ang ginapahulag sini sa aton nga himuon?
Basaha kon ano ang pagtuo kag kon paano naton ini mapakita.
“Magtuo sa mga Promisa ni Jehova” (Ang Lalantawan, Oktubre 2016)
Basaha ang sugilanon nga “Malipayon Na Ako kag Wala Na Nangil-ad sa Akon Kaugalingon,” kon ano ang epekto sa isa ka babayi sang natun-an niya ang parte sa halad sang Cristo.
“Ang Biblia Nagapabag-o sang Kabuhi” (Ang Lalantawan, Agosto 1, 2011)
Hibalua kon ngaa diutay lang ang nagapakig-ambit sa tion sang Memoryal.
Basi Manamian Ka Man
MGA PIRME GINAPAMANGKOT
Ano ang Pagtuon sa Biblia nga Ginatanyag sang mga Saksi ni Jehova?
Ang interactive nga programa nga ginatanyag sang mga Saksi ni Jehova libre lang, kag puede mo gamiton ang bisan ano nga translation sang Biblia nga gusto mo. Mahimo mo man hagaron ang imo bilog nga pamilya ukon ang bisan sin-o nimo nga abyan nga mag-upod sa imo.
