LESENI 28
Iehova Bona Iesu Dekenai Tanikiu Karana Oi Hahedinaraia
Emu turana ese oi dekenai harihari gauna namona ta ia henia neganai, emu hemami be edena bamona? Toana be do oi moale bada bona unai harihari gauna dainai do oi ura emu turana oi tanikiu henia, ani? Iehova bona Iesu ese ita dekenai harihari gauna hereadaena ta idia henia. Unai harihari gauna be dahaka, bona edena dala ai do ita hahedinaraia ita laloa bada?
1. Dirava bona Keriso ese ita totona idia karaia gaudia dainai idia ita tanikiu henia dalana ta be dahaka?
Baibel ia gwauhamata, “[Iesu] idia abidadama henia taudia ibounai” be mauri hanaihanai do idia abia. (Ioane 3:16) Edena dala ai abidadama do ita hahedinaraia? Namona be iseda kara bona ita abia hidi gaudia amo abidadama karana ita hahedinaraia. (Iamesi 2:17) Iseda kara bona hereva amo abidadama ita hahedinaraia neganai, iseda hetura karana Iesu bona ena Tamana, Iehova ida do ita hagoadaia.—Ioane 14:21 duahia.
2. Edena nega ai Iehova bona Iesu dekenai iseda tanikiu karana ita hahedinaraia diba?
Iesu ena hanuaboi ginigabena ai, iena murinai idia raka taudia dekenai ena boubou gauna dainai tanikiu karana do idia hahedinaraia dalana ma ta ia gwauraia. Ia ese spesel hebouna ta, Baibel ese ia gwauraia “Lohiabada Ena Anibou” eiava Keriso ena Memorial ia hamatamaia. (1 Korinto 11:20) Iesu ese unai hebou ia hamatamaia, badina ia ura ena aposetolo taudia bona gabeai Keristani taudia korikoridia ibounai ese iena mauri ia henia karana do idia laloatao. Unai hebou totona, Iesu ese inai hahegani ia henia: “Inai do umui karaia noho lau umui laloatao totona.” (Luka 22:19) Memorial hebouna oi lao neganai, oi hahedinaraia Iehova bona Iesu ese ita idia lalokau henia karana oi laloa bada.
DIBA MA HAIDA ABIA
Iehova bona Iesu ese idia hahedinaraia lalokau karana oi laloa bada daladia ma haida oi stadilaia. Bona Keriso ena Memorial be mai anina bada ena badina oi laloa.
3. Dahaka do ita karaia tanikiu karana ita hahedinaraia totona?
Mani oi laloa, oi be nahu oi diba lasi bona sinavai lalonai oi moru. Bena ta ia mai bona oi ia hamauria. Unai tauna ese ia karaia karana do oi laloaboio sibona, a? Eiava dala do oi karaia ia dekenai tanikiu karana oi hahedinaraia, a?
Iehova ena hebogahisi dainai mauri hanaihanai ita abia diba. Ioane Ginigunana 4:8-10 duahia, bena inai henanadai herevalaia:
-
Dahaka dainai Iesu ena boubou be harihari gauna hereadaena?
-
Iehova bona Iesu ese oi totona idia karaia karana dainai emu hemami be edena bamona?
Edena dala ai Iehova bona Iesu ese ita totona idia karaia karana dainai, tanikiu karana do ita hahedinaraia? Korinto Iharuana 5:15 bona 1 Ioane 4:11; 5:3 duahia. Unai siri ta ta duahia murinai, inai henanadai herevalaia:
-
Unai Baibel siri hegeregerena, tanikiu karana hahedinaraia totona dahaka do ita karaia?
4. Iesu tohotohoa
Tanikiu karana ita hahedinaraia dalana ta be Iesu ita tohotohoa. Petero Ginigunana 2:21 duahia, bena inai henanadai herevalaia:
-
Edena dala ai Iesu ita badinaia namonamo diba?
Iesu be Dirava ena Hereva ia lalokau henia, sivarai namona ia harorolaia, bona ma haida ia durua.
5. Iesu Ena Mase Laloatao hebouna dekenai oi lao
Lohiabada Ena Anibou ai idia vara gaudia oi diba totona, Luka 22:14, 19, 20 duahia. Bena inai henanadai herevalaia:
-
Lohiabada Ena Anibou ai dahaka ia vara?
-
Paraoa bona wain ese dahaka idia laulaulaia?—Siri 19 bona 20 itaia.
Iesu ia ura iena hahediba taudia ese Lohiabada Ena Anibou be lagani ta ta ai, iena mase dinana ai nega tamona sibona do idia karaia. Unai dainai, Iesu ena hahegani hegeregerena lagani ta ta ai Iehova ena Witnes taudia be Keriso ena mase laloatao totona idia hebou. Inai mai anina bada hebouna dibaia totona, VIDIO itaia. Bona henanadai herevalaia.
-
Memorial hebouna ai dahaka ia vara?
Paraoa bona wain ese gau ta idia laulaulaia. Paraoa be Iesu ena tauanina goevadaena ita totona ia bouboulaia gauna ia laulaulaia. Wain be iena rara ia laulaulaia
HAIDA IDIA GWAU: “Do oi karaia gauna tamona sibona be Iesu oi abia dae emu hahemauri tauna.”
-
Edena dala ai Ioane 3:16 bona Iamesi 2:17 amo, do oi hahedinaraia gau ma haida ita karaia danu be namo?
POINT BADANA
Iesu ese ita dainai ia karaia karana ita laloa bada totona, namona be ia ita abidadama henia, bona iena mase laloatao hebouna dekenai ita lao.
Riviu
-
Edena dala ai Iesu do ita abidadama henia?
-
Edena dala ai do oi ura hahedinaraia Iehova bona Iesu ese oi totona idia karaia gauna oi laloa bada?
-
Dahaka dainai Keriso ena mase ena Memorial hebouna dekenai ita lao be mai anina bada?
REFERENS ITAIA
Keriso ena mase ese ita ia durua dahaka ita karaia totona?
Abidadama karana bona unai ita karaia dalana oi dibaia.
“Iehova Ena Gwauhamata Oi Abidadama Henidia” (Gima Kohorona, October 2016)
Inai sivarai, “Lau Mamia Egu Mauri Ia Goeva, Bona Lau Moale” oi duahia, hahine ta be Keriso ena boubou gauna ia dibaia karana ese ia durua.
“Baibel ese Mauri Ia Haidaua” (Gima Kohorona, August 1, 2011)
Haida sibona be Memorial hebouna ai paraoa idia ania bona wain idia inua ena badina oi dibaia.
Reana Inai Danu Oi Ura
Momo Edia Henanadai
Iehova Ena Witnes Taudia be Dahaka Baibel Stadi Kosi Idia Karaia?
Iehova Ena Witnes Taudia ese idia karaia Baibel stadi be davana lasi, bona oi ura henia Baibel oi gaukaralaia diba. Emu ruma bese eiava turadia oi boiria diba stadi lalonai idia helai totona.
