LEKSION 28
Ipasingammu i Pappabalo ta Kiningngua ni Jehova Anna ni Jesus
Anni i matageno mu nu iniddan naka na kofummu tu makakkasta nga regalu? Siempre magayayya ka anna kayà mu nga ipasingan nga appresiammu i niyawana. Niyawa ni Jehova anna ni Jesus i kakastan nga regalu nga awayya tam malawa. Anni yatun? Kunnasi tam mepasingan i pappabalo tam tatun?
1. Anni i makua tam tapenu mepasingan i pappabalo tam ta kiningngua na Dios anna ni Cristo?
Nipromesa na Biblia nga mattolay tu mannanayun “ngamin i mangurug [kani Jesus].” (Juan 3:16) Kunnasi tam mepasingan yatun nga pangurug? Ariattam laman nga basta mangurug kani Jesus. Mawag nga ipasingattam yatun ta desisiottam ira anna ta kukukuattam. (Santiago 2:17) Nu ipasingattam i pangurug tam gukaban na kukukuan anna kakkagiattam, mapaladda tam i pakikkofuttam kani Jesus anna ta Yamana nga si Jehova.—Bibbigan i Juan 14:21.
2. Anni nga espesial nga okasion i makoffun nittam tapenu ipasingan i pappabalo tam ta kiningngua ni Jehova anna ni Jesus?
Ta gabi nige na patay ni Jesus, kinagina ta tagatuttulna ira i tadday paga nga makuada tapenu mepasingan i pappabaloda ta sakrifisiona. Nigafuna nga selebran i espesial nga okasion nga magalan ta Biblia nga “i Pamugag na Yafu,” nga magalan gapa tu Memorial na patay ni Cristo. (1 Corinto 11:20) Nibilin yatun ni Jesus ta disipulona ira anna ta ngamin nga kurug nga Cristiano tapenu iperaddam nira nga nisakrifisiona i inangona para ta ngamin. Meyannung taw nga okasion, nibilin ni Jesus: “Kuan nu yaw tu panaddamman nu niakan.” (Lucas 22:19) Nu magatende ka ta Memorial, mepasingammu i pappabalo mu ta dakal nga aya ni Jehova anna ni Jesus para nittam.
GIGIAMMUAN I ARU PAGA
Gigiammuan i karuan paga nga makuam tapenu mepasingammu i pappabalo mu ta dakal nga aya ni Jehova anna ni Jesus. Ammuan nu ngatta importante i Memorial na patay ni Cristo.
3. Kunnasi tam mepasingan i pappabalo tam?
Nonopan nga egga i nanguffun nikaw turi ta nappeligro ka. Kattamammu ngana laman kari i pinanguffunna nikaw? Onu egga i kuammu tapenu mepasingammu i pappabalo mu nisa?
Gatu tam i inango tam kani Jehova. Bibbigan i 1 Juan 4:8-10, anna paguvovugan yaw ira nga pakkiavu:
-
Ngatta espesial nga regalu i sakrifisio ni Jesus?
-
Anni i matageno mu ta kiningngua ni Jehova anna ni Jesus para nikaw?
Kunnasi tam mepasingan i pappabalo tam ta kiningngua ni Jehova anna ni Jesus para nittam? Bibbigan i 2 Corinto 5:15 anna 1 Juan 4:11; 5:3. Kabalin nga mabibbig i kada teksto, paguvovugan yaw nga pakkiavu:
-
Segun ta teksto, kunnasi tam mepasingan i pappabalo tam?
4. Parigan si Jesus
Mepasingattam paga i pappabalo tam gukaban na pamarig kani Jesus. Bibbigan i 1 Pedro 2:21, anna paguvovugan yaw nga pakkiavu:
-
Kunnasi tam matuttul tu mapia si Jesus?
Tagibaloran ni Jesus i Uvovug na Dios, nilayyagayyana i mapia nga dumug, anna inuffunanna i tanakuan
5. Magatende ta Memorial na patay ni Cristo
Bibbigan i Lucas 22:14, 19, 20 tapenu mammuan nu kunnasi neselebra i ollu nga Pamugag na Yafu. Kabalinna, paguvovugan yaw ira nga pakkiavu:
-
Anni i nesimmu ta Pamugag na Yafu?
-
Anni i irepresenta na pan anna binarayang?—Innan i versikulo 19 anna 20.
Kayà ni Jesus nga selebran na disipulona ira i Pamugag na Yafu kada ragun, ta anibersario na patayna. Zinagun nga selebran na Saksi ira ni Jehova i patay ni Cristo nga kagitta na pinasselebra da Jesus. Girawan i VIDEO tapenu mammuan i meyannung taw nga importante nga okasion. Kabalinna paguvovugan yaw nga pakkiavu:
-
Anni i makua nu Memorial?
Egga i irepresenta na pan anna binarayang. Irepresenta na pan i perfekto nga baggi ni Jesus nga nisakrifisiona para nittam. Irepresenta na binarayang i dagana
I KAGIAN NA KARUAN: “Mangurug ka laman kani Jesus ay mapaliag ka ngana.”
-
Kunnasim usan i Juan 3:16 anna Santiago 2:17 tapenu mepalippawa mu nga egga paga i kawagan?
ANNI I NAGIGIAMMUM?
Mepasingattam i pappabalo tam ta kiningngua ni Jesus para nittam gukaban na pangurug nisa anna pagatende ta Memorial na patayna.
Review
-
Anni i kebalinan na pangurug kani Jesus?
-
Kunnasim mepasingan i pappabalo mu ta kiningngua ni Jehova anna ni Jesus para nikaw?
-
Ngatta importante i pagatende ta Memorial na patay ni Cristo?
I AWAYYAM PAGA KUAN
Megafu ta patay ni Cristo, mapaguyu ittam nga kuan i anni?
Gigiammuan i aru paga meyannung ta pangurug anna nu kunnasim mepasingan yatun.
“Ipasingammu i Pangurugmu ta Promesa ira ni Jehova” (Passifusifutan, Oktubre 2016)
Ta istoria nga “Marenu Ngana i Konsensià Anna Magayayya Ngà,” innan i efekto na paggigiammu na tadday nga babay ta sakrifisio ni Cristo.
“Pakastan na Biblia i Pattolay” (Passifusifutan, Agosto 1, 2011)
Ammuan nu ngatta baddi laman i kuman tu pan anna minum tu binarayang ta Memorial.
Baka Kaya Mu Gapa i
GAGANGAY IRA NGA PAKKIAVU
Anni nga Paggigiammu ta Biblia i Iyofer na Saksi ira ni Jehova?
Ta libre nga paggigiammu nga iyofer na Saksi ira ni Jehova, awayyam usan i maski anni nga translation na Biblia. Awayyam imbitan i interu familiam onu kokkofummu ira ta pab-Bible study.
