ĨSOMO YA 28
Tũngaa Mũvea Nũndũ wa Kĩla Yeova na Yesũ Meekie Kwondũ Waku
We wĩwʼaa ata yĩla mũnyanyau waũnenga mũthĩnzĩo mwanake? Vate nzika nũtanaa mũno, na no nginya ũmwonyʼe kana nũũtũnga mũvea kwondũ wa mũthĩnzĩo ũsu. Yeova na Yesũ nĩmatũnengie mũthĩnzĩo wa vata vyũ kwĩ ũngĩ o na wĩva twĩthĩwa twaanengwa. Mũthĩnzĩo ũsu nĩ nthembo ya wovosyo. Tũtonya kwonanyʼa ata kana nĩtũtũngaa mũvea kwondũ wawʼo?
1. Nzĩa ĩmwe ya kwonanyʼa nĩtũtũngaa mũvea kwondũ wa kĩla Ngai na Klĩsto matwĩkie nĩ yĩva?
Mbivilia yaĩtye atĩĩ: “Kĩla mũndũ ũmũĩkĩĩaa [Yesũ]” nũtonya kwĩkala tene na tene. (Yoana 3:16) Twonanasya ata kana nĩtũmũĩkĩĩaa Yesũ? Nĩtwaĩle kwonanyʼa kana twĩ na mũĩkĩĩo kwĩsĩla motwi maitũ, na maũndũ ala twĩkaa. (Yakovo 2:17) Yĩla twoonanyʼa mũĩkĩĩo kwĩsĩla meko na ũneeni witũ, nĩtũlũlũmĩĩlasya ũnyanya witũ vamwe na Yesũ, na Ĩthe wake, Yeova.—Soma Yoana 14:21.
2. Nĩ ĩvinda yĩva ya mwanya twonanasya kana nĩtũtũngĩaa Yeova na Yesũ mũvea?
Ũtukũ wa mũthya Yesũ atanamba kũkwʼa, nĩwatavisye aatĩĩi make ĩũlũ wa nzĩa ĩngĩ ya kwonanasya kana nĩmatũngaa mũvea nũndũ wa nthembo yake. Nĩwambĩĩisye mũvango wa mwanya ũla Mbivilia ĩwĩtaa “Kyaũya kya Wĩoo kya Mwĩaĩi,” na nowʼo wĩtawa ũmbano wa kũlilikana kĩkwʼũ kya Yesũ. (1 Akolintho 11:20) Yesũ ambĩĩisye mũvango ũsu nĩ kana atũmwa make, na Aklĩsto onthe ma wʼo ala maĩ moke ĩtina woo, malilikanae kana nĩwaumisye thayũ wake kwondũ witũ. Aineenea ũndũ ũsu Yesũ aisye atĩĩ: “Ĩkaai ũu kwondũ wa kũndilikana.” (Luka 22:19) Yĩla wathi ũmbanonĩ wa kũlilikana kĩkwʼũ kya Yesũ, wĩthĩawa ũyonanyʼa kana nũũtũnga mũvea nũndũ wa wendo mwingĩ ũla Yeova na Yesũ matwonasya.
ĨMANYĨSYE MŨNANGO
Ĩmanyĩsye nzĩa mbingangĩ sya kwonanyʼa kana nũũtũnga mũvea kwondũ wa wendo ũla Yeova na Yesũ makwonetye. O na ĩngĩ, sisya wone nĩkĩ ũmbano wa kũlilikanaa kĩkwʼũ kya Klĩsto nĩ wa vata mũno.
3. Twonanasya kana nĩtũtũngaa mũvea kwĩsĩla meko
Kwasũanĩa ĩũlũ wa mũndũ ũnatangĩĩie thayũ waku ũikwʼĩĩa kĩwʼũnĩ. We no ũlwe nĩ kĩla mũndũ ũsu ũnakwĩkie? Kana wĩka kũmantha nzĩa sya kũmwonyʼa nũũtũnga mũvea mũno?
Ithyĩ twĩ na mwanya wa kwĩsa kũkwata thayũ ũtakathela nũndũ wa ũseo mwingĩ ũla Yeova ũtwonetye. Somai 1 Yoana 4:8-10, na ĩndĩ mũineenea makũlyo aa:
-
Nĩkĩ nthembo ya Yesũ ne mũthĩnzĩo wa mwanya mũno?
-
We weewʼa ata wavindĩĩsya ĩũlũ wa kĩla Yeova na Yesũ meekie kwondũ waku?
Tũtonya kwonanyʼa ata kana nĩtũtũngaa mũvea kwondũ wa kĩla Yeova na Yesũ matwĩkie? Somai 2 Akolintho 5:15 na 1 Yoana 4:11; 5:3. Ĩtina wa kũsoma kĩla ĩandĩko, neeneai ĩkũlyo yĩĩ:
-
Kwosana na ĩandĩko yĩu, tũtonya kwĩka ata twonanyʼe kana nĩtũtũngaa mũvea?
4. Atĩĩa ngelekanyʼo ya Yesũ
Nzĩa ĩngĩ tũtonya kwonanyʼa kana nĩtũtũngaa mũvea nĩ kwa kũatĩĩa ngelekanyʼo ya Yesũ. Somai 1 Vetelo 2:21, na ĩndĩ mũineenea ĩkũlyo yĩĩ:
-
Nĩ kwa nzĩa syĩva ũtonya kũatĩĩa nyaaĩ sya Yesũ nesa?
Yesũ nĩwendete Ndeto ya Ngai, nĩwatavanasya ũvoo mũseo, na nĩwatetheeasya andũ
5. Endaa ũmbanonĩ wa kũlilikana kĩkwʼũ kya Klĩsto
Nĩ kana mwone kĩla kyeekĩkie ĩvindanĩ ya mbee vyũ ya kũtanĩa Kyaũya kya Wĩoo kya Mwĩaĩi, somai Luka 22:14, 19, 20. Na ĩndĩ mũineenea makũlyo aa:
-
Nĩ kyaũ kyaendeeie ĩvindanĩ ya kũtanĩa Kyaũya kya Wĩoo kya Mwĩaĩi?
-
Mũkate na mbinyu syonanasya kyaũ?—Sisya mũsoa wa 19 na 20.
Yesũ endaa amanyĩwʼa make malilikanae Kyaũya kya Wĩoo kya Mwĩaĩi ĩmwe kĩla mwaka, na matukũ o ala wakwie. Kwoou, Ngũsĩ sya Yeova nĩsyũmbanaa vamwe kĩla mwaka nĩ kana ililikane kĩkwʼũ kya Klĩsto kwa nzĩa ĩla watwĩaĩe. Nĩ kana wĩmanyĩsye maũndũ maingangĩ ĩũlũ wa ũmbano ũsu, ĩloelei VITIO. Na ĩndĩ mũineenea ĩkũlyo yĩla yĩatĩĩe.
-
Nĩ kyaũ kĩendeeaa ũmbanonĩ wa kũlilikana kĩkwʼũ kya Yesũ?
Mũkate na mbinyu itũmĩawa ta ngelekanyʼo. Mũkate wonanasya mwĩĩ wa Yesũ ũte na naĩ ũla waumisye kwondũ witũ. Nayo mbinyu yonanasya nthakame yake
ANDŨ AMWE MAASYA: “Ũndũ ũla wa vata mũndũ waĩle kwĩka nĩ kana atangĩĩwe no kũmũĩkĩĩa Yesũ.”
-
Ũtonya kũtũmĩa ĩandĩko ya Yoana 3:16 na Yakovo 2:17 ata kwonyʼa mũndũ kana ve maũndũ maingangĩ mendekaa?
KĨLA TWEEMANYĨSYA
Twonanasya kana nĩtũtũngaa mũvea kwondũ wa kĩla Yesũ watwĩkie kwa kwĩthĩwa na mũĩkĩĩo kũla ũĩ, na kũendaa ũmbanonĩ wa kũlilikana kĩkwʼũ kyake.
Makũlyo ma Kũsyokeleela
-
Kũmũĩkĩĩa Yesũ kwonanasya ata?
-
We wenda kwĩka ata nĩ kana wonanyʼe nũũtũnga mũvea kwondũ wa kĩla Yeova na Yesũ makwĩkie?
-
Nĩkĩ nĩ ũndũ wa vata mũno kũendaa ũmbanonĩ wa kũlilikana kĩkwʼũ kya Klĩsto?
MAŨNDŨ ANGĨ MA KWĨMANYĨSYA
Kĩkwʼũ kya Klĩsto kĩtwĩkĩaa vinya twĩke ata?
Ĩmanyĩsye maũndũ maingangĩ ĩũlũ wa mũĩkĩĩo na ũndũ tũtonya kũwonanyʼa.
“Onanyʼa Kana Nũĩkĩĩaa Mawatho ma Yeova” (Mũsyaĩĩsya, Mwei wa 10, 2016)
Nthĩnĩ wa ngewa yĩ na kyongo, “Yu Nĩwʼaa Nĩ Mũtheu, na Nĩ Mwĩanĩe Vyũ,” sisya wone ũndũ kwĩmanyĩsya ĩũlũ wa nthembo ya Klĩsto kwatetheeisye mũndũ mũka ũmwe.
“Mbivilia Nĩalyũlaa Andũ” (Mũsyaĩĩsya, Ĩtukũ 1, Mwei wa 8, 2011)
Soma wone nĩkĩ no andũ anini maĩsaa mũkate na kũnywʼa mbinyu ũmbanonĩ wa kũlilikana kĩkwʼũ kya Klĩsto.
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
