Oꞌnon yeꞌka pe awanî ayonpaya morî tîîsaꞌ tîpo aapia? Taatausinpai awanî, moropai ayonpa pî taa amîrîya morî pe man, uwakîri pe man. Jeová moropai Jesus wanî morî puꞌkuru tîînenan pe uurînîkon tonpe. Îꞌ tîrîꞌpî toꞌya uupiaꞌnîkon? Oꞌnon yeꞌka pe morî pe man taa uurînîkonya eꞌpainon toꞌ pî?

1. Oꞌnon yeꞌka pe morî pe man taa uurînîkonya eꞌpainon Jesus pî moropai Jeová pî, îꞌ kusaꞌ toꞌya yeꞌnen?

Paapa Maimuya taa pî man ‘innape Jesus kuꞌnenan koꞌmamî ipatîkarî’. (João 3:16 TNM) Îꞌ taa yuꞌse mîrîrî wanî, innape ikuꞌtoꞌ? Îꞌ menka uurînîkonya manni, îꞌ kupî uurînîkonya manni moropai uurînîkon yeseru wenai, inna taa uurînîkonya Jesus pî moropai Jeová pî. (Tiago 2:17) Mîrîrî koneka uurînîkonya ya, uurînîkon wanî toꞌ yonpa pe. — Eraꞌmakî João 14:21.

2. Oꞌnon yeꞌka emurukuntîtoꞌ wenai, morî pe man taa urînîkonya eꞌpainon îꞌ kusaꞌ Jeová moropai Jesusya manni uurînîkon tonpe?

Ewaronya tîîsaꞌmanta irawîrî, Jesusya taꞌpî tînenupasan pî oꞌnon yeꞌka pe morî pe man taa toꞌya, mîîkîrî saꞌmantaꞌpî yeꞌnen toꞌ tonpe. Morî puꞌkuru emurukuntîtoꞌ konekatoꞌpe toꞌya taꞌpî Jesusya, mîîkîrîya taꞌpî “eeperepîkon yai entamoꞌkai”, enpanata Jesus saꞌmantatoꞌ pî. (1 Coríntios 11:20) Tînenupasanya moropai tamîꞌnawîronkon ipoitîrîtonon enpanata yuꞌse Jesus wanîꞌpî, tîîsaꞌmantatoꞌ pî uurînîkon tonpe. Mîrîrî yeꞌnem mîîkîrîya taꞌpî: “Uusaꞌmanta pîꞌ awenpenatakon pe.” (1 Coríntios 11:24) Enpanata Jesus saꞌmantatoꞌ pî emurukuntîtoꞌ ta amîrî wîtî ya, morî pe man taa amîrîya Jeová moropai Jesus pî, kureꞌnen uurînîkon saꞌnamaꞌpî toꞌya yeꞌnen.

ESENUPAKÎ INÎꞌ PANPÎꞌ

3. Oꞌnon yeꞌka pe morî pe man taa Paapa pî moropai Jesus pî

Esenumenkakî amîrî eseuronkasaꞌ tanne tuna ka, moropai pemonkonya apîikaꞌtî. Îꞌ kusaꞌ mîîkîrîya manni wanî awanmîra? Morî pe man taaya karî, îꞌ kusaiꞌya yeꞌnen amîrî tonpe?

Ipatîkarî uurînîkon koꞌmamî inîmîkî pî uurînîkon koꞌmamî. Eraꞌmatî 1 João 4:8-10. Tarîpai seeni itoꞌkoꞌ manni pî eseurîmatî:

• Îꞌ wani awanî yeꞌnen Jesus saꞌmantatoꞌ wanî morî pe puꞌkuru uurînîkon tonpe?

• Oꞌnon yeꞌka pe esepuꞌtîn pî nan, îꞌ konekaꞌpî Jeová moropai Jesusya manni amîrî tonpe?

Îꞌ koneka uurînîkonya eꞌpainon, Jeová moropai Jesusya eraꞌmatoꞌpe, uurînîkon wakîripe wanî, îꞌ konekaꞌpî toꞌya manni uurînîkon tonpe? Eraꞌmatî 2 Coríntios 5:15 moropai 1 João 4:11; 5:3. Tarîpai seeni itoꞌkoꞌ manni pî eseurîmatî:

• Seeni imenukasaꞌkon wenai, îꞌ koneka uurînîkonya eꞌpainon, Jeová moropai Jesusya eraꞌmatoꞌpe, uurînîkon wakîripe wanî, îꞌ konekaꞌpî toꞌya manni uurînîkon tonpe?

4. Jesus yeseru ipatakakî

Jesus yeseru ipataka uurînîkonya ya, morî pe man taa uurînîkonya eꞌpainon nîrî Jeová moropai Jesus pî. Eraꞌmatî 1 Pedro 2:21. Tarîpai seeni itoꞌkoꞌ manni pî eseurîmatî:

• Oꞌnon yeꞌka pe Jesus yeseru ipatakaya eꞌpainon?

• Îꞌ eꞌkupî Jesus saꞌmantatoꞌ pî emurukuntîtoꞌ ya?

 Îꞌ PÎ ESENUPA PÎ NAN?

Morî pe man taa uurînîkonya Paapa pî moropai Jesus pî, îꞌ pensa inna taa uurînîkonya ya Jesus pî moropai enpanatatoꞌ Jesus saꞌmantaꞌpî pî emurukuntîtoꞌ ya uurînîkon wîtî.

Enpanatapaiꞌnîkon

• Innape Jesus kupî, îꞌ taa yuꞌse mîrîrî wanî?

• Oꞌnon yeꞌka pe morî pe man taa eꞌpai awanî, îꞌ kusaꞌ Jeová moropai Jesusya manni pî amîrî tonpe?

• Îꞌ wani awanî yeꞌnen morî pe puꞌkuru wanî enpanatatoꞌ Jesus saꞌmantaꞌpî pî emurukuntîtoꞌ ya attî?