Кунам тыланда шергакан пӧлекым пӧлеклат, могай шижмашда лектеш? Очыни, те куанеда да айдемым пӧлекым ыштымыжлан тауштынеда. Иегова ден Иисус мыланна нимо дене таҥастараш лийдыме пӧлекым пӧлекленыт. Могай тиде пӧлек да кузе тудлан таум ышташ?

1. Юмо ден Христосым мыланна мом ыштымыштлан кузе таушташ лиеш?

Библийыште возымо дене келшышын, Иисуслан кажне ӱшаныше курымеш илен кертеш (Иоаннын 3:16). Но Иисуслан ӱшанена манын ойлаш гына ок сите. Ӱшанымашнам паша дене ончыктыман. Тудо илышыштына лукмо решенийыштына койшаш (Иаковын 2:17). Кунам ме ӱшанымашнам мут да паша дене пеҥгыдемдена, тунам Иисус да Иегова Ачаж дене эше чотрак лишыл йолташ лийына. (Иоаннын 14:21 лудын лекса.)

2. Могай ойыртемалтше событий Иегова ден Иисусым таушташ полша?

Иисусын надыржылан тауштымым ончыкташ эше ик йӧн уло. Тидын нерген Иисус колымыж деч ончыч тунемшыже-влаклан каласен. Тудо нунылан ойыртемалтше событийым палемдаш кӱштен. Тиде событийым Библийыште «Господьын кас кочкышыжо» манме; тыгак тудым Христосын колымыжым шарнымаш кас семын палат (1 Коринфян-влаклан 11:20). Иисус еҥ-влак верч илышыжым пуэн. Тидым апостолжо-влак — а вара чыла чын христиан-влакат — шарнышт манын, Иисусын кумылжо лийын. Тиде событийым палемдыме нерген Иисус теве мом каласен: «Мыйым шарнен, тыге ыштыза» (Лукан 22:19). Шарнымаш касыш миен, те Иегова ден Иисусым тауштеда да тендам чот йӧратымыштым акледа манын ончыктеда.

 КЕЛГЫНРАК ШЫМЛЕН НАЛЗА

3. Тауштымынам ончыкташлан мом ыштен кертына?

Тендам иктаж-кӧ колымаш деч утара гын, те тидым мондеда мо? Уке, докан. Те, очыни, тендам утарышылан таум ышташ йӧным кычалаш тӱҥалыда.

Иегован порылыкшылан кӧра мемнан курымеш илаш йӧнна уло. 1 Иоаннын 4:8—10 лудын лекса да вашмутым пуыза:

• Молан Иисусын надырже — тиде ойыртемалтше пӧлек?

• Иегова ден Иисусын тыланда мом ыштымышт нерген шонкалымыда годым могай шижмашда лектеш?

Кузе Иегова ден Иисуслан таум ышташ? 2 Коринфян-влаклан 5:15 да 1 Иоаннын 4:11; 5:3 лудын лекса. Кажне почеламутым лудын лекме деч вара вашмутым пуыза:

• Тиде почеламут дене келшышын, тауштымашым кузе ончыкташ лиеш?

4. Иисус деч примерым налза

Тыгак Христосын примерже почеш илен, тауштымашым ончыктен кертына. 1 Петрын 2:21 лудын лекса да вашмутым пуыза:

• Кузе те Иисус деч примерым налын кертыда?

• Шарнымаш кас кузе эртаралтеш?

 ТӰҤ ШОНЫМАШ

Иисуслан ӱшанен да тудын колымыжым Шарнымаш касыш миен, ме тӱлен налмашлан тауштымынам ончыктен кертына.

Ушештарымаш

• Иисуслан ӱшанымынам кузе ончыкташ?

• Иегова ден Иисусым тыланда мом ыштымыштлан те кузе тауштен кертыда?

• Молан Иисус Христосын колымыжым шарнымаш касыште лияш кӱлеш?