PFUNZIRO 28
Mbalatizani Kuti Mumbatenda Bzomwe Yahova na Jezu Adakucitirani
Kodi mumbabva tani xamwali wanu akakupasani mphaso yabwino kwene-kwene? Imwepo mumbakomedwa ndipo mumbafuna kulatiza xamwali wanuyo kuti mukutenda mphaso yomwe akupasaniyo. Yahova na Jezu adatipasa mphaso ikulu kwene-kwene yomwe tikhanati kuitambira kale. Kodi mphaso imweyo njiponi, ndipo tingalatize tani kuti timbatenda?
1. Kodi ni njira ibodzi iponi yomwe tingalatizire kuti tikutenda bzomwe Mulungu na Kristu adaticitira?
Bibliya limbalewa kuti “ali-wentse omwe an’khulupira [Jezu]” an’dzakhala na moyo wakusaya kumala. (Juwau 3:16) Kodi kukhulupira Jezuko kumbathandauza ciyani? Kumbathandauza kulatiza cikhulupiro cathu pa bzomwe timbasankhula na bzomwe timbacita. (Tiyago 2:17) Tikambalatiza cikhulupiro cathu pa bzomwe timbacita na kulewa, timbalimbisa uxamwali bwathu na Jezu pabodzi na Baba wace Yahova. — Werengani Juwau 14:21.
2. Kodi ni msinda wakupambulika uponi omwe umbatithandiza kulatiza kuti timbatenda bzomwe Yahova na Jezu adaticitira?
Usiku bomwe mangwana yace angadadzaphedwa, Jezu adauza ateweri wace bza njira inango yomwe angadalatizira kutenda ntsembe yace. Iye adayambisa msinda wakupambulika omwe Bibliya limbacemera kuti “Cilaliro ca Mbuya,” omwe umbacemeredwambo kuti Cikumbuso ca infa ya Kristu. (1 Akolinto 11:20) Jezu adayambisa msindayu kuti apostolo wace na Akristau omwe angadadzabwera patsogolo pace, ambakumbukire kuti iye adapereka moyo wace thangwe ra ifepano. Pakulewa bza msinda umweyu Jezu adapereka lamulo lakuti: “Pitirizani kumbacita bzimwebzi pakundikumbukira.” (Luka 22:19) Mukambagumanika pa cikumbuso mumbalatiza kuti mukutenda lufoyi likulu lomwe Yahova na Jezu analo kwa ifepano.
FUFUDZANI BZINANGO
Pfunzani njira zinango za momwe mungalatizire kutenda kwanu lufoyi likulu lomwe Yahova na Jezu adakulatizani. Pfunzanimbo kufunika kwa msinda Wakukumbukira infa ya Jezu Kristu.
3. Bzomwe tingacite kuti tilatize kutenda kwathu
Tiyezezere kuti munthu apulumusa moyo wanu. Kodi imwepo mungayebwe bzomwe munthuyo akucitirani? Ayai munganyang’ane njira zakulatizira kuti mukutenda bzomwe akucitiranibzo?
Moyo wathu ngwa Yahova. Werengani 1 Juwau 4:8-10, ndipo mukamala cezeranani mibvunzo ikutewerayi:
-
Thangwe ranyi ntsembe ya Jezu ni mphaso yakupambulika?
-
Kodi mumbabva tani thangwe ra bzomwe Yahova na Jezu adakucitirani?
Kodi tingalatize tani kutenda kwathu thangwe ra bzomwe Yahova na Jezu adaticitira? Werengani 2 Akolinto 5:15 na 1 Juwau 4:11; 5:3. Pambuyo pa kuwerenga cinembo ciri-centse, cezeranani mbvunzoyu:
-
Mwakubverana na cinemboci, n’ciyani comwe tingacite kuti tilatize kutenda kwathu?
4. Tewezerani Jezu
Njira inango yomwe tingalatize kuti tikutenda ni mwa kutewezera Jezu. Werengani 1 Pedru 2:21, ndipo mukamala cezeranani mbvunzo wakutewerayu:
-
Kodi tingatewezere tani nzayo za Jezu mwa pafupi kwene-kwene?
Jezu akhafuna Fala la Mulungu, akhapalizira mafala yabwino ndipo akhathandiza wanthu winango
5. Mbagumanikani pa Msinda wakukumbukira infa ya Kristu
Kuti muwone bzomwe bzidacitika pa msinda wakuyamba wa Cilaliro ca Mbuya, werengani Luka 22:14, 19, 20. ndipo mukamala cezeranani mibvunzo ikutewerayi:
-
N’ciyani cidacitika pa Cilaliro ca Mbuya?
-
Kodi pau na vinyu bzikuimira ciyani? — Onani vesi 19 na 20.
Jezu akhafuna kuti anyakupfunza wace ambacite msinda wakukumbukira infa yace kabodzi pa gole pa ntsiku yomwe iye adafa. Ndipopa, Mboni za Yahova zimbatsonkhana gole liri-lentse kabodzi kuti zikumbukire infa ya Kristu ninga momwe iye adalewera. Kuti mudziwe bzizinji bza msinda wakufunikayu, onani VIDIYO. Ndipo mukamala cezeranani mbvunzo wakutewerayu.
-
Kodi n’ciyani cimbacitika pa Cikumbuso?
Pau na vinyu mpsizindikiro. Pau imbaimira thupi lakulungama la Jezu lomwe adalipereka ninga ntsembe thangwe ra ifepano. Ndipo vinyu imbaimira mulopa
WANTHU WINANGO AMBALEWA KUTI: “Bzomwe mun’funika kucita kutimupulumuke ni kundokhulupira Jezu.”
-
Kodi mungaphatise tani basa cinembo ca Juwau 3:16 na Tiyago 2:17 kuti mulatize kuti pambafunika kucita bzizinji sikuti kundokhulupira Jezu?
KODI MWAPFUNZA CIYANI?
Timbalatiza kuti timbatenda bzomwe Jezu adaticitira mwa kumukhulupira na kugumanika pa msinda wakukumbukira infa yace.
Mibvunzo yakubwerezera
-
Kodi kukhulupira Jezu kumbathandauza ciyani?
-
Kodi mungalatize tani kuti mumbatenda bzomwe Yahova na Jezu adakucitirani?
-
Thangwe ranyi mpsakufunika kumbagumanika pa msinda wa Cikumbuso ca infa ya Kristu?
ONANI POMWE IBZI
Kodi infa ya Jezu imbakucitisani kufuna kucita ciyani?
Pfunzani bzizinji bza cikhulupiro na momwe tingacilatizire.
“Limbisani Cikhulupiro Canu pa Mapiciro ya Mulungu” (Ntsanza ya Mulindiri ya Outubro, 2016)
Werengani nkhani ya mkazi munango omwe moyo wace udacinja pomwe adabvesesa bzomwe ntsembe ya Jezu Kristu imbathandauza kwa iye.
“Bibliya Limbacinja Moyo wa Wanthu”(Ntsanza ya Mulindiri ya 1 Agosto, 2011)
Onani thangwe ranyi ni wanthu ang’ono-ng’ono omwe ambadya bzizindikiro pa Cikumbuso.
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
