ਜੇ ਤੁਹਾਡਾ ਕੋਈ ਦੋਸਤ ਤੁਹਾਨੂੰ ਇਕ ਵਧੀਆ ਤੋਹਫ਼ਾ ਦਿੰਦਾ ਹੈ, ਤਾਂ ਤੁਹਾਨੂੰ ਕਿੱਦਾਂ ਲੱਗੇਗਾ? ਕੀ ਤੁਸੀਂ ਖ਼ੁਸ਼ ਨਹੀਂ ਹੋਵੋਗੇ? ਅਤੇ ਕੀ ਤੁਸੀਂ ਕਿਸੇ ਤਰੀਕੇ ਨਾਲ ਇਹ ਦਿਖਾਉਣਾ ਨਹੀਂ ਚਾਹੋਗੇ ਕਿ ਤੁਸੀਂ ਉਸ ਤੋਹਫ਼ੇ ਲਈ ਕਿੰਨੇ ਅਹਿਸਾਨਮੰਦ ਹੋ? ਸਾਨੂੰ ਯਹੋਵਾਹ ਅਤੇ ਯਿਸੂ ਤੋਂ ਵੀ ਇਕ ਤੋਹਫ਼ਾ ਮਿਲਿਆ ਹੈ। ਇਸ ਤੋਂ ਵਧੀਆ ਤੋਹਫ਼ਾ ਹੋਰ ਕੁਝ ਹੋ ਹੀ ਨਹੀਂ ਸਕਦਾ। ਇਹ ਤੋਹਫ਼ਾ ਕੀ ਹੈ? ਅਤੇ ਅਸੀਂ ਕਿਵੇਂ ਦਿਖਾ ਸਕਦੇ ਹਾਂ ਕਿ ਸਾਨੂੰ ਇਸ ਦੀ ਕਦਰ ਹੈ? ਆਓ ਜਾਣੀਏ।

1. ਯਹੋਵਾਹ ਅਤੇ ਯਿਸੂ ਲਈ ਅਹਿਸਾਨਮੰਦੀ ਜ਼ਾਹਰ ਕਰਨ ਦਾ ਇਕ ਤਰੀਕਾ ਕੀ ਹੈ?

ਬਾਈਬਲ ਵਿਚ ਇਹ ਵਾਅਦਾ ਕੀਤਾ ਗਿਆ ਹੈ ਕਿ ‘ਜਿਹੜਾ ਵੀ ਯਿਸੂ ਉੱਤੇ ਆਪਣੀ ਨਿਹਚਾ ਦਾ ਸਬੂਤ ਦਿੰਦਾ ਹੈ,’ ਉਸ ਨੂੰ ਹਮੇਸ਼ਾ ਦੀ ਜ਼ਿੰਦਗੀ ਮਿਲੇਗੀ। (ਯੂਹੰਨਾ 3:16) ਨਿਹਚਾ ਦਾ ਸਬੂਤ  ਦੇਣ ਦਾ ਕੀ ਮਤਲਬ ਹੈ? ਇਸ ਦਾ ਮਤਲਬ ਇਹ ਕਹਿਣਾ ਕਾਫ਼ੀ ਨਹੀਂ ਹੈ ਕਿ ਅਸੀਂ ਯਿਸੂ ʼਤੇ ਵਿਸ਼ਵਾਸ ਕਰਦੇ ਹਾਂ, ਸਗੋਂ ਸਾਡੀਆਂ ਗੱਲਾਂ, ਕੰਮਾਂ ਅਤੇ ਫ਼ੈਸਲਿਆਂ ਤੋਂ ਸਾਡੀ ਨਿਹਚਾ ਜ਼ਾਹਰ ਹੋਣੀ ਚਾਹੀਦੀ ਹੈ। (ਯਾਕੂਬ 2:17) ਜਦੋਂ ਅਸੀਂ ਇੱਦਾਂ ਕਰਦੇ ਹਾਂ, ਤਾਂ ਯਿਸੂ ਅਤੇ ਉਸ ਦੇ ਪਿਤਾ ਯਹੋਵਾਹ ਨਾਲ ਸਾਡਾ ਰਿਸ਼ਤਾ ਮਜ਼ਬੂਤ ਹੁੰਦਾ ਹੈ।—ਯੂਹੰਨਾ 14:21 ਪੜ੍ਹੋ।

2. ਅਸੀਂ ਕਿਹੜੇ ਖ਼ਾਸ ਮੌਕੇ ʼਤੇ ਯਹੋਵਾਹ ਅਤੇ ਯਿਸੂ ਲਈ ਅਹਿਸਾਨਮੰਦੀ ਦਿਖਾ ਸਕਦੇ ਹਾਂ?

ਯਿਸੂ ਨੇ ਆਪਣੇ ਚੇਲਿਆਂ ਨੂੰ ਇਕ ਹੋਰ ਤਰੀਕਾ ਦੱਸਿਆ ਜਿਸ ਰਾਹੀਂ ਉਹ ਉਸ ਦੀ ਕੁਰਬਾਨੀ ਲਈ ਕਦਰ ਦਿਖਾ ਸਕਦੇ ਸਨ। ਆਪਣੀ ਮੌਤ ਤੋਂ ਇਕ ਰਾਤ ਪਹਿਲਾਂ ਉਸ ਨੇ ਇਕ ਰੀਤ ਸ਼ੁਰੂ ਕੀਤੀ ਜਿਸ ਨੂੰ ਬਾਈਬਲ ਵਿਚ “ਪ੍ਰਭੂ ਦਾ ਸ਼ਾਮ ਦਾ ਭੋਜਨ” ਕਿਹਾ ਗਿਆ ਹੈ। ਇਸ ਨੂੰ ਮਸੀਹ ਦੀ ਮੌਤ ਦੀ ਯਾਦਗਾਰ ਵੀ ਕਿਹਾ ਜਾਂਦਾ ਹੈ। (1 ਕੁਰਿੰਥੀਆਂ 11:20) ਯਿਸੂ ਨੇ ਇਹ ਰੀਤ ਇਸ ਲਈ ਸ਼ੁਰੂ ਕੀਤੀ ਤਾਂਕਿ ਉਸ ਦੇ ਚੇਲੇ ਅਤੇ ਉਨ੍ਹਾਂ ਤੋਂ ਬਾਅਦ ਸਾਰੇ ਸੱਚੇ ਮਸੀਹੀ ਇਹ ਯਾਦ ਕਰਨ ਕਿ ਉਸ ਨੇ ਉਨ੍ਹਾਂ ਲਈ ਆਪਣੀ ਜਾਨ ਕੁਰਬਾਨ ਕੀਤੀ ਸੀ। ਇਸੇ ਕਰਕੇ ਯਿਸੂ ਨੇ ਇਹ ਹੁਕਮ ਦਿੱਤਾ ਸੀ: “ਮੇਰੀ ਯਾਦ ਵਿਚ ਇਸ ਤਰ੍ਹਾਂ ਕਰਦੇ ਰਹੋ।” (ਲੂਕਾ 22:19) ਇਸ ਯਾਦਗਾਰ ʼਤੇ ਆ ਕੇ ਤੁਸੀਂ ਦਿਖਾ ਸਕਦੇ ਹੋ ਕਿ ਤੁਸੀਂ ਯਹੋਵਾਹ ਅਤੇ ਯਿਸੂ ਦੇ ਪਿਆਰ ਲਈ ਦਿਲੋਂ ਅਹਿਸਾਨਮੰਦ ਹੋ।

 ਹੋਰ ਸਿੱਖੋ

3. ਅਹਿਸਾਨਮੰਦ ਹੋਣ ਕਰਕੇ ਅਸੀਂ ਕੀ ਕਰਨ ਲਈ ਪ੍ਰੇਰਿਤ ਹੋਵਾਂਗੇ?

ਮੰਨ ਲਓ ਕਿ ਤੁਸੀਂ ਪਾਣੀ ਵਿਚ ਡੁੱਬ ਰਹੇ ਹੋ ਅਤੇ ਕੋਈ ਆ ਕੇ ਤੁਹਾਡੀ ਜਾਨ ਬਚਾਉਂਦਾ ਹੈ। ਕੀ ਤੁਸੀਂ ਉਸ ਵਿਅਕਤੀ ਦਾ ਅਹਿਸਾਨ ਭੁੱਲ ਜਾਓਗੇ ਜਾਂ ਸ਼ੁਕਰਗੁਜ਼ਾਰੀ ਦਿਖਾਉਣ ਲਈ ਕੁਝ ਕਰੋਗੇ?

ਸਾਨੂੰ ਹਮੇਸ਼ਾ ਲਈ ਜੀਉਣ ਦਾ ਮੌਕਾ ਦੇ ਕੇ ਯਹੋਵਾਹ ਨੇ ਸਾਡੇ ʼਤੇ ਕਿੰਨਾ ਵੱਡਾ ਅਹਿਸਾਨ ਕੀਤਾ ਹੈ। 1 ਯੂਹੰਨਾ 4:8-10 ਪੜ੍ਹੋ। ਫਿਰ ਇਨ੍ਹਾਂ ਸਵਾਲਾਂ ʼਤੇ ਚਰਚਾ ਕਰੋ:

• ਯਿਸੂ ਦੀ ਕੁਰਬਾਨੀ ਇਕ ਅਨਮੋਲ ਤੋਹਫ਼ਾ ਕਿਉਂ ਹੈ?

• ਯਹੋਵਾਹ ਅਤੇ ਯਿਸੂ ਨੇ ਤੁਹਾਡੇ ਲਈ ਜੋ ਕੀਤਾ ਹੈ, ਉਸ ਬਾਰੇ ਤੁਸੀਂ ਕਿੱਦਾਂ ਮਹਿਸੂਸ ਕਰਦੇ ਹੋ?

ਜੇ ਅਸੀਂ ਯਹੋਵਾਹ ਅਤੇ ਯਿਸੂ ਦਾ ਅਹਿਸਾਨ ਮੰਨਦੇ ਹਾਂ, ਤਾਂ ਅਸੀਂ ਕੀ ਕਰਾਂਗੇ? 2 ਕੁਰਿੰਥੀਆਂ 5:15 ਅਤੇ 1 ਯੂਹੰਨਾ 4:11; 5:3 ਪੜ੍ਹੋ। ਹਰ ਆਇਤ ਪੜ੍ਹਨ ਤੋਂ ਬਾਅਦ ਇਸ ਸਵਾਲ ʼਤੇ ਚਰਚਾ ਕਰੋ:

• ਜਿੱਦਾਂ ਇਸ ਆਇਤ ਵਿਚ ਲਿਖਿਆ ਹੈ, ਯਹੋਵਾਹ ਅਤੇ ਯਿਸੂ ਲਈ ਸ਼ੁਕਰਗੁਜ਼ਾਰੀ ਦਿਖਾਉਣ ਲਈ ਅਸੀਂ ਕੀ ਕਰ ਸਕਦੇ ਹਾਂ?

4. ਯਿਸੂ ਵਰਗੇ ਬਣੋ

ਇਕ ਹੋਰ ਤਰੀਕੇ ਨਾਲ ਅਸੀਂ ਦਿਖਾ ਸਕਦੇ ਹਾਂ ਕਿ ਅਸੀਂ ਯਿਸੂ ਦੇ ਅਹਿਸਾਨਮੰਦ ਹਾਂ। ਉਹ ਤਰੀਕਾ ਹੈ, ਉਸ ਵਰਗੇ ਬਣਨ ਦੀ ਕੋਸ਼ਿਸ਼ ਕਰਨੀ। 1 ਪਤਰਸ 2:21 ਪੜ੍ਹੋ। ਫਿਰ ਇਸ ਸਵਾਲ ʼਤੇ ਚਰਚਾ ਕਰੋ:

• ਤੁਸੀਂ ਕਿਨ੍ਹਾਂ ਤਰੀਕਿਆਂ ਨਾਲ ਯਿਸੂ ਦੇ ਨਕਸ਼ੇ-ਕਦਮਾਂ ਉੱਤੇ ਧਿਆਨ ਨਾਲ ਚੱਲ ਸਕਦੇ ਹੋ?

• ਇਸ ਮੌਕੇ ʼਤੇ ਕੀ ਕੀਤਾ ਜਾਂਦਾ ਹੈ?

 ਹੁਣ ਤਕ ਅਸੀਂ ਸਿੱਖਿਆ

ਜਦੋਂ ਅਸੀਂ ਆਪਣੀਆਂ ਗੱਲਾਂ, ਕੰਮਾਂ ਅਤੇ ਫ਼ੈਸਲਿਆਂ ਰਾਹੀਂ ਆਪਣੀ ਨਿਹਚਾ ਜ਼ਾਹਰ ਕਰਦੇ ਹਾਂ ਅਤੇ ਯਿਸੂ ਦੀ ਮੌਤ ਦੀ ਯਾਦਗਾਰ ʼਤੇ ਹਾਜ਼ਰ ਹੁੰਦੇ ਹਾਂ, ਤਾਂ ਅਸੀਂ ਦਿਖਾਉਂਦੇ ਹਾਂ ਕਿ ਯਿਸੂ ਦੀ ਕੁਰਬਾਨੀ ਲਈ ਅਸੀਂ ਅਹਿਸਾਨਮੰਦ ਹਾਂ।

ਤੁਸੀਂ ਕੀ ਕਹੋਗੇ?

• ਯਿਸੂ ʼਤੇ ਨਿਹਚਾ ਕਰਨ ਦਾ ਕੀ ਮਤਲਬ ਹੈ?

• ਤੁਸੀਂ ਕਿਨ੍ਹਾਂ ਤਰੀਕਿਆਂ ਨਾਲ ਦਿਖਾਉਣਾ ਚਾਹੋਗੇ ਕਿ ਤੁਸੀਂ ਯਹੋਵਾਹ ਅਤੇ ਯਿਸੂ ਦੇ ਬਹੁਤ ਅਹਿਸਾਨਮੰਦ ਹੋ?

• ਮਸੀਹ ਦੀ ਮੌਤ ਦੀ ਯਾਦਗਾਰ ʼਤੇ ਹਾਜ਼ਰ ਹੋਣਾ ਕਿਉਂ ਜ਼ਰੂਰੀ ਹੈ?