Sar hin tuke, te chudes darčekos varekastar, ko tut igen rado dikhel? Paťas, hoj sal akor igen bachtalo a kames ole dženeske te sikavel, hoj oda na les ča kavka. A le tuke, hoj o Jehovas the o Ježiš amenge dine ajso daros sar ňiko aver pro svetos. So hin oda? A sar šaj sikaves, hoj ada daros na les ča kavka?

1) Sar šaj sikaves, hoj sal igen rado vaš ada, so predal tute kerde o Del the o Kristus?

E Biblija phenel, hoj „sako, ko paťal andro [Ježiš]“ šaj dživel pro furt. (Ján 3:16 NZ) Aľe sar sikavas, hoj paťas? Na ča aleha, hoj vakeras, hoj paťas andro Ježiš. Amaro paťaviben sikavas tiš aleha, sar dživas a so keras. (Jakub 2:17) Oda, so keras a sar vakeras, sikavel, hoj kamas, kaj amen o Ježiš the leskero Dad o Jehovas rado te dikhen. (Pregen Ján 14:21)

2) Save inepoha sikavas, hoj sam igen rade vaš oda, so predal amende kerde o Jehovas the o Ježiš?

O Ježiš raťi sigeder sar muľa, phenďa peskere učeňikenge, sar šaj mek buter paľikeren vaš leskeri obeť. Phenďa lenge, kaj pes jekhetane te zdžan pro baro inepos, savo e Biblija vičinel „le Rajeskeri večera“, abo tiš o Leperiben pro Ježišoskero meriben. (1. Korinťanom 11:20) O Ježiš kamľa, kaj leskere apoštola the savore čačikane kresťana te leperen, hoj ov diňa peskero dživipen vaš amenge. Phenďa: „Furt ada keren pre miro leperiben.“ (Lukáš 22:19) Te aveha oda ďives, sar pes jekhetane zdžas pro Leperiben, sikaveha, hoj igen paľikeres vaš o baro kamiben, so sikade o Jehovas the o Ježiš.

 DODŽAN TUT BUTER

3) Ma le oda ča kavka! Ker vareso!

So bi kerehas, te bi tut vareko iľahas andal o paňi, sar tašľohas? Bisterďalas bi sig pre oda, so predal tute kerďa oda dženo? Abo bi leske varesar sikaďalas, hoj oda, so predal tute kerďa, na les ča kavka?

Amen tiš na kamas ňigda te bisterel pre oda, so kerďa o Jehovas, kaj te dživas pro furt! Pregen 1. Jána 4:8–10 a paľis vakeren jekhetane:

• Soske hin igen baro daros, hoj o Ježiš vaš amenge diňa peskero dživipen?

• Sar hin tuke, te džanes, so predal tute kerde o Jehovas the o Ježiš?

Sar sikavaha, hoj oda, so predal amende kerde o Jehovas the o Ježiš hin igen baro andre amare jakha? Pregen 2. Korinťanom 5:15 the 1. Jána 4:11; 5:3. Pal dojekh tekstos phuč kadi otazka:

• Pal ala lava, so akana genďam, sar sikavas, hoj oda, so kerde o Jehovas the o Ježiš na las ča kavka?

4) Ker avka sar o Ježiš

Amaro paľikeriben tiš dičhola avka, hoj keras oda, so o Ježiš. Pregen 1. Petra 2:21 a paľis vakeren jekhetane:

• Sar andre amaro dživipen sikavas, hoj keras avka sar o Ježiš?

• So pes kerel pro Leperiben?

 SO SIKHĽIĽAM

Te pre amaro dživipen dičhola, hoj paťas andro Ježiš a tiš, hoj phiras pro Leperiben leskere meribnaske, sikavas, hoj oda, so predal amende kerďa, na las ča kavka.

So bi phenehas

• So oda hin, te presikavel paťaviben andro Ježiš?

• Sar kames jilestar te sikavel, hoj na les ča kavka oda, so predal tute kerde o Jehovas the o Ježiš?

• Soske avka igen kampel te avel pro Leperiben le Kristoskere meribnaske?