XIDONDZRO 28

Tlangela Leswi Yehovha Na Yesu Va Ku Yentxeliki Swone

PLAY

Xana u titwisa kuyini loko munghanu waku a ku nyika ntxhumu wa kukazri? N’waninkama u nyonxa swinene u tlhela u djula ku komba munghanu waku leswaku u wu zrandzrile ntxhumu lowu a ku nyikiki wone. Yehovha na Yesu va hi nyike ntxhumu wa lisima ku tlula hinkwayu: a xitizrulo. Hi nga swi kombisa hi ndlela yini leswaku ha yi tlangela nyiko ya xitizrulo?

1. Hi nga swi kombisisa kuyini leswaku ha swi tlangela leswi Yehovha na Yesu va hi yentxeliki swone?

Bibele dzri dumbisa leswaku “mani na mani lweyi a pfumelaka [ka Yesu]” a ta hanya hi lani ku nga helikiki. (Yohan 3:16) Xana swi tlhamuxela yini ku pfumela? Swi hlaya mintxhumu yinyingi ku tlula ku pfumela ka Yesu ntsena. Hi fanela ku kombisa lipfumelo hi swiboho leswi hi swi tekaka ni hi mintxhumu leyi hi yi yentxaka. (Yakob 2:17) Loko hi kombisa lipfumelo hi mazritu ni hi swiyentxo, hi tiyisa wunghanu byezru na Yesu kun’we ni Papayi wake, Yehovha.—Dondzra Yohan 14:21.

2. He xini xiyentxakalu xa ku hlawuleka lexi hi pfunaka ku kombisa ku tlangela leswi Yehovha na Yesu va hi yentxeliki swone?

Ka wusiku bya wugamu na Yesu a nga si fa, yene a byele valandzreli vake ndlela ya ku kombisa ku tlangela lifu dzrake. A va byele leswaku va tlhangana ka xiyentxakalu xa ku hlawuleka, lexi Bibele dzri xi vitanaka ‘Xilalelo xa Hosi’ nakone xi tlhelaka xi vitaniwa Xidzrimuxo xa lifu dzra Kriste. (1 Ba-le-Korinte 11:20) Yesu a a djula leswaku vapostola vake kun’we ni vakriste hinkwavu va ntiyiso lava a va ta va kone hi ku famba ka nkama, va dzrimuka leswaku yene a nyikele wutomi byake ha hine. Xileswo, a lelete leswi: ‘Yentxani leswo, n’wi ta ndzri dzrimuka ha swone.’ (Luka 22:19) Loko u kumeka ka Xidzrimuxo, u kombisa ku tlangela kwaku hi lizrandzru ledzrikulu ledzri Yehovha na Yesu va nga na dzrone ha hine.

KELISISA

Vona tindlela tin’wana leti u nga kombisaka ha tone leswaku wa dzri nyika lisima lizrandzru ledzrikulu ledzri Yehovha na Yesu va hi kombiki dzrone. Tlhela u vona leswaku ha yini Xidzrimuxo xa lifu dzra Kriste xi ni lisima swinene.

3. Tindlela ta ku kombisa ku tlangela

A hi nge u le ku mbombomeleni, hi loko mhunu wa kukazri a buya a ta ku huluxa. Xana a wu ta swi dzrivala leswi mhunu yelweyo a ku yentxeliki swone? Kumbe a wu ta djuletela tindlela ta ku tlangela leswi a ku yentxeliki swone?

Hi ni dumbo dzra ku hanya hi lani ku nga helikiki hi kola ka leswi Yehovha a hi yentxeliki swone. Dondzrani 1 Yohan 4:8-10, mi gama mi bulisana hi swivutiso leswi landzrelaka:

Ha yini lifu dzra Yesu a li nyiko ya ku hlawuleka?
Xana u titwisa kuyini hi ku tiva leswi Yehovha na Yesu va ku yentxeliki swone?

Hi nga ku kombisisa kuyini ku tlangela hi leswi Yehovha na Yesu va hi yentxeliki swone? Dondzrani 2 Ba-le-Korinte 5:15 na 1 Yohan 4:11; 5:3. Ntsrhaku ka ku dondzra ndzrimana ha yin’we, bulani hi xivutiso lexi landzrelaka:

Hi ku ya hi ndzrimana leyi, i yini leswi hi nga swi yentxaka akuva hi kombisa ku tlangela?

4. Yetisela Yesu

Ndlela yin’wana ya ku kombisa ku tlangela i ku yetisela Yesu. Dondzrani 1 Petros 2:21, mi gama mi bulisana hi xivutiso lexi landzrelaka:

U nga yi landzrisa kuyini mintila ya Yesu hi le kusuhi?

Yesu a a zrandzra Zritu dzra Xikwembu Nkulukumba, a a zrezra madzrungula lamanene a tlhela a pfuna vhanu

5. Kumeka ka Xidzrimuxo xa lifu dzra Yesu

Akuva u tiva leswi yentxekiki ka Xilalelo xa Hosi xa ku sungula, dondzrani Luka 22:14, 19, 20, mi gama mi bulisana hi swivutiso leswi landzrelaka:

I yini leswi yentxekiki ka Xilalelo xa Hosi?
Xana a pawu ni vhinyu swi yimela yini?—Vonani tindzrimana 19, 20.

Yesu a a djula leswaku vadondzrisiwa vake va yentxa Xilalelo xa Hosi lembe ni lembe hi siku ledzri a fiki ha dzrone. Xileswo, lembe ni lembe Timboni ta Yehovha ta tlhangana akuva ti dzrimuka lifu dzra Yesu hi ndlela leyi a leletiki ha yone. Akuva u tiva leswi yengetelekiki hi Xidzrimuxo, vonani VHIDIYU. Mi gama mi bulisana hi xivutiso lexi landzrelaka.

VHIDIYU: Dzrimuka Lifu Dzra Yesu (1:41)

I yini leswi yentxekaka ka Xidzrimuxo?

A pawu ni vhinyu i swifanekiselo. A pawu dzri yimela mizri wa Yesu lowu hetisekiki lowu a wu nyikeliki swanga xitlhavelo hi nkonta yezru. A vhinyu dzri yimela ngati yake

VAN’WE VA LI: “Akuva u huluxiwa swo djula ntsena u kholwa ka Yesu.”

U nga yi tizrisa hi ndlela yini ndzrimana ya Yohan 3:16 ni ya Yakob 2:17 akuva u kombisa leswaku swi djula hi yentxa leswi yengetelekiki?

NKATSRAKANYU

Hi kombisa ku tlangela leswi Yesu a hi yentxeliki swone hi ku kombisa lipfumelo kwake ni hi ku kumeka ka Xidzrimuxo xa lifu dzrake.

Mpfuxeto

Swi tlhamuxela yini ku pfumela ka Yesu?
I yini leswi u navelaka ku swi yentxa akuva u kombisa ku tlangela leswi Yehovha na Yesu va ku yentxeliki swone?
Ha yini swi li swa lisima swinene ku va kone ka Xidzrimuxo xa lifu dzra Kriste?

Xidondzro lexi xi hele hi:

Lwela leswi

Kumeka ka Xidzrimuxo xa lifu dzra Kriste lexi buyaka. Vutisa lweyi a ku dondzrelaka Bibele leswaku xi ta va hi siku muni u gama u funga ka kalendariyu dzraku.

Swin’wana:

Swin‘wana Leswi U Nga Swi Yentxaka

HANDZRISISA

I yini leswi lifu dzra Kriste dzri hi susumetelaka ku swi yentxa?

A Tizrise Mizri Wake Akuva A Twalisa Yehovha (9:28)

Dondzra leswi yengetelekiki mayelanu ni ku kombisa lipfumelo.

“Kombisa Leswaku U Ni Lipfumelo Ka Swidumbiso Swa Yehovha” (Xihondzro Xa Ku Zrindzra, Otubru wa 2016)

Ka nhlokomhaka leyi liki “Ni Titwa Na Ni Basile, Na Ni Hanya Nakone Na Ni Yanelisekile”, vona ndlela leyi wansati wa kukazri a txintxiki wutomi byake ha yone ntsrhaku ka loko a twisise leswi xitlhavelo xa Yesu xi tlhamuxelaka swone.

“Bibele Dzri Txintxa Wutomi Bya Vhanu” (Xihondzro Xa Ku Zrindzra, 1 ka Agoxto wa 2011)