DYONDZO 28
Khensa Leswi Yehovha Na Yesu Va Ku Endleleke Swona
U titwa njhani loko munghana wa wena a ku nyika nyiko yo saseka? A swi kanakanisi leswaku wa tsaka hi nyiko yoleyo naswona u ta lava ku n’wi komba leswaku wa yi khensa. Yehovha na Yesu va hi nyike nyiko ya nkoka ku tlula hinkwato. Hi yihi nyiko ya kona naswona hi nga swi kombisa njhani leswaku ha yi tlangela?
1. Hi nga swi kombisa njhani leswaku ha swi khensa leswi Xikwembu na Kreste va hi endleleke swona?
Bibele yi vula leswaku “loyi a pfumelaka eka [Yesu]” u ta hanya hilaha ku nga heriki. (Yohane 3:16) Swi vula yini ku pfumela? Swi vula swo tala ku tlula ku pfumela ka Yesu ntsena. Hi fanele hi tlhela hi swi kombisa hileswi hi swi hlawulaka ni leswi hi swi endlaka. (Yakobo 2:17) Loko hi kombisa leswaku hi pfumela eka Yesu hi leswi hi swi endlaka ni leswi hi swi vulaka, hi ya hi va vanghana lavakulu va Yesu ni Tata wakwe Yehovha.—Hlaya Yohane 14:21.
2. I xiendlakalo xihi xo hlawuleka lexi hi pfunaka ku kombisa ku tlangela leswi Yehovha na Yesu va hi endleleke swona?
Hi madyambu ya le mahlweni ka siku leri Yesu a a ta fa hi rona, u byele valandzeri vakwe swin’wana leswi a va fanele va swi endla ku kombisa leswaku va khensa leswi a hi feleke. U sungule xiendlakalo xo hlawuleka lexi Bibele yi xi vitanaka “Xilalelo xa Hosi” lexi nakambe xi vitaniwaka Xitsundzuxo xa rifu ra Kreste. (1 Vakorinto 11:20) Yesu u sungule xiendlakalo xexo leswaku vaapostola vakwe ni Vakreste va ntiyiso lava a va ta sala va va kona, va tsundzuka leswi a hi endleleke swona hi ku hi fela. Mayelana ni xiendlakalo xexo, Yesu u lerise a ku: “Tshamani mi ri karhi mi endla leswi leswaku mi ndzi tsundzuka.” (Luka 22:19) Loko u va kona eXitsundzuxweni, u kombisa leswaku u khensa ndlela leyi Yehovha na Yesu va hi rhandzaka ha yona.
ANAKANYISISA
Kambisisa leswaku hi swihi leswi u nga swi endlaka ku kombisa leswaku u khensa rirhandzu lerikulu leri Yehovha na Yesu va hi kombeke rona. Dyondza leswaku hikwalaho ka yini Xitsundzuxo xa rifu ra Kreste xi ri xa nkoka.
3. Hi kombisa hi swiendlo leswaku ha khensa
A hi nge u le ku nweleni kutani munhu wo karhi a ta a fika a ku ponisa. Xana u ta swi rivala leswi munhu yoloye a ku endleleke swona? Kumbe u ta endla swo karhi ku kombisa leswaku wa swi khensa leswi a ku endleleke swona?
Hi fanele hi hanyela ku tsakisa Yehovha. Hlaya 1 Yohane 4:8-10, ivi mi bula hi swivutiso leswi:
-
Hikwalaho ka yini rifu ra Yesu ku ri nyiko yo hlawuleka?
-
U titwa njhani hi leswi Yehovha na Yesu va ku endleleke swona?
Hi nga swi kombisa njhani leswaku ha swi khensa leswi Yehovha na Yesu va hi endleleke swona? Hlaya 2 Vakorinto 5:15 na 1 Yohane 4:11; 5:3. Endzhaku ko hlaya tsalwa ha rin’we, bulani hi xivutiso lexi:
-
Hi ku ya hi tsalwa leri, hi nga endla yini ku kombisa leswaku ha swi tlangela leswi hi endleriweke swona?
4. Tekelela Yesu
Ndlela yin’wana yo kombisa leswaku ha swi tlangela leswi hi endleriweke swona i ku tekelela Yesu. Hlaya 1 Petro 2:21, ivi mi bula hi xivutiso lexi:
-
U nga yi landzelerisisa njhani mikondzo ya Yesu?
Yesu a a rhandza rito ra Xikwembu, a a chumayela mahungu lamanene a tlhela a pfuna van’wana
5. Vana kona eXitsundzuxweni xa rifu ra Kreste
Leswaku u twa leswi endlekeke loko ku endliwa Xilalelo xo sungula xa Hosi, hlaya Luka 22:14, 19, 20. Endzhaku mi bula hi swivutiso leswi:
-
Xi endliwe njhani Xilalelo xa Hosi?
-
Xinkwa ni vhinyo swi fanekisela yini? —Vona ndzimana 19 na 20.
Yesu u lerise vadyondzisiwa vakwe leswaku va endla Xilalelo xa Hosi kan’we hi lembe hi siku leri a feke ha rona. Hikwalaho, Timbhoni ta Yehovha ta hlangana lembe ni lembe leswaku ti ta tsundzuka rifu rakwe hilaha a leriseke ha kona. Leswaku u twa swo tala hi nhlengeletano leyi ya nkoka, tlanga VHIDIYO. Endzhaku mi bula hi xivutiso lexi landzelaka.
-
Ku endliwa yini eXitsundzuxweni?
Xinkwa ni vhinyo i swifanekiselo. Xinkwa xi fanekisela miri wa Yesu lowu nga riki na xidyoho lowu a wu nyikeleke hikwalaho ka hina. Vhinyo yi fanekisela ngati yakwe
VAN’WANA VA RI: “Loko u lava ku ponisiwa swo lava u pfumela ka Yesu ntsee!”
-
U nga yi tirhisa njhani Yohane 3:16 na Yakobo 2:17 ku komba leswaku a ku laveki sweswo ntsena?
NKATSAKANYO
Hi kombisa leswaku ha swi tlangela leswi Yesu a hi endleleke swona hi ku va ni ripfumelo eka yena ni ku va kona eXitsundzuxweni xa rifu rakwe.
Mpfuxeto
-
Swi vula yini ku va ni ripfumelo eka Yesu?
-
U lava ku endla yini ku kombisa leswaku wa swi khensa leswi Yehovha na Yesu va ku endleleke swona?
-
Hikwalaho ka yini swi ri swa nkoka ku va kona eXitsundzuxweni xa rifu ra Kreste?
KUMA LESWI ENGETELEKEKE
Rifu ra Kreste ri hi susumetela ku endla yini?
Dyondza swo tala hi ripfumelo ni ndlela leyi hi nga ri kombisaka ha yona.
“Kombisa Ripfumelo Eka Switshembiso Swa Yehovha” (Xihondzo xo Rindza, October 2016)
Eka mhaka ya vutomi ya wansati loyi a nge te “A Ndza Ha Kingindziwi Hi Ripfalo Naswona Ndzi Tiphina Hi Vutomi,” vona ndlela leyi ku dyondza hi rifu ra Kreste swi n’wi vuyeriseke ha yona.
“Bibele Yi Hundzula Vutomi Bya Vanhu” (Xihondzo xo Rindza, August 1, 2011)
Twana leswaku hikwalaho ka yini ku nga dyi vanhu hinkwavo eXitsundzuxweni.
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
