GURUY NI 28

Mu Dag nib Ga’ Fan u Wan’um e N’en Ke Rin’ Jehovah nge Jesus ni Fan Ngom

PLAY

Uw rogon u wan’um ni faanra pi’ reb e fager rom ba tow’ath ngom nrib manigil? Dabisiy nri ga ra felfelan’ ma ga ra adag ni ngam dag ngak nib ga’ fan fare tow’ath u wan’um. Ke pi’ Jehovah nge Jesus e bin th’abi fel’ e tow’ath ngodad. Mang e re tow’ath nem, ma uw rogon ni ngad daged nib ga’ fan u wan’dad?

1. Mang reb e kanawo’ ni ngad daged riy nib ga’ fan u wan’dad e n’en ke rin’ Got nge Kristus ni fan ngodad?

Be micheg e Bible ni “urngin e piin [nra] michan’rad ngak [Jesus]” e yad ra par ndariy n’umngin nap’an. (John 3:16) Uw rogon ni ngad rin’ed e re n’ey? Ba t’uf ni ngad daged ni bay e michan’ rodad u daken e pi n’en gad ma dugliy nge pi n’en gad ma rin’. (James 2:17) Nap’an ni gad ra dag ni bay e michan’ rodad u daken e ngongol nge thin rodad, ma aram e ra gel e tha’ u thildad Jesus nge Jehovah ni Chitamangin.—Mu beeg e John 14:21.

2. Mang madnom e ma ayuwegdad ni ngad daged nib ga’ fan u wan’dad e n’en ke rin’ Jehovah nge Jesus?

Fare nep’ u m’on ni nge yim’ Jesus, me yog ngak pi gachalpen reb e kanawo’ ni ngar daged riy nib ga’ fan u wan’rad fare maligach ni pi’. I yog ngorad ni ngar bad nga taabang ngar madnomnaged fare madnom ni be yog e Bible e “abich ni blayal’ rok Somol” ngay, maku yima yog ni Puguran ko yam’ ni tay Kristus. (1 Korinth 11:20) I tababnag Jesus e re madnom ney, ya baadag ni pi apostal rok nge urngin e tin riyul’ e Kristiano ni yad ra yib nga tomuren e ngaur pugeduran ngan’rad ni ke pi’ e yafos rok ni fan ngorad. Aram fan ni tay chilen ngorad ni gaar: “Um rin’ed e re n’ey ngi i pugurag ngomed.” (Luke 22:19) Nap’an ni ga ra un ko fare Puguran, ma aram e ga be dag nib ga’ fan u wan’um e t’ufeg ni ke dag Jehovah nge Jesus ngodad.

KUM FIL BOCH BAN’EN U MURUNG’AGEN

Kum guy boch e kanawo’ nrayog ni ngam dag riy nib ga’ fan u wan’um e t’ufeg ni ke dag Jehovah nge Jesus, mag fil fan nrib ga’ fan fare Puguran ko yam’ ni tay Kristus.

3. Faanra ba ga’ fan u wan’dad, ma ra m’ug ko ngongol rodad

Mu susunnag ni ga be n’en ni ngam limach me yib be’ i ayuwegem. Ere gur, tomuren nra ayuwegem facha’ ma dab kum lemnag e n’en ke rin’ ni fan ngom? Fa ga ra gay boch e kanawo’ ni ngam pining e magar riy ngak ko n’en ke rin’ ni fan ngom?

Ke mab e kanawo’ ni nge yag e yafos ni manemus ngodad ni bochan e runguy rok Jehovah. Mu beegew e 1 John 4:8-10, mi gimew weliy e fulweg ko gal deer ni baaray:

Mang fan ni fare maligach ni pi’ Jesus e aram reb e tow’ath nrib manigil?
Uw rogon u wan’um e n’en ke rin’ Jehovah nge Jesus ni fan ngom?

Uw rogon nrayog ni ngad daged nib ga’ fan u wan’dad e n’en ke rin’ Jehovah nge Jesus ni fan ngodad? Mu beegew e 2 Korinth 5:15 nge 1 John 4:11; 5:3. Tomuren ni kam beegew reb ko pi thin nu Bible ney, mi gimew weliy e fulweg ko re deer ni baaray:

Mang e rayog ni ngad rin’ed ya ngad daged nib ga’ fan u wan’dad e n’en ke rin’ Jehovah nge Jesus ni fan ngodad nrogon ni be yog e re thin nu Bible ney?

4. Mu folwok rok Jesus

Ku reb e kanawo’ ni ngad daged riy nib ga’ fan u wan’dad e n’en kan rin’ ni fan ngodad e aram e ngad folwokgad rok Jesus. Mu beegew e 1 Peter 2:21, mi gimew weliy e fulweg ko re deer ni baaray:

Mang boch e kanawo’ nrayog ni ngam lek luwan ay Jesus riy?

Ba ga’ fan e Thin rok Got u wan’ Jesus, ma i machibnag fare thin nib fel’, maku ma ayuweg yugu boch e girdi’

5. Mu un ko fare Puguran ko yam’ ni tay Kristus

Mu beegew e Luke 22:14, 19, 20 ni ngam nangew e n’en nrin’ u nap’an e bin som’on e Abich ni Blayal’ rok Somol nni tay. Tomuren mi gimew weliy e fulweg ko gal deer ni baaray:

Mang e buch u nap’an fare Abich ni Blayal’ rok Somol?
Mang e be yip’ fan fare flowa nge fare wain? —Mu guy e verse 19 nge 20.

Baadag Jesus ni nge madnomnag pi gachalpen fare Puguran u gubin e duw ko rofen ni yim’ riy. Aram fan ni ma muulung e Pi Mich Rok Jehovah nga taabang u gubin e duw ni ngar pugeduran ngan’rad e yam’ ni tay Kristus ni bod rogon ni tay chilen ni ngar rin’ed. Mu yaliyew e re VIDEO ney ni be weliy murung’agen e re muulung ney nib ga’ fan. Tomuren mi gimew weliy e fulweg ko re deer ni baaray:

VIDEO: Ngaum Lemnag e Yam’ ni Tay Jesus (1:41)

Mang e ma buch u nap’an fare Puguran?

Fare flowa nge fare wain e be yip’ fan ban’en. Fare flowa e be yip’ fan downgin Jesus nib flont ni ke pi’ ni maligach ni fan ngodad, ma fare wain e be yip’ fan rachaen

MA GAAR BOCH E GIRDI’: “Kemus ni nge mich Jesus u wan’um, ma aram e kam thap.”

Uw rogon ni ngam fanay fare thin ko John 3:16 nge James 2:17 ni ngam dag ni ka bay boch ban’en nib t’uf ni ngan rin’?

N’EN KAN FIL

Rogon ni ngad daged nib ga’ fan u wan’dad e n’en ke rin’ Jesus ni fan ngodad e aram e nge mich u wan’dad mu ud uned ko fare Puguran ko yam’ ni tay.

Ngan Sul u Daken

Uw rogon ni ngad daged nib mich Jesus u wan’dad?
Uw rogon ni ga baadag ni ngam dag nib ga’ fan u wan’um e n’en ke rin’ Jehovah nge Jesus ni fan ngom?
Mang nrib ga’ fan ni ngan un ko fare Puguran ko yam’ ni tay Kristus?

Kan mu’nag e re guruy ney ko:

N’en Ngam Nameg

Mu un ko bin migid e Puguran ko yam’ ni tay Kristus ni yira tay. Mu fith ko en ma fil e Bible ngom ko wuin e yira tay e re madnom ney, mag yoloy nga but’ ya nge dab mu pagtalin.

Yugu boch ban’en:

Your other goal