Buidi wummuenanga bo nkudi’aku ka kuvana nkhayilu wumboti ayi widi beni luvalu? Ḿba ngie wunkuiza ba mu mayangi ayi wunkuiza tonda nkudi’aku mu nkhayilu beni. Bobuawu mvandi, Yave ayi Yesu ba tuvana nkhayilu wulutidi luvalu tulenda tambula. Nkhayilu mbi bawu ba tuvana ayi buidi tulenda monisina ti tumvuanga nkinza nkhayilu beni?

1. Mbi tufueti vanga mu mambu Yave ayi Yesu ba tuvangila?

Kibibila kinkanikisa ti “woso wunlekilanga kiminu mu [Yesu]” kabika lalakana vayi kabaka luzingu lu mvu ka mvu. (Yoane 3:16) Mbi binsundula kulekila kiminu? Kuisinsundula ko to kuba kiminu mu Yesu, vayi kunsundula mvandi kumonisa kiminu mu mambu tuntuba ayi tumvanga. (Yakobi 2:17) Befu kumonisa kimimu mu mavanga mitu ayi mu mambu tuntuba, kikundi kitu na Yave ayi Yesu kinluta kindamanga.—Tanga Yoane 14:21.

2. Lukutukunu mbi lunkinza lu tusadisanga kutonda Yave ayi Yesu mu mambu ba tuvangila?

Va builu ava kafua, Yesu wukamba minlandikini miandi phila yinkaka bafueti vutudilanga matondo mu khudulu’andi. Mvandi, wukamba minlandikini miandi mioso muingi baba va kimueka mu lukutukunu lo Kibibila kantedila “Ndiwulu Bidia bi Mfumu va Masika ma Builu,” voti Mbambukulu Moyo Lufua lu Yesu. (1 Kolinto 11:20) Yesu mvandi, wukamba bapostolo ayi Baklisto boso bakiedika batatamana kuvanganga mawu kadika mvu. Mu matedi lukutukunu beni Yesu wuba kamba: “Muvanganga mawu muingi mu mbambukilanga moyo.” (Luka 22:19) Tulenda monisa ti tumvuanga nkinza mambu Yave ayi Yesu ba tuvangila, mu kuvanganga mangolo ma kuba mu lukutukunu lu Mbambukulu Moyo.

BUELA LONGUKA

3. Mbi tufueti vanga muingi tumonisa ti tuidi batu bantondanga?

Yindula boti mutu bevukisa luzingu luaku. Bukiedika ti ngie wunkuiza zimbakana kuaku mambu nandi ka kuvangila? Voti, wunkuiza tomba ziphila muingi kuntonda mu mambu ka kuvangila?

Bobuawu mvandi, tuidi luaku lu kubaka luzingu lu mvu ka mvu mu kibila ki mambu Yave ayi Yesu ba tuvangila. Tanga 1 Yoane 4:8-10, bosi tubilanu biuvu binlanda:

• Kibila mbi khudulu yi Yesu yididi nkhayilu wulutidi luvalu?

• Buidi wummuenanga mu kuzaba mambu Yave ayi Yesu bavanga mu kibila kiaku?

Tufueti monisa ti tumvuanga nkinza mambu Yave ayi Yesu bavanga mu kibila kitu. Tanga 2 Kolinto 5:15; ayi 1 Yoane 4:11; 5:3. Bo munkuiza manisa kutanga kadika lutangu, bosi tubilanu kiuvu kinlanda:

• Dedi bo tube muena mu matangu, mbi tufueti vanga muingi kumonisa ti tumvutulanga matondo?

4. Landakana Kifuani ki Yesu

Phila yinkaka tulenda tondila Yesu mu mambu katuvangila, yidi mu kulandakananga kifuani kiandi. Tanga 1 Petelo 2:21, bosi tubilanu kiuvu kinlanda:

• Mu phila mbi tulenda landikinina zithambi zi Yesu?

• Mbi bimmonikanga mu lukutukunu lu Mbambukulu Moyo Lufua lu Yesu?

 MBI NGIE BELONGUKA

Tumvutulanga matondo mu mambu Yesu katuvangila, mu kulekila kiminu mu nandi ayi kulandakananga lukutukunu lu Mbambukulu Moyo Lufua lu Yesu.

Vutukila Mambu Mamfunu

• Mbi binsundula kulekila kiminu mu Yesu?

• Buidi ngie wulenda monisina ti, wumvutulanga matondo kuidi Yave ayi Yesu mu mambu ba kuvangila?

• Kibila mbi didi diambu dinkinza kuba mu Mbambukulu Moyo Lufua lu Yesu?