Inas mä familiaramasa jan ukajj mä amigomas jiwchi, ukham llakin uñjasisajj inas akham jisktʼassta: “¿Maynejj jiwjjasin jakaskakiti? ¿Jiwki uka familiarajarusa amigojarus wasitamp uñjäti?” sasa. Uka toqet Bibliajj kunjamsa chuymachtʼistu ukwa aka yatichäwinsa jutïr yatichäwinsa yatjjataskañäni.

1. ¿Maynejj jiwjje uka qhepat jakaskakpachati?

Jiwañajja jiwa iki iktʼañar uñtasitäkaspas ukhamwa Jesusajj qhanañchäna. ¿Jiwañampi iktʼañampejj kunansa niya kikpakïpjje? Kunapachatï maynejj jiwa iki iktʼaski ukhajja, janiw kunanakas jakʼapan pasaski uk amuykiti. Maynejj jiwjje ukhajja, janiw kunats tʼaqesjjeti ni usuyasjjarakisa. Bibliajja “jiwatanakajj janiw kunsa yatipkiti” siwa (Eclesiastés 9:5 liytʼäta).

2. ¿Kunjamsa jiwañat kunatï cheqäki uk yatiñajj yanaptʼistu?

Walja jaqenakaw jiwañ ajjsarayasipjje jiwatanakarus ajjsarapjjaraki. Jumatï ukhaman uñjasstajja, kuntï Bibliajj jiwañat qhanañchki ukajj chuymachtʼiristamwa. Jesusajj akham sänwa: “Kunatï cheqäki [...] ukaw libre jakasiñ churapjjarakïtam” sasa (Juan 8:32). Yaqhep religionanakajja, jaqenakajj jan jiwir almanïpkaspasa jiwjjasin jakaskakispas ukhamwa yatichapjje. Ukampis Bibliajj janiw ukham yatichkiti, ukhamajj jiwatanakajj janiw tʼaqesipkiti. Niyakejjay jiwatanakajj jan kuns yatipkchejja, janiw jiwasarojj kuna jan walinaksa lurapkistaspati. Ukatwa jiwatanakar jachʼañchañasa, rezañasa, jan ukajj jupanakan jan colerasipjjañapatak yaqha ukhamanak lurañas jan wakiskiti.

Yaqhep jaqenakajj jiwatanakamp parlsnawa sapjjewa, ukampis janiw khitis jiwatanakamp parlkaspati. Kunjamtï yateqasktanjja, “jiwatanakajj janiw kunsa yatipkiti”. Jiwatanakampis parlapkaspa ukham amuyirinakajja demonionakampiw parlasipki, uka demonionakaw khitinakatï jiwatäjjapjje ukanakäpkaspas ukham parlapjje. Ukhamasti jiwatanakat kunatï cheqäki uk yatiñajj demonionakatwa jarkʼaqestu. Jehová Diosajja jiwatanakamp jan parlañasatakiw ewjjtʼistu, jiwasatï jiwatanakamp parlañ thaqsna ukhajj demonionakampiw chikachassna, ukajj jan walinwa uñjasiyistaspa (Deuteronomio 18:10-12 liytʼäta).

3. Maynejj jiwjje ukhajj kunas pasi

Maynejj jiwjje ukhajj kunas pasi uka toqet kunayman creencianakaw oraqpachan utji. Ukampis janiw taqe uka creencianakajj cheqapunïkaspati.

• Jakaskta uka cheqanjja, ¿kuna creencianakas jiwatanakat utji?

 4. Jiwatanakat kunatï cheqäki uk yatiñajj jarkʼaqestuwa

Jiwatanakat kunatï cheqäki uk yatisajj janiw jiwatanakarojj ajjsarjjtanti. Eclesiastés 9:10 liytʼasajja aka toqetwa parltʼapjjäta:

• ¿Jiwatanakajj jan walinak lurapjjestaspati?

Biblian cheqa yatichäwinakap yatiñajja, ‘jiwatanakarojj janiw colerayañasäkiti’, jan ukajj ‘jiwatanakarojj jachʼañchañasawa’ sapki uka creencianakat librëjjtanwa. Isaías 8:19; Apocalipsis 4:11 liytʼasajja aka toqetwa parltʼapjjäta:

• Jaqenakajj jiwatanakar jachʼañchapki yanaptʼaps thaqapkaraki ukhajja, ¿Jehová Diosajj janit chuymap usuyaskpacha?

5. Jiwatanakat kunatï cheqäki uk yatiñajj chuymachtʼistuwa

Walja jaqenakaruw ‘jiwjjasajj jan wali luratanakamat tʼaqesïtawa’ sasin yatichapjje. Ukampis jiwjjasajj janiw khitis tʼaqeskiti, ni sinti jan wali luririnakas tʼaqesipkiti uk yatiñajj wal chuymachtʼistu. Romanos 6:7 liytʼasajja aka toqetwa parltʼapjjäta:

• Kunjamtï Bibliajj qhanañchkejja, maynejj jiwjje ukhajj juchanakapat perdonatäjjewa, jan ukajj juchanakapat librëjjewa. Ukhamajj ¿jiwatanakajj jan wali luratanakapat tʼaqesisipkpachati?

Jehová Diosaru jukʼamp uñtʼjjasajja, janipuniw jupajj jiwatanakar tʼaqesiykaspati sasaw amuyjjtanjja. Deuteronomio 32:4; 1 Juan 4:8 liytʼasajja aka toqetwa parltʼapjjäta:

• Kuntï uka textonakajj qhanañchki ukarjamajja, ¿wali munasiri mä Diosajj jiwatanakan tʼaqesipjjañap munaspati?

• ¿Jiwatanakat kunatï cheqäki uk yatiñajj chuymachtʼistuti? ¿Kunatsa ukham amuyta?

 ¿KUNSA YATEQAWAYTAN?

Maynejj jiwjje ukhajj ukharuw taqe kunas tukusjje. Jiwatanakajj janiw tʼaqesipkiti, janirakiw kuna jan walinaksa mayninakar lurapkaspati.

Amtañataki

• ¿Maynejj jiwjje ukhajj almapajj jakaskakiti?

• ¿Kunjamsa jiwatanakat kunatï cheqäki uk yatiñajj jarkʼaqestu?

• ¿Kunjamsa jiwatanakat kunatï cheqäki uk yatiñajj chuymachtʼistu?