Baa u ma nimis mut nu u gwéhék ngandak? Hala a yé jam li ndutu kiyaga. Bebek u nla badba le: ‘Kii i ntagbe i mbus nyemb? Baa kel yada, di ga tiimba tehe bôt bés ba ba bi wo?’ I yigil ini ni i i noñ, bi ga ti mandimbhe ma ma nhôgbaha we.

1. Kii i ntagbe i mbus nyemb?

Yésu a bi hégha nyemb ni ndip hilo. Hala wee, mut nu a nke ’ilo, a nyi bé i yom i ntagbe nye ipañ. Inyuki ba nhégha nyemb ni hilo? I ngéda mut a nwo, a nok ha bé njôghe yo ki yo. A nôgda bé binyuu, nyemede a nla ha bé gwés mawanda mé to lihaa jé. Bibel i nkal le: “Bawoga ba nyi bé to jam.”—Añ Ñañal 9:5.

2. Inyuki i yé nseñ i yi maliga inyu nyemb?

Ngandak bôt i nkon nyemb woñi, i nkon yak bawoga woñi! Ndi i jam Yésu a bi kal inyu nyemb li nla hôgbaha we. Yésu a bi kal le: “Maliga m’a kobol bé.” (Yôhanes 8:32) Maselna ni jam ngandak bibase i niiga, Bibel i nkal bé le i ngéda mut a nwo, ngim yom i nyodi i nyuu yé inyu ke niñ homa numpe. I ngéda mut a nwo, a nok ha bé ndutu, a nla ha bé boñ bés to loñge to béba. Jon, di nla bé bégés bawoga, di nla bé ki to soohe inyu yap.

Ngim bôt i nhoñol le i nla pot ni bawoga. Ndi bitembee bi. Di ntip nigil le, bawoga “ba nyi bé to jam.” Maliga ma yé le i bet ba nhoñol le ba nkwel ni bawoga ba nkwel ni mimbuu mimbe mi mi nyoñ manyuu ma bôt ba bi wo. I yi maliga inyu bawoga i nsôñ bés, i mboñ ki le bitembee bi mimbuu mimbe bi yumus bañ bés. Yéhôva a mbéhe bés le di kwel bañ ni bawoga inyule a nyi le i ngéda di mpot ni bawoga, wee di yé kwel ni mimbuu mimbe.—Añ Ndiimba Mbén 18:10-12.

3. Nigil maliga inyu bawoga

I nkoñ ’isi wonsôna, bôt ba niiga ngandak mam inyu jam li ntagbe i ngéda mut a nwo. Biniigana bi gwobisôna bi ta bé maliga.

• I libôga joñ, kii bôt ba nhoñol inyu bawoga?

 4. I yi maliga inyu nyemb i yé nseñ inyu yés

I yi maliga inyu nyemb i nhôla bés i waa kon bawoga woñi. Añ Ñañal 9:10, i mbus ni kwélél mbadga ini:

• Baa bawoga ba nla tééñga bés?

Ibale di nhémle i mam Bibel i niiga, d’a neebe ha bé biniigana bi bitembee inyu nyemb ni bawoga. Añ Yésaya 8:19 ni Masoola 4:11, i mbus ni kwélél mbadga ini:

• Kii Yéhôva a nhoñol inyu bet ba nsoohe bawoga tole bet ba mbat bawoga mahôla?

5. I yi maliga inyu bawoga i nhôgbaha bés

Ngandak bôt i nhoñol le i ngéda ba ga wo, Djob a ga kogse bo inyu bibéba bi mam ba bi boñ. Ndi kinje hogbe i yi le i ngéda mut a nwo, a nok ha bé ndutu yo ki yo to ibale a bi boñ bibéba bi mam. Añ Rôma 6:7, i mbus ni kwélél mbadga ini:

• Bibel i nkal le i ngéda mut a nwo, a mal saa inyu béba yé. We u nhoñol laa?

Kiki w’a ke ni bisu i yi Yéhôva, w’a yi le a nla bé leñ i bôt ba nwo i bee hié inyu kogse bo. Añ Ndiimba Mbén 32:4 ni 1 Yôhanes 4:8, i mbus ni kwélél mambadga mana:

• Baa i Djob li gwé bilem ba nsima munu minlôñ mini, a nla leñ i bôt ba nwo i bee hié inyu kogse bo?

• Nano nu u nyi maliga inyu nyemb, baa hala a nhôgbaha we? Inyuki?

 I SEM KWEP

I ngéda mut a nwo, a nyi ha bé to yom. A nla ha bé ki to boñ i bet ba niñ béba.

Mambadga ma mbigda

• Kii i ntagbe i ngéda mut a nwo?

• Inyuki i yé nseñ le di yi maliga inyu nyemb?

• Inyuki i yi maliga inyu nyemb i nhôgbaha bés?