?Yu yu bin lusum wan famle o fren long ded? Long had taem olsem maet yu stap tingting se: ‘?Wanem i hapen long yumi taem yumi ded? ?Olsem wanem? ?Bambae yumi luk ol fren mo famle blong yumi bakegen?’ Long lesen ya mo nekiswan, bambae yumi luk ol ansa blong Baebol we oli save mekem yumi haremgud bakegen.

1. ?Wanem i hapen long yumi afta we yumi ded?

Jisas i se man we i ded i sem mak long man we i stap slip. Man we i slip, i no save ol samting we i stap hapen raonabaot long hem. ?Ded i sem mak olsem wanem long slip? Taem man i ded, hem i no save filim samting. Hem i no harem nogud from ol famle mo fren we hem i lego olgeta. Baebol i talem se: “Ol dedman oli no moa save wan samting nating.”—Ridim Prija 9:5.

2. ?Olsem wanem trutok long saed blong ded i save givhan long yumi?

Plante man oli fraet, oli no wantem ded mo oli fraet long ol dedman. Yumi save harem gud long samting we Baebol i talem long saed blong ol dedman. Jisas i talem se: “Trutok bambae i mekem yufala i kam fri.” (Jon 8:32) Sam relijen oli tijim se sol i laef yet afta we man i ded, be tijing ya i no kamaot long Baebol. Taswe man i no stap safa afta we hem i ded. Mo tu, from we ol dedman oli no save wan samting, oli no save spolem yumi. From samting ya, i no nid blong ona long olgeta, prea long bihaf blong olgeta, o mekem sam samting blong oli no kros.

Sam man oli se oli save toktok wetem ol dedman. Be hemia i no posibol. Olsem we yumi jes luk, ol dedman oli “no save wan samting nating.” Blong talem stret, man we i ting se i stap toktok wetem ol dedman, hem i stap toktok wetem ol dimon we oli giaman se oli ol dedman. Taem yumi save trutok long saed blong ded, hemia i protektem yumi long ol dimon. Jehova i givim woning se yumi no mas toktok wetem ol dedman from we oli save spolem yumi.—Ridim Dutronome 18:10-12.

3. Lanem trutok long saed blong ded

Ol man raon long wol oli gat defdefren bilif long saed blong ol dedman. Taswe yumi no save talem se evri bilif ya oli tru.

• ?Wanem bilif blong ol manples blong yu?

 4. Trutok long saed blong ded i halpem yumi

Taem yumi save trutok long saed blong ded, hemia i mekem se yumi no moa fraet long dedman. Ridim Prija 9:10, mo tokbaot kwestin ya:

• ?Ol dedman oli save spolem yumi?

Trutok blong Baebol i protektem yumi long giaman bilif ya se yumi mas ona long ol dedman, o mekem sam samting blong oli no kros. Ridim Aesea 8:19 mo Revelesen 4:11, mo tokbaot kwestin ya:

• ?Jehova i harem olsem wanem taem wan man i ona mo i askem help long dedman?

5. Trutok long saed blong ded i mekem yumi harem gud

Plante man oli kasem tijing ya se taem wan man i ded bambae hem i safa from ol nogud samting we hem i bin mekem. Be yumi harem gud blong save se man i no safa afta we hem i ded, iven ol man ya we oli bin mekem ol rabis samting. Ridim Rom 6:7, mo tokbaot ol kwestin ya:

• Vas ya i se man we i ded i fri long ol sin blong hem, nao sipos man i ded, ?yu ting se hem i stap safa from ol sin blong hem?

Taem yumi savegud Jehova, bambae yumi sua se hem i no save letem ol dedman oli stap safa. Ridim Dutronome 32:4 mo 1 Jon 4:8, mo tokbaot ol kwestin ya:

• Folem ol fasin ya blong God, ?yu ting se hem i save letem man we i ded i safa?

• ?Trutok long saed blong ded i mekem yu yu harem gud? ?From wanem?

 SAMARI

Taem man i ded, laef blong hem i finis ya nao. Wan dedman i no safa mo i no save spolem olgeta we oli laef.

Tingtingbak

• ?Wanem i hapen long yumi taem yumi ded?

• ?Trutok long saed blong ded, i mekem yumi fri long wanem?

• ?Olsem wanem hemia i mekem yumi harem gud?