Nì ɖɛ̀ɓɛ̀-nyɔ̀ ɖò ɖà mɛ́ ɖòò? Ɓó nyɔ-hwòɖò-dyùà-síà-tì ɓè nì kà ɓèa ɓaɖaa, m̀ ɓɛ́ìn hwìɖìi poɛ̀n: ‘À dyi mɛ́ín, ɖɛ́ kpá kɛ́? À mu náá à ɖɛ̀ɓɛ̀-nyɔ̀ ɓè ɖàa mɛ́ɛ dyéìn ɖeè?’ Ðé cɛ̃́ɛ́-ɖɛ̀ nìà kɛ kè ɔ nyɔ kɔà ɓó dyíɛ múɛɛ, dyé Baɓoɔ gɔ̃̀-jù-wùɖù ɓè ɓɛ́ ɔ ɓɛ́ìn nyɔ hwòɖò dyi dèɛ̀ kɛ.

1. À dyi mɛ́ín, ɖɛ́ kpá kɛ́?

Jízɛ̀ poìn ma gĩɔ nyíɔ vɛ̀nɛ̀ ɖò dyí. Nyɔ ɓɛ́ ɔ nì nyíɔ vɛ̀nɛ̀ ɖò múɛɛ se ɖɛ ɓè nì ɔ ɖei kpáuń wɛ̃ɛ dyí dyuò. Xwɛ̀ gĩɔ kè nyíɔ nyu hwɔìn nyɛ́? Nyɔ ɖò dyi mɛ́ín, ɖɛ ɖò ní puà ɔ. Ɔ ní kpá kpɛín dyi kɛbì ɔ mɛ ɖɛ̀ɓɛ̀ ma ɔ ɓàto ɓè kè ɔ gbò-xwíníín-nyɔ̀ ɓè mú mìɔ kɛ. Baɓoɔ ɖá, “Nyɔ ɓè ɓɛ́ wa ɖàà mɛ́ɛ se ɖɛ ɖò dyí dyuò ɖe.”—Zà Ìkíɖísìásì 9:5 wuɖuún.

2. Xwɛ̀ à nyu jàà ɓá gĩɔ jè dyíɛɛ dyí-dyuò-dyuò kpáná kɔ̃ún dyéɛ kɛ́?

Nyɔ pàɖà peɖe gĩɔ dyi—ké wa peɖe nyɔ ɖà mɛ́ɛ dyi dyɛ mɔ̀ùn! Kɛɛ, ɖɛ Baɓoɔ cɛ̃ ɓá gĩɔ jè dyíɛɛ ɓɛ́ìn nì hwòɖòɔ̀ dyi dèɛ̀. Jízɛ̀ cɛ̃ɛ ma, ké ɔ ɖá: “Jààɔ̀ mu ɓè buɛ̀ìn.” (Jɔ̃́ɔ́ 8:32) Ɓiè-kpòò ɖíɛ́ ɓè tɛ̀mɛ̀ìn kà ɓɛ́ nyɔ ɖò dyi mɛ́ín, ɖɛ ɖò sɔ̀ ɔ mú ké ɔ cĩ́ kánáá púɛ. Kɛɛ, Baɓoɔ seɛ náa tɛ̀mɛ̀ìn. Ɔ jèɛɛ, nyɔ ɖò dyi mɛ́ín, ɔ ní dyé gà. Ké ɖeɛɛ, kà ɓɛ́ nyɔ ɓè ɖàà mɛ́ɛ seà ɖɛ ɖò dyí dyuòɛɛ, wa se à ɖɛ gbà ɖò bũ̀ nyuɛ ɓɛ́ìn. Ɔ jèɛɛ, à se kɔ̃̀ à ké nyɔ ɓè ɖàà mɛ́ɛ hwòɖò dyi dè mɔɔ à ké wa ɓiè, ké à se kɔ̃̀ à ké wa bìì ɓaà.

Nyɔ ɖíɛ́ ɓè ɖá wa ɓɛ́ìn nyɔ ɓè ɖàà mɛ́ɛ gbo wùɖùɛ̀. Kɛɛ, ɔ se kpáa ɓɛ́ìn. Kà à nyuɔ́ kà cɛ̃́ɛ kàùn wɛ̃ɛ, nyɔ ɓè ɓɛ́ wa ɖàà mɛ́ɛ “se ɖɛ ɖò dyí dyuò ɖe.” Nyɔ ɓè ɓɛ́ wa hwòɖò ɖá wa nìà waà ɖɛ̀ɓɛ̀-nyɔ̀ ɓè gbo wùɖùɛ̀n nyɛɛ ɓɛ́ìn zùù gbà ɓè ɓɛ́ wa zɛ̃̀ìn wa mìɔùn nyɔ ɓè ɖàà mɛ́ɛ múɛɛ gbo wùɖùɛ̀n nìɛ̀ jɛ́ɛ́. Ɔ jèɛɛ, jàà ɓá gĩɔ jè dyíɛɛ gmɔ̀ à dyí ɖé zùù gbà ɓèɔ̀ xwaún. Jɛhova po à náún ɓá nyɔ ɓè ɖàà mɛ́ɛ gbo wùɖù jè dyí, sepoɛɖe ɔ dyuòɛ̀ dyí kà ɓɛ́ zùù gbà ɓèɔ̀ gbo-wùɖù-wùɖù mu à ɖɛ gbà bũ̀ nyuùn wɛ̃.—Zà Dìtɔ̀wáɖánámɛ̀ 18:10-12 wuɖuún.

3. Cɛ̃́ kà nyɔ ɓè ɖàà mɛ́ɛ jè nyu nìɛ̀ jɛ́ɛ́ kɛɛ jè

Ðé ɓóɖó-kpàà dà séín nyɛɛ, nyɔ ɓè po ɖɛ kò-kò ɓè jàà ɓá ɖɛ kpá à gbo ɔ jù ké à dyi mɛ́ín nyɛɛ jè dyí. Wáɖáá kɛɛ, jàà-po-ɖɛ̀ ɓèa séín se jàà jùɛ ɓɛ́ìn.

• Ðɛ́ ɓè nyɔ ɓè po jàà ɓá nyɔ ɓè ɖàà mɛ́ɛ jè dyí ɖé dɛ̀ m̀ cĩ́à kɛ́?

 4. Jàà ɓá gĩɔ jè dyíɛɛ nyu à kpáná dyí

Jàà ɓá gĩɔ jè dyíɛɛ dyí-dyuò-dyuò buɛ̀ à ɖé nyɔ ɓè ɖàà mɛ́ɛ dyi-peɖe-peɖe xwaún. Zà Ìkíɖísìásì 9:10 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Nyɔ ɓè ɖàà mɛ́ɛ ɓɛ́ìn à ɖɛ gbà bũ̀ nyuɛɛ̀?

Baɓoɔ jàà-wùɖù ɓè gmɔ̀ à dyí ɖekè ɖé jàà-po-ɖɛ̀ mɔ̀à à kɔ̃̀ à ké nyɔ ɓè ɖàà mɛ́ɛ hwòɖò dyi dè mɔɔ wa ɓiè kɛɛ xwaún. Zà Àzédyà 8:19 kè Wɛ̀ɖɛ̀ɓèɖésĩ̀ɔ̀ 4:11 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Nì hwòɖò ɖá xwɛ̀ Jɛhova hwòɖò nyu nìɛ̀ ɓá nyɔ ɖò ɓɛ́ ɔ ɓiè nyɔ ɓɛ́ ɔ ɖà mɛ́ɛ mɔɔ ɔ zɔ̀ìn ɔ gbo-kpá-sɔ̃̀ kɛɛ jè dyíɛ́?

5. Jàà ɓá gĩɔ jè dyíɛɛ dè à hwòɖò dyi

Nyɔ pàɖà cɛ̃́ɛ kà ɓɛ́ wa dyi mɛ́ín, wa mu gà dyéín ɓó ɖɛ gbà ɓè wa ɖà nyuɛɛ jèɛ. Kɛɛ, ɔ dè à hwòɖò dyi ɓɛ́ à kéɛ dyí dyuò kà ɓɛ́ nyɔ ɖò dyi mɛ́ín ɔ ní dyé gà kɛ—kɛbì ɔ mɛ mɔ̀ nyɔ ɓɛ́ ɔ ɖà ɖɛ gbà nyìnììn dyíin ɓè nyuɛ. Zà Wóɖómà 6:7 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Kà à nyuà wuɖuún zàà ɖé Baɓoɔ múɛɛ, ɔ jù ké gĩɔ dyi nyɔ ɖò nàmàùn xwaún buɛ̀ ní, nìí, nì hwòɖò ɖá nyɔ séín ɖò ɓɛ́ ɔ ɖà mɛ́ɛ nì gà dyéɛń ɓó nàmàùn ɓè ɔ nyu ma kɛ jèè?

Kà à muà Jɛhova dyí dyuòùn mìɔ kɛɛ, kàà à muɛ dyéín wáɖáá kà ɔ se wɔ̃́ɔ mu fɔɔ ɓɛ́ nyɔ ɓè ɖàà mɛ́ɛ ké gà dyé. Zà Dìtɔ̀wáɖánámɛ̀ 32:4 kè 1 Jɔ̃́ɔ́ 4:8 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

• Geɖepɔɔ ɓɛ́ ɔ ɓéɖéà kpeɖe ɓè ɓɛ́ vɔ̀sì ɓè nìà kɛ cɛ̃à jèɛɛ ɓɛ́ìn gbo wɔ̃́ìn, ɓɛ́ nyɔ ɓè ɖàà mɛ́ɛ ké gà dyéè?

• Jàà ɓá gĩɔ jè dyíɛɛ dè nì hwòɖòɔ̀ dyíì? Xwíníínɔ̀ nyɛ́ kɔ̃̀ jèɛ́?

 SṸÌN-XWÍNÍÍN

Nyɔ ɖò dyi mɛ́ín, ɔ fɛ̀ɛ̀ɔ̀ ɖà mánáín hwɛ̀. Nyɔ ɓè ɖàà mɛ́ɛ ní dyé gà mɔɔ wa ní nyu nyɔ ɓè nì cĩ́ɛń nyɛɛ ɖɛ gbà bũ̀.

Ðɛ-kɔ̃in-kpa-kpa

• À dyi mɛ́ín, ɖɛ́ kpá kɛ́?

• Xwɛ̀ jàà ɓá gĩɔ jè dyíɛɛ nyu à kpáná dyíɛ́?

• Xwɛ̀ jàà ɓá gĩɔ jè dyíɛɛ nyu à hwòɖò dyi dèɛ̀ kɛ́?