Adong do kaluarga atap hasomanmu na dob matei? Sanggah ai, tontu pusok do uhurmu. Ra do sungkun-sungkun ibagas uhurmu, ‘Sonaha do keadaan ni halak na matei ai? Boi do hita pajumpah use pakon sidea?’ Bani parlajaran on pakon parlajaran na mangihut iulas hita ma balos ni Bibel pasal ai.

1. Sonaha do keadaan ni halak na dob matei?

Ipausih Jesus do halak na matei songon halak na sinok modom. Mase ihatahonni sonai? Halak na sinok modom lang ibotoh aha pe na masa. Bibel mangkatahon, “Halak na dob matei aha pe lang be ibotoh.” (Basa Parambilan 9:5.) Jadi, sanggah matei sasahalak lang lungunan ia janah lang dong be pusok ni uhurni.

2. Aha do gunani anggo ibotoh hita sonaha keadaan ni halak na matei?

Bahat do halak na mabiar matei, atap pe mabiar bani halak na dob matei. Tapi, anggo ibotoh hita sonaha sasintongni keadaan ni halak na matei, lang be mabiar hita. Jesus mangkatahon, “Paluahon ni hasintongan in ma nasiam.” (Johannes 8:32) Dong do ugama na mangajarhon manggoluh ope tonduy ni na matei. Tapi lang sonai ihatahon Bibel. Bibel mangajarhon lang dong be sitaronon ni halak na matei janah lang boi sidea mangganggu hita. Halani ai, lang porlu ibere hita sipanganon bani na matei atap pe manonggohon sidea.

Dong na mangkatahon ia boi marsahapi pakon halak na dob matei. Tapi sonaha do na sasintongni? Songon na dob iparlajari hita “aha pe lang be ibotoh” halak na matei. Jadi, anggo iagan halak dirini domma marsahapi pakon kaluargani na dob matei, ra do sasintongni domma marsahapi pakon begu-begu ia ai. Boi do ipausih-usih begu-begu dirini songon halak na matei. Jadi, ipasingat Jahowa do hita ase ulang marsahapi pakon halak na matei halani ai boi pasedahon hita. Anggo ibotoh hita hasintongan pasal halak na matei, boi ma hita manlinggomi diri humbani begu-begu.​—Basa 5 Musa 18:10-12.

3. Aha do na iajarhon Bibel pasal keadaan ni halak na matei?

Marragam do pandapot ni halak pasal halak na dob matei. Tapi lang mungkin sintong ganup na ihatahon sidea ai.

• Anggo i huta ni ham, aha ma na ihatahon halak pasal halak na matei?

 4. Gabe ipaluah do hita humbani hasomalan na lepak

Anggo ibotoh hita keadaan ni halak na matei, gabe lang be mabiar hita bani sidea. Basa ma Parambilan 9:10, janah ulas ma sungkun-sungkun on:

• Ai boi do halak na matei mangganggu hita?

Anggo porsaya hita bani ajaran ni Bibel pasal halak na matei, tontu lang ra hita mambere sipanganon bani sidea atap pe pasangapkon sidea. Basa ma Jesaya 8:19 pakon Pangungkabon 4:11, janah ulas ma sungkun-sungkun on:

• Pandapotmu, sonaha ma pangahap ni Jahowa anggo adong halak na pasangapkon atap mangindo pangurupion bani halak na dob matei?

5. Tarapoh do uhurta dob mambotoh keadaan ni halak na dob matei

Dong na mangkatahon, anggo matei sasahalak, isiksa ma holi ia halani hajahatonni hinan. Tapi Bibel mangkatahon lang isiksa Naibata halak na matei age pe jahat tumang pambahenanni sanggah manggoluh ia. Tontu tarapoh ma uhurta dob mambotoh ai. Basa ma Rom 6:7, janah ulas ma sungkun-sungkun on:

• Bibel mangkatahon dob matei sasahalak maluah ma ia humbani dousani. Jadi, anggo iahap ham tongon do isiksa Naibata halak na dob matei halani dousani hinan?

Lambin itanda hita Jahowa, lambin pos ma uhurta lang isiksa Naibata halak na dob matei. Basa ma 5 Musa 32:4 pakon 1 Johannes 4:8, janah ulas ma sungkun-sungkun on:

• Bani ayat ai ihatahon pintor do ganup dalan ni Jahowa, bujur, adil, janah parholong do Ia. Anggo sonai sifat-Ni, mungkin do isiksa Ia halak na dob matei?

• Tarapoh do uhurmu dob mambotoh hasintongan pasal halak na matei? Mase sonai balosmu?

 RIMPUNAN

Sanggah matei sasahalak, aha pe lang be ibotoh ia. Lang dong be sitarononni, janah lang boi ia mangganggu halak na manggoluh.

Na Dob Iparlajari

• Sonaha do keadaan ni halak na dob matei?

• Aha do gunani anggo ibotoh hita keadaan ni halak na dob matei?

• Mase tarapoh uhurta dob mambotoh sonaha keadaan ni halak na matei?