Ye ô jañeleya môt wo nye’e môs éziñ? Avale biyoñ ete, ô ne sili womien na: ‘Jé ja boban éyoñe môt a wu? Ye bi ne nye beta yene môs éziñ?’ Nlô ajô wu a wu wo zu, bii yene mbamba biyalane Kalate Zambe a ve a lat a minsili mite.

1. Jé ja boban éyoñe môt a wu?

Yésus a nga ve’e awu a ôyo melom. Amu jé? Amu nté ôse môt a ne ôyo, a yeme ke mam mese bôte bevo’o ba bo. Aval ete da da, éyoñe môt a wuya, a wô’ô ke fe mintaé a jam éziñ da ndeñele ke fe nye. Kalate Zambe a jô na: “Miñwuan mi ne te yeme jam.”​—Lañe’e Écclésiaste 9:5.

2. Amu jé e ne mfi na bi yeme benya mejôô a lat a awu?

Abui bôte da ko awu a bewu woñ. Ve jame Kalate Zambe a jô a lat a awu e ne volô wo nlem. Yésus a nga jô na: “Benya mejôô ma ye bo mia beti.” (Jean 8:​32) Miñyebe miziñ mia ye’ele na éyoñe môt a wu, nsisime wé wo kôlô a ke nyiñ afôla afe. Ve sake nne Kalate Zambe a ye’ele nalé. Bible a jô na bewu be nji ke vôm éziñ, nge wô’ôtane mintaé miziñ. Nde fe, mbôle bewu ba yeme ke jôm éziñ, be vo’o ke fe bia bo mbia jam. Ajô te, bi nji yiane kañe bewu nge bo mam méziñ asu na be bo te wô’ô bia ôlun. E nji fe bo mfi na bi ye’elan asu dap.

Bôte béziñ ba jô na be ne ngule ya laan a bewu. Ve jam ete e vo’o boban. Avale bi ndôme mane yen, “miñwuan mi ne te yeme jam.” Bôte béziñ ba buni na ba laan a bôte bap be maneya wu, ve nya ajôô a ne na ba laan a mimbia minsisim. Ajô te, éyoñe bia yeme benya mejôô a lat a bewu, nalé a bo na bi sa’ale mimbia minsisim. Yéhôva a jô bia na bi bo teke jeñe na bi laan a bewu, amu a yeme na nge bi bo de, mimbia minsisim mii bi fane ya bo bia abé.​—Lañe’e Deutéronome 18:​10-​12.

3. Yé’é benya mejôô a lat a awu

Si se meku’u menyin, bôte be bili miñye’elane mevale meval a lat a jame da boban éyoñe môt a wu. Ve nya ajôô a ne na, miñye’elane mite mise mi vo’o bo été.

• Bôte ya vôm ô too ba simesane na jé ja boban éyoñe môt a wu?

 4. E ne mfi na ô yeme benya mejôô a lat a awu

Nge wo yeme benya mejôô a lat a awu, wo ye ke beta ko bewu woñ. Lañe’e Écclésiaste 9:​10, mvuse ya valé, yala’ane nsili wu:

• Ye bewu be ne zu ndeñele bia?

Miñye’elane ya Kalate Zambe mia volô bia na bi sa’ale metum ma jô na bewu ba yian ékaña’a nge mam méziñ mefe asu na be bo te ndeñele bia. Lañe’e Ésaïe 8:​19 a Nlitan 4:​11, mvuse ya valé, yala’ane nsili wu:

• Éyoñe môt a kañe bewu nge sili be mvolan, wo simesane na Yéhôva a yene jam ete aya?

5. Benya mejôô a lat awu ba volô bia nlem

Be nga ye’ele abui bôte na éyoñe bé wu, Zambe é foñôsô be asu mbia be mam be nga bo. Bia bi mvolane nlem éyoñe bia yeme na Zambe a foñôsô ki môt éziñ éyoñ a wuya, to’o ba be nga bo mbia be mam. Lañe’e Beromain 6:7 e Traduction du Monde Nouveau, mvuse ya valé, yala’ane nsili wu:

• Bible a jô na éyoñe môt a wuya, a maneya ya’an abé ese a nga bo. Nde, ye wo buni na môt a wuya a ne beta bi fonos asu abé a nga bo éyoñ a mbe a vee?

Nté bia ke ôsu a yeme Yéhôva, bii tu’a tabe ndi na a vo’o foñôsô môt a wuya. Lañe’e Deutéronome 32:4 a 1 Jean 4:​8, mvuse ya valé, yala’ane minsili mi:

• Éyoñe wo lañe bifuse bite a yene mefulu mese Zambe a bili, ye wo simesane na a ne foñôsô bewu nga?

• Ye wo simesane na benya mejôô a lat a awu be ne volô môt nlem? Amu jé?

 ÔBALEBAS

Éyoñe môt a wuya, a yeme ki fe jôm éziñ, a wô’ô ki fe mintaé miziñ, nde fe, a vo’o ndeñele bevevee.

Ô ne yalan aya?

• Jé ja boban éyoñe môt a wu?

• Amu jé e ne mfi na bi yeme benya mejôô a lat a awu?

• Aval avé benya mejôô a lat a awu ba volô bia nlem?