¿Biu ɓuka bichi deɗabena makawẽebʉrã amiko? Jãu jãka nomaa aka ɓuuɗe bichia wiɗibarika “¿Ɓubaaka maucha dachi biuɗakare? ¿Unui ɓubaaka mʉ deɗabena makawẽebʉrã amiko biupeɗaaɗa baɗa?”. Cha nau lesionɗe kawaɗayua chi Bibliaba jara ɓuu nauɗebena.

1. ¿Maucha ɓubaaka dachi biuɗakare?

Jesusba jaraɗara dachi biuburuu jari dachi akawa biu kãi nuɓuuɗe komakaraabarii kĩraka ɓua. ¿Sakayua? Jari ẽbẽra akawa kãi nuɓuuɗe, kawakaa dachia kãare pasamaa ɓuu dachi aɗu. Ara jãu kĩraka ẽbẽra biuɗakare sentiɗakaa chi puʼua kuɓuu supriɗakaa. Bibliaba jara ɓuu chi “biupeɗaaɗarã akawa kʉ̃risiaswẽa paneebarii” (Eclesiastés 9:5 leas).

2. ¿Kãarea biʼia ɓua kuitaaɗayua kãare pasa ɓuu dachi biuburuuɗe?

Ẽbẽra ãrĩãba perabadaa biuɗayu, mauɗe biuɗarã siɗa. Bichimaa jãka pasaaruubʉrã, chi Bibliaba jara ɓuu bichi jãka perabarii ida ɓui ɓua. Jesusba jaraɗaa: “Chi biawãrabena ɓuuba machi biʼia nibabiyua” (Juan 8:32). Religiorã ãrĩãrãba jarabadau dachi jauri biuka ɓuu nii, makawẽebʉrã chi jauri dachi biuɗakare kakuaɗebena awara waaburu nibaɗe wã ɓuu. Maka ɓumina jãu jara ɓuuwẽe chi Bibliaba. Chi biupeɗaaɗaba akawa adua duanuu bẽrã, jãarãba dachi daño aseɗawẽa. Jãuɗéburu chi biupeɗaaɗarãmaa dai akawa aseɗaabayua dachirã ome kĩrubiimaaba, makawẽebʉrã biupeɗaaɗarãmaa bera mauɗe chiko siɗa odoeɗaabayua mauɗe nesitaɗawẽa dachi ʉrsaɗayua ãchi kakua.

Chi nuree ẽbẽrarãba jarabadau biupeɗaaɗa ome beɗeaɗai ɓuu abadaa, maka ɓumina poyaaɗaabai ɓua. Cha kawasiɗau kĩraka, chi biupeɗaaɗarãba “akawa kʉ̃risiaswẽa paneebarii”. Chi kerea nuree ãchi chi biupeɗaaɗarã ome beɗeamaa duanuurã, jãarãba bari chi demoniorã omeburu beɗea duanua, chi maarãba ẽbẽra biupeɗaaɗa kĩrakaburu unubibadauɗeeba. Jãuɗéburu dachia biuɗakare biawãra saka pasa ɓuu ʉ̃rʉbena kuitaabudauba, demoniorãba dachimaa miadaa aseɗaabai. Jeowaba jarabariira dachirã biupeɗaaɗarã ome beɗeaɗaabayu abaria, ichia kuitaa ɓuu dachi demoniorã omeburu beɗea ɓuuɗeeba mauɗe jãu dachirã baita miadaa ãrĩã ɓuuɗeeba (Deuteronomio 18:10-12 leas).

3. Chi biawãrabenadu pasabarii dachi biuɗakare

Chi nau iujãa jomauɗe ẽbẽraba didiwaraa kereabadau kãare pasabarii dachi biuɗakare. Maka ɓumina, jãu joma biawãrabenawẽe.

• ¿Saka kʉ̃risiabadaa ẽbẽrarãba chi biupeɗaaɗaɗebena bichi ɓoobariimaa?

 4. Chi biawãrabena kawaburuuɗe biupeɗaaɗaɗebena, ¿dachia kãare ida ɓuibaraa?

Kawaburuuɗe chi Bibliaba jara ɓuu biupeɗaaɗaɗebena, dachi perabarii baɗa ida ɓuibaria. Eclesiastés 9:10 leaɗapeɗa, mambea nau ʉ̃rʉbena beɗeasturu:

• ¿Biupeɗaaɗarãba dachi daño aseɗai ɓubaaka?

Dachirãba kinipeɗaaɗa biawãra kawapeɗaaɗakare, kuitaabadaa dachia chiko odoeɗaabai biubarikuaɗapeɗaaɗarãmaa ãchi kĩrubiaɗaamaaba o bera koa bʉekaɗaabayu. Isaías 8:19 mauɗe Apocalipsis 4:11 leaɗapeɗa, mambea nau ʉ̃rʉbena beɗeasturu:

• ¿Jeowa saka senti ɓoabaaka chi niiba chiko odoepeɗa mauɗe beraɗeeɗa koaburuu baita makawẽebʉrã ãchimaa aiɗábaɗa ayu?

5. Chi biawãrabena kawaburuuɗe biupeɗaaɗaɗebena, jãuba dachirã biʼia sentibi ɓua

Ẽbẽrarã ãrĩãmaa kawabi nuɓuu, biupeɗaaɗakare chi kachirua asepeɗaaɗa kakua, maarã supribudau. Maka ɓumina biʼia ɓuuta kawayuɗebena chi biupeɗaaɗarã baɗa supriɗawẽe mauɗe chi miadaa ɓee asepeɗaaɗarã siɗa. Romanos 6:7 leaɗapeɗa, mambea nau ʉ̃rʉbena beɗeasturu:

• Ara jãka jari chi Bibliaba jara ɓuu kĩraka, biuburuuɗe ichi pekao bara nibaɗa wãʼãe ɓee ɓuu. Jãuɗeeba, ¿bichia kerea ɓuka chi biupeɗaaɗa baɗa supri duanuu ãchi miadaa asepeɗaaɗaɗebena?

Waaburu kawabudauɗe Jeowaɗebena, kuitaa panua biʼia ichia supribiakau biupeɗaaɗarã baɗa. Deuteronomio 32:4 mauɗe 1 Juan 4:8 leaɗapeɗa, mambea nau ʉ̃rʉbena beɗeasturu:

• Cha naarã versiculorãɗe jara ɓuu kĩraka, ¿Dachi Akõre biʼia ãrĩã nii ichia supribia kʉ̃ria ɓubaaka chi ẽbẽra biupeɗaaɗaɗebena?

• ¿Bichia kerea ɓubaaka chi biawãrabena kawaburuuɗe biupeɗaaɗaɗebena, jãuba biʼia sentibi ɓuu? ¿Sakayua?

 NAU KAWASIƊAA

Aɓa biuɗakare, jãma ichi nibai baɗa akaba ɓua. Chi biupeɗaaɗarã baɗa, supriɗawẽa  mauɗe ãchia waabenarã siɗa daño aseɗawẽa.

Waya berreaɗaika

• ¿Maucha ɓubaaka dachi biuɗakare?

• Dachia chi biawãrabena kawaburuuɗe biupeɗaaɗaɗebena, ¿dachia kãare ida ɓuibaraa?

• ¿Sakayua biʼia sentibi ɓua dachia chi biawãrabena kawaburuuɗe biupeɗaaɗaɗebena?