¿Am ba majqui chʌmen (sajtem) a chaʼan? Ti jimbʌ ora, tajol maʼ cʼajtiben a bʌ: «¿Anto ba chuqui cuxul miʼ cʌytʌl cheʼ mi lac chʌmel? ¿Muʼto ba caj i mejlel c chaʼ qʼuelob jiñi am bʌ chʌmiyob c chaʼan?». Ti ili cʌntesʌntel yicʼot ti jiñi yambʌ mi caj laj qʼuel jiñi utsʼatax bʌ i jacʼbal miʼ yʌqʼueñonla jiñi Biblia.

1. ¿Anto ba chuqui cuxul miʼ cʌytʌl lac chaʼan cheʼ bʌ mi lac chʌmel?

Jesús tsiʼ yʌlʌ chaʼan cheʼ mi lac chʌmel lajal bajcheʼ wʌyʌlonla. Cheʼ bʌ juntiquil wen wʌyʌl, maʼañic chuqui miʼ yubin. ¿Chucoch lajal bajcheʼ wʌyʌlonla cheʼ mi lac chʌmel? Cheʼ bʌ an majqui miʼ chʌmel, maʼañix miʼ yubin wocol. Jiñi Biblia miʼ yʌl chaʼan «maʼanix chuqui yujilob jini chʌmeñobix bʌ» (pejcan Eclesiastés 9:5).

2. ¿Chucoch miʼ coltañonla cheʼ la cujil chuqui miʼ chaʼlen jiñi chʌmeñoʼ bʌ?

Cabʌlob miʼ bʌcʼñañob chʌmel yicʼot miʼ bʌcʼñañob jiñi tsaʼix bʌ chʌmiyob. Pero muʼ bʌ i yʌl jiñi Biblia chaʼan jiñi chʌmel miʼ mejlel i ñuqʼuesan lac pusicʼal. Jesús tsiʼ yʌlʌ: «Jiñi i sujmlel mi caj i yʌqʼuetla ti cojlel» (Juan 8:​32). An ñopbalʌl tac muʼ bʌ i yʌlob chaʼan cheʼ mi lac chʌmel anto chuqui cuxul miʼ cʌytʌl lac chaʼan, pero jiñi Biblia mach cheʼic miʼ yʌl bajcheʼ jiñi. Jin chaʼan, maʼañix mi la cubin wocol cheʼ mi lac chʌmel. Come jiñi chʌmeñoʼ bʌ maʼañix chuqui yujilob, maʼañic miʼ mejlelob i ticʼlañoñobla. Jin chaʼan, mach i cʼʌjñibalix mi lac chʼujutesañob o mi lac melbeñob i qʼuiñilel chaʼan maʼañic miʼ michʼañob yicʼotonla.

An muʼ bʌ i yʌlob chaʼan miʼ mejlel i pejcañob jiñi chʌmeñoʼ bʌ, pero jiñi mach i sujmic. Come jiñi chʌmeñoʼ bʌ «maʼanix chuqui yujilob». Jiñi muʼ bʌ i poj ñaʼtañob chaʼan jin woli (choncol) i pejcañob jiñi i familia chʌmen bʌ, tajol woli (yʌquel) bʌ i pejcañob jiñobʌch jiñi xibajob. Jin chaʼan, cheʼ la cujil jiñi i sujmlel chaʼan jiñi chʌmel miʼ cʌntañonla tiʼ tojlel jiñi xibajob. Jehová miʼ subeñonla chaʼan mach yomic mi lac ñop lac pejcañob jiñi chʌmeñobix bʌ come jiñʌch jiñi xibajob mi caj lac pejcañob i mi caj i yʌqʼueñonla wocol (pejcan Deuteronomio 18:​10-​12).

3. Jiñi muʼ bʌ i yujtel cheʼ mi lac chʌmel

Tiʼ pejtelel pañimil (mulawil) cabʌl chuqui miʼ yʌjlel chaʼan chuqui mi lac chaʼlen cheʼ bʌ mi lac chʌmel. Pero mach tiʼ pejtelelic i sujm.

• ¿Chuqui ñʌmʌl ti ajlel chaʼan jiñi chʌmeñoʼ bʌ yaʼ ti a lumal?

 4. Cheʼ la cujil chuqui mi lac chaʼlen cheʼ mi lac chʌmel miʼ coltañonla

Cheʼ bʌ mi laj cʌn jiñi i sujmlel chaʼan jiñi chʌmel, maʼañix mi lac bʌcʼñan jiñi chʌmeñoʼ bʌ. Pejcanla Eclesiastés 9:​10 i tem alʌla iliyi:

• ¿Mejl ba i ticʼlañoñobla jiñi chʌmeñoʼ bʌ?

Mi mucʼʌch lac ñop jiñi i sujmlel muʼ bʌ i yʌl jiñi Biblia maʼañix mi caj lac chʌn ñop chaʼan yom mi lac chʼujutesan jiñi chʌmeñobix bʌ yicʼot chaʼan an chuqui yom mi lac melbeñob chaʼan maʼañic miʼ michʼañob yicʼotonla. Pejcanla Isaías 8:​19 yicʼot Apocalipsis 4:​11, i tem alʌla iliyi:

• ¿Bajcheʼ yubil miʼ yubin i bʌ Jehová maʼ wʌl cheʼ bʌ an majqui miʼ chʼujutesan jiñi chʌmeñoʼ bʌ o miʼ cʼajtibeñob i coltaya?

5. Cheʼ la cujil chuqui mi lac chaʼlen cheʼ mi lac chʌmel miʼ ñuqʼuesan lac pusicʼal

Cabʌl miʼ subentelob chaʼan cheʼ bʌ mi’ chʌmelob mi caj i tojob i mul. Pero miʼ ñuqʼuesan lac pusicʼal cheʼ la cujil chaʼan maʼañic baqui mi caj lac majlel lac toj lac mul cheʼ bʌ tsaʼix chʌmiyonla, mi jiñicto jiñi ñumen jontol bʌ chuqui tsiʼ mele. Pejcanla Romanos 6:7 i tem alʌla iliyi:

• Cheʼ bajcheʼ miʼ yʌl jiñi Biblia, cheʼ bʌ an majqui miʼ chʌmel muqʼuix i ñusʌbentel i mul. Cheʼ jiñi, ¿woli ba i tojob i mul maʼ wʌl jiñi chʌmeñoʼ bʌ chaʼan tsaʼ bʌ i meleyob ti wajali?

Cheʼ mi lac ñumen cʌn Jehová, ñumen tsiquil mi laj qʼuel chaʼan maʼañic miʼ yʌqʼuen i ñusan wocol jiñi chʌmeñoʼ bʌ. Pejcanla Deuteronomio 32:4 yicʼot 1 Juan 4:8, i tem alʌla iliyi:

• Juntiquil Dios cheʼ bʌ yilal bajcheʼ woliʼ tsictesan ili texto tac, ¿muʼ ba caj i yʌcʼ ti pulel ti cʼajc jiñi chʌmeñoʼ bʌ?

• ¿Mucʼʌch ba i ñuqʼuesan a pusicʼal maʼ wʌl jiñi i sujmlel chaʼan jiñi chʌmel? ¿Chucoch?

 TSAʼ BɅ LAJ CɅÑɅ

Cheʼ bʌ an majqui miʼ chʌmel, maʼañix chuqui cuxul miʼ cʌytʌl i chaʼan. Jiñi tsaʼix bʌ chʌmiyob maʼañix miʼ yubiñob wocol i maʼañic miʼ mejlel i ticʼlañoñobla.

¿Chuqui tsaʼ cʌñʌ?

• ¿Anto ba chuqui cuxul miʼ cʌytʌl lac chaʼan cheʼ bʌ mi lac chʌmel?

• ¿Chucoch miʼ coltañonla cheʼ la cujil chuqui miʼ chaʼlen jiñi chʌmeñoʼ bʌ?

• ¿Chucoch miʼ ñuqʼuesan lac pusicʼal cheʼ la cujil chuqui miʼ chaʼlen jiñi chʌmeñoʼ bʌ?